* لو إنت عايش في بيت عيلة هاتتربي علي أول حاجة ودا طبعا بعد إحترام الكبير علي العمل الجماعي وهاتتعلم قدام الناس هاتعمل إيه وأما نروح نتحاسب بقي يا حلو .
سيبك بقي من قدام الناس والغرف المغلقة والحساب والعقاب لأن دا مش وقته علي شام إحنا دلوقتي هانجهز لفرح " محمد " أكبر ولد في العيلة في البداية تلاقي محمد – علي حسب إنتمائك ليه بقي أخ أو ابن عم – معمولة كونسلتوا من الحريم اللي في العيلة علي شان يختار عروسة وغالبا في بيوت العيلة ما بيعترفوش بالحب والكلام الفاضي بتاع السيما ده وبيبقي الجواز جواز صالونات وتروح رايح الست أم محمد ومعاها الست والدتك لبيت العروسة علي شان ياخدوا منهم ميعاد يشربوا فيه الشاي ويروح جدك بقي ومحمد والعيلة علي شان يشوفوا العروسة وتبص لمحمد تلاقيه مضروب بالجزمة علي شان يروح ويروح وهو مغمي عنيه ، المهم ياسيدي محمد يشوف " البت بهانه " وتعجبة ويوافق وأول مايقرا الفاتحه ويلبس الدبل ماتشفهوش في البيت إلا لما يكون نايم وكل ماتسأل عليه خالتك أم محمد تقولك : " دا عند نسايبة يابني " وطبعا حضرتك كنت غاصب عليه يروح علي شان جده ما يزعلش ودلوقتي علي طول هناك وبعد ما تضرب كف بكف وتتعجب ومافيش مشكلة إنك تقول : يا سبحان الله ! كنا مودينه زي القطة المغمضة وكان رايح عصب عنه دلوقتي بقي علي طول هناك " المهم بقي نخش خلاص في الجد وميعاد الدخله قرب ولازم نجهز القاعة – لو في بيت فلاحين ودا كان زمان – أو الشقة الفاضية في بيت العيلة تلاقي محمد ماشي مع بهانه وعمالين يشاوروا بس وأبوك أو جدك بيدفع وحضرتك الشيال وتقف مع الصنايعية اللي بيدهنوا الشقة ودا طبعا بعد لما هو يختار اللون اللي عاوزه هو وبهانه وممكن يطلع الشقة مرة أو مايطلعش خالص غير لما الناس تخلص فيها شغل ولما الشقة تضوب وخلاص بقي هانجيب العفش مافيش قدامة غير حل من إتنين يا إما يروح دمياط يإما المناصرة علي شان يختار العفش اللي اتفقوا عليه مع أهل العروسة وطبعا هو رايح إشراف وحضرتك الشيال وتتعامل مع الشيالين ويطلع عينك وهو يختار ويمشي مع بهانه وإنت تيجي علي عربية العفش ويوم العزال بقي تلاقيه رايح عن العروسة من الصبح علي شان يقف مع المنجد والناس تيجي تبارك وحضرتك تبقي رايح جاي تسلم علي اللي يجي ولازم يشرب حاجة ساقعة ويوم العزال يعدي علي خير وأهل بهانه يجوا يفرشوا الشقة ويروقوها وتبقي علي سنجة عشرة مافضلش بقي غير الليلة الكبيرة وتروح تتفق مع الكهربائي – طبعا في الأرياف مافيش قاعات ولا الكلام دا الفرح بيتعمل قدام البيت وفي مناطق شعبية بتعمله قدام البيت برضوا – وتخلصكل حاجة وتلاقي كل المعزيم بيقولولك " يلا اتجدعن بقي واعمل زيه " والليلة تخلص غلي خير والحمد لله حضرتك ترتاح بقي لأول مره من ساعة لما محمد خطب بهانة اللي كتب الكتاب وعلا الجواب خلاص وتلاقي جدك وأبوك وكل العيلة مستنية أول حفيد في البيت وتقريبا بعد أول شهر كل يوم يسألوا محمد هو مافيش حاجة في السكة ولا إيه ؟ ومحمد مكسوف مش عاوز يرد عليهم ويقولهم إنه زي الفل وبيبقوا مع بعض زي السكينة في الحلاوة بس ربنا ليه مأردش بس تقول لمين بقي يا سيدي !
وفي يوم مايعلم بيه إلا ربنا تبقي قاعد ميت من الجوع ومستني الأكل والحريم كلهم في المطبخ وأول ما مدام بهانة تشم ريحة الأكل تروح مرجعة – معرفش ليه الآرف ده بس هانعمل إيه بقي – تروح سامع أحلي زغرودة ترن في البيت واللي مارنتش من ساعة الجواز وتلاقي واحده من الحيم داخله القاعة اللي قاعدين فيها الرجاله وتقولهم : " بهانة حامل , مبروك يا واد يا محمد " وتلاقي أبوه يروح قايله : " عفارم عليك ياض يارافع راس أبوك " - بيحسسك إنه رفع علم فلسطين علي المسجد الأقصي ماعلينا – وطبعا بهانة خلاص حامل يعني مافيش شيل تقيل مافيش تحرج كتير مافيش ... مافيش ... وطبعا كل الكلام المافيشي دا بيجي علي دماغ حضرتك نشير السجاجيد أو الحصر والستاير وتروق الشقة بتاعة بهانه مع حد من الحريم ومش بعيد كمان يخلوك تروح السوق وتجيب التموين بالمرة ولما تيجي بهانة تروح للدكتور لازم غنت تروح حتي لو جوزها رايح معاهم وخلاص بقي إنت عاوز تضرب بهانه بالنار باللي في بطنها وقبلهم محمد اللي تاعب قلبك من قبل ما يتجوز وخلاص بهانه بقت بطنها قدامها متر ويجي معاد الولادة والكل واقف مستني ولد ولا بنت – طبعا ناس كتير بتعتقد إن السونار دا حاجة وحشة – وبعد طول إنتظار الرجالة بره تسمع واااااااااء واااااااء وتروح الحريم مزغردة والرجالة تحضن بعض وإنت تشيل هم إنك لسه هاتجيب حاجات السبوع ! والكل فرحان وسعيد وجدك اللي مش قادر يمشي تلاقيه رايح جري علي شان يشوف " اول حفيد لابنه " وتعلا الزغاريد والناس تيجي تبارك وإنت تبل الشربات ولازم الموغات طبعا وأديك بتتعلم إزاي تبقي ست بيت ودا كله علي الرغم من كل الحريم اللي بيت بس مشغولين بقي واحده مع بهانة وواحده تستقبل الضيوف وواحده ... وواحده ... وهي دي ضريبة العمل الجماعي فلو في أي حد أكبر منك وعرفت إنه هايتجوز إعمل ندل كل لما تعرف إنه هايجيب حاجة وأختفي أو اتجوز إنت الأول وريح دماغك بعد كده أو روح التحرير .
ليست هناك تعليقات:
إرسال تعليق