متغرب برا بلدي
ونفسي أعمل حاجة
دا أنا يوم ما اتغربت
اتغيرت كل حاجة
نفسي في حاجات كتير
ومحروم من كل حاجة
وحشتيني يا اما
ووحشتني بلدي
واكلك العايم
في السمنة البلدي
وانت بتظغطيني
وغصب عني تأكليني
وكل ما اشوفك
بتدعيلي
" ربنا يفتحها في وشك
ويوقفلك ولاد الحلال
يابن بطني ياغالي "
وحشاني ملوخيتك الخضرة
وخناقي معاكي
لما تعملي الناشفة
وأحلي صينية بسبوية
حاطه عليها جوز الهند
وبتبقي في بقي مرملة
وحشتني القاعدة معاكي
والأكل سوا علي الطبلية
وحشني سريري
وصوتك العالي
وإنت بتصحيتي
وقلمك الحنين علي خدي
وع الخد التاني بوستك
وانت بتصالحيني
وحشتيني ووحشتني بلدي
نفسي أرجع بالزمن تاني
وأحقق في مصر كل الأماني
واوطي علي إيدك أبوسها
وبإيدي دمعتك أحوشها
وأطلب منك السماح
دا كفاية العمر اللي راح
في الغربة برا بلدي
مش هابعدك تاني
ومش هاسيب بلدي
ليست هناك تعليقات:
إرسال تعليق