* طبعا كلنا عارفين إن " الحاجة أم الإختراع " وكل اللي اتوصل ليه العلماء من إبداعات واختراعات أكيد كان وراها " الحاجة " يا إما الحاجة إلي التمير والإختلاف أو الحاجة إلي تفسير ظاهره ما أو حتي الحاجة إلي استخدام شيء وطبعا ولا يخفاش عليكوا إن المصريين أكتر شعب ممكن يستخدم أي حاجة في أي وقت وفي أي حته والاستخدام الأمثل كمان ! سواء بقي اتخيلت دا ولا مش قادر تتخيلة أو مجاش علي بالك إن إنت تتخيله أصلا هاوضحلك ببساطة وحاجة يوميه وهي الجرايد بجميع أنواعها سواء كانت مملوكة للدولة أو معارضة او حتي جرايد صفراء الاستخدام بتاعها مش مجرد إننا بنقراها بس وعلي الرغم من طريقة القراية واختلاف الأشخاص وخصوصا في المواصلات العامه - وخاصة المترو - ممكن تلايق واحد تحس إنه فارش الجرنال ومعرف الناس كلها إنه بيقرا فيه وتلاقي جنبه واحد مطبق الجرنال ستين حته علي شان ما يضايقش حد وفي نفس الوقت يقرأ برضوا وطبعا حضرتك بتسأل إيه بقي الإستخدامات التانيه للجرنال ؟ أقولك يا سيدي ولا يخفاض عليك إن الجرايد بتتفرش علي الطبلية في كثير من بيوتنا والتي لم تغزوها السفرة بكراسيها وحتي التي غزتها فالقعده علي الطبيلة ليها إحساسها الخاص بيها وتروح حاطط علي الجرنال الأكل وكتير بقي من أهلنا والناس الكبيرة بالذات بعد ما يخلص الأكل يروح قاطع حته من ورقة الجرنال المفروشة ويروح ماسح بيها إيده وطبعا لو اتكلمت معاه وإن دا غلط يقولك " يابني إحنا متربين علي السمنة البلدي مش زي أكل اليومين دول " وطبعا هاتسكت ومش هاتعرف ترد مش علي شان السمنة البلدي أفضل من السمنة النباتي إنما علي شان سنه برضوا حاجة كمان يا سيدي في البيت ولسه ماخرناش منه تلاقي الست الوالده مكركبة البيت وعماله تصحي فيك وتقولك قوم بقي عاوزين نروق الأوضة وإنت نفسك تنام بس هاتعمل إيه ما باليد حيلة وتقوم تغسل وشك وتلاقيها واقفة قدام المراية وبعد ماترشها بأي حاجة سواء كان منظف أو شوية ميه كده وتروح مكعورة ورقة الجرنال وتنزل علي المراية وبعد ما تخلص غسيل وشك وتدخل تشوف المراية تلاقيها زي الفل وبتبرق وأصحاب المحلات برضوا بيعملوا نفس الكلام وتلاقي المراية بتاعته بتبرق وهو عارض الحاجة فيها وزي ماتكون كده ورة الجرنال ما بتكدبش وأخيرا وليس آخرا آخر الاستخدامات للجرنال اللي شفتها بعيني هي فايل للحفاظ علي الورق ! طبعا مستغرب بس هاقولك إزاي تجيب الورق اللي إنت عاوز تحافظ عليه وتجيب ورقة من نص الجرنال علي شان تبقي نضيفة وتروح لافف بيها الورق وماشي بيه في أي حته وهاتوفر كمان بدل ما تجيب فايل ولا دوسية ولا حاجة أهو أسرع وأوفر مافيش اكتر من الجرايد في البلد . ممكن يكون في إستخدامات تانيه للجرنال غير اللي أنا قولتهالك دي بس هما دول اللي أنا أعرفهم ولو حضرتك تعرف أي حاجة غير دول ياريت تقولي عليها وماتتأخرش عليا وتبقي خدت فيا ثواب وهنيالك يا فاعل الخير .
* عاشت مصر حرة بسواعد أبنائها .
ليست هناك تعليقات:
إرسال تعليق