الاثنين، 29 أكتوبر 2012

الشعب الوحيد في العالم


في برنامج " مصري أصلي " للمبدع دائما " عمر طاهر " أعاد مقولة أبو القدا " مصطفي كامل " : لو لم أكن مصريا لوددت أن أكون ... " ودا كان سؤال بداية كل حلقة إنما قبل ما تجاوب علي السؤال أو حتي تفكر إنك تتريق عليه لازم تعرف إننا متفردين من بين العالم بحاجات معينه هاتبتدي كلها بإحنا الشعب الوحيد في العالم ودا اللي شايفة لحد دلوفتي :
·        إحنا الشعب الوحيد في العالم اللي بيطلع أو ينزل يجري علي السلم الكهربي .
·        إحنا الشعب الوحيد في العالم اللي متدين بطبعه ومع كده بنلاقي خناقات لرب السما في الجوامع علي أتفه الأسباب زي إنم تشغل المروحة أو تطفيها ، أو إن الإمام اتأخر شوية في إقامة الصلاة ، أو ... أو ... أو ...
·        إحنا الشعب الوحيد في العالم اللي بيتفشحر إن بلده بتتسرق وبنعتبر إن دا علامة الجودة للبقاء وديما نقول : " البلد دي فيها خير مالهوش آخر والدليل إن البلد دي بتتسرق من أيام الفراعنة وبرضوا الناس اللي فيها لسه عايشين ! " .
·        إحنا الشعب الوحيد في العالم اللي عمل ثورة في 18 يوم وبعد كده روح من غير ما الثورة تحكم أو تنفذ أي حاجة من اللي خرجت الجماهير تطالب بيها !
·        إحنا الشعب الوحيد في العالم اللي بيتريق علي أي حاجة ولو ملقناش حاجة نتريق عليها بنقعد نتريق علي نفسنا !
·        إحنا الشعب الوحيد في العالم اللي الشهداء ماتوا لوحدهم ولحد دلوقتي ما نعرفش مين اللي كان السبب إنهم يبقوا شهداء !
·        إحنا الشعب الوحيد في العالم اللي بيستغل المناسبات العامة والأعياد الدينية في التحرش الجنسي وباقي السنة بنتحرش ببعض فكريا وسياسيا
·        إحنا الشعب الوحيد في العالم اللي بتلاقي فيه مسلمة بتقول لاختها المسيحية : " كل سنة وانت طيبة " والمناسبة عيد الأضحي ! ودا حصل قدام عيني
·        إحنا الشعب الوحيد في العالم اللي بنشغتل بمعدل 24 دقيقة في اليوم
·        إحنا الشعب الوحيد في العالم اللي حصله منه علي جائزة ونوبل لازم يتقال عليه إنه خاين أو عميل وممكن الأمر يوصل لدرجة الكفر كمان
·        إحنا الشعب الوحيد في العالم اللي مابيعرفش كاتب أو مفكر أو عالم إلا لما يموت فنشوف ونسمع خبر وفاته
·        إحنا الشعب الوحيد في العالم اللي علي الرغم من أجهزة المخابرات عنده إلا إنه واقف عاجز قدام " الطرف التالت " اللي ديما بيتسبب في كل خراب
·        إحنا الشعب الوحيد في العالم اللي بيكسل يعمل شير لجملة أو مقولة لفلان والمصيبة إنه بيكتبها من غير ما يقول صاحب الجملة !
·        إحنا الشعب الوحيد في العالم اللي بيتفنن إنه يقضي علي التراث أو أي حاجة حلوة وأكيد سمعت أغاني شعبي لأم كلثوم والجديد طبعا مهرجان " أنا في اللابويا " !
·        إحنا الشعب الوحيد في العالم اللي لما اختفت الشرطة ما حصلتش أي حوادث من سرقة أو تحرش أو ... أو ... أو ... !
·        إحنا الشعب الوحيد في العالم اللي انتخب رئيس لبلده من غير ما نعرف إيه صلاحياته
·        إحنا الشعب الوحيد في العالم اللي بيفرغ كل الشحنات الموحبة والسالبة عنده من " فرح ، حزن ، تضامن ، نفاق ، فراغ ، و خوف ، ...... " في الأكل
·        إحنا الشعب الوحيد في العالم اللي علم الشعوب العربية والإسلامية القرآن الكريم وكفاية إنك تقول في أي مكان اسم الشيخ " عبد الباسط عبد الصمد " وعلي الرغم من كده مابقيناش نسمعهم وبنسمع مقرئين الخليج !
لو عرفت حاجات تانية إحنا متفردين ومنفردين بيها علي مستوي العالم ما تبخلش عليا وعرفهالي .

الأربعاء، 24 أكتوبر 2012

والعود أحمد

فترة كبيرة نكست فيها القلم وحطيته علي المكتب بعد ما قفلته واختفي السن بتاعه مش إعتراضا علي اللي بيحصل من كلام عن التأسيسية أو من قص شعر الفتيات في المدرسة علي شان مالبسوش الحجاب أو انبهار من النطة اللي عملها " فيلكيس" واللي فكرني الاعب الأهلي الجميل " أحمد فيليكس " وفرحتة الشهيرة بعد كل جون بيحطة واللي ظل اسطورة أفريكية علي الملاعب المصرية إلي أن أنهاها اللأعب الأنجولي فلافيو ، ولا علي شان كل ماحزب الدستور والتيار الشعبي يعلنوا عن جمعة تحت أي مسمي لازم يحصل تشويه ليها ونخوف الناس منهم واللي حصل في جمعة كشف الحساب وتحولها لموقعه جش جديدة كان مجرد بداية وتم الموضوع بعد كده في جمعة مصر مش عزبة وتحولت فجأة لجمعة الفلول وهاينزل الإعلامي الأوحد في الوطن العربي والأستاذ خرطوش ، ولا علي شان التدخل الغريب العجيب من المؤسسة الرئاسية في شئون القضاء للمرة التانية مع إن الرئيس معاه السلطات التشريعية في سابقة محصلتش في عهد المخلوع ولا علي شان الرئيس بقاله كتير ما خطبش ودي حاجة يتحسد عليها طبعا إنما هو كسل وخمول وعدم فراغ علي شان بوضب الشقة علي شان أشوفلي بنت الحلال اللي عندها 9 سنين وتكون شعرها أصفر وعملاها دفيرتين وفي فرق في نص راسها وموقعه كل السنان بتاعتها علي شان ما بحبش أروح لدكاتره السنان علي شان نكون أسرة صغيرة في السن والعقل والامكانيات بس مدام الدستور قال كده وعلي رأي ميكي يبقي سو وات مدام الموضوع هايبقي بما لا يخالف شعر الله ، المهم إني قررت إني أرجع أكتب تاني علي شان أحسن إني لسه عايش وليا قيمة في الحياة ودا طبعا علي شان بحسب ساعات عمري اللي ماسك فيها القلم وبكتب وبتعبر إن هي دي الحياة .

الثلاثاء، 16 أكتوبر 2012

خايف

خايف عليكي مني
خايف أتوه فيكي
أكتر ما أنا تايه
من يوم ماشفت عنيكي
وزاد توهاني أكتر
لما لمست اديكي
من أول سلام بينا
ومت من ساعتها فيكي
خايف عليكي مني
دا أنا قلبي مجروح
كل الأحبة بعدوا
وسابوني مجروح
والآه مين يسمعها ؟
ولمين بسري أبوح ؟
أيوب صبر علي المرض
وعلي الطوفان سفينة نوح
وأنا ياما غرزت في شوك
خلاني أعيش مجرح
والخوف بقي جزء مني
عايش زي المدبوح
حبك هايهون عليا
ولا هايزيد الجراح ؟ !
دا جراحي فاضت بيا
وضاق بيها البراح
فياتري هاتردي عليا
وتخليني من حزني أرتاح ؟
ولا هاتردي عليا
وتزوديلي الجراح ؟

A_Mohmady@yahoo.com ***

@ahmedmohmady



الثلاثاء، 2 أكتوبر 2012

مشكلة الأطبا

إزاي عايزني أشوف عيان
واجري بيه لاقرب مستشفي
مع إني عارف ومتأكد
إنها ما بقتش أمان
ولافيها أي امكانيات
وبقت انيل من زمان
اللي فيها الدكتور يا ما قال
ولا حد كان بيسمعه
والمسؤولين ودن من طين
ولا حد فكر يعبره
والتانية كمان من عجين
والدكتور قلبه يوجعه
من كتر الحالات الخطيرة
وعالمريض اللي مش قادر يسعفه
ومش لاقي حته شاش
يلف بيها جرحه
ولا حتي أي حاجة
يقدر بيها يساعده
نص الاطبا إن ماكنش
كلهم هجوا وسابوا البلد
وقليلين فضلوا وطالبوا
بحقهم في حياة كريمة
ومستشفي نضيفة متأمنة
يعالجوا فيها ولاد البلد
وهاينسوا كل اللي فات
لو السيد المسئول
عنده نيه
ينقذ الانسانية
ويحل مشكلة الاطبا
2/10/2012