الأحد، 28 أغسطس 2011

ماتخدش في بالك ... الحلقة السبعتاشر


*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .



( الحلقة السبعتاشر )
بعنوان

أمر عجيب
***
*ها هو رمضان يكاد يودعنا وتغلق مدرسة الصيام أبوابها تلك المدرسة التي بمقدمها شمر الناس سواعدهم وكل أعد عدته وتفتحت القلوب حتي إننا لنجد العصاه يسارعون في إفطار الصائمين ولم يبقي من رمضان سوي ليلة التاسع والعشرون والتي قد تكون ليلة القدر فمالي أري الناس قد شمروا ساعدهم وأستعدوا للعيد وتركوا ما بقي من رمضان وكأنهم تثاقلوه أي فتور هذا الذي نحن فيه كنا بالأمس القريب فريحين برمضان والآن لا ننتظر إنتهائة ونتبادل التهاني بالعيد وترك ليلة قد تكون خير من الف شهر أذكر نفسي إياكم بتلك الليلة ، اللهم بارك لنا في رمضان وأرزقنا لذه صيامة سنين عديدة .

السبت، 27 أغسطس 2011

ماتخدش في بالك ... الحلقة الستاشر




*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .



 

( الحلقة الستاشر )
بعنوان

العجلة إياها
***
 *طبعا كلنا عارفين إن عجلة الإنتاج وفقت بعد الثورة وإن الصين واليابان إحتاسوا ومابقوش عارفين يجيبوا الحاجات اللي كانت مصر بتصدرهلهم منين والخبراء الإقتصاديين حذروا من مجاعة وكلام كبير أوي كل ما أفتكره أقعد أضحك الموضوع ببساطة إن البلد فيها خير كتير جدا ولما أدخل مسجد في منطقة علي قد حالها والشيخ يقول : " الدفعة الثالثة تم تحويلها لنقابة الإطباء لتصل لأهلنا في الصومال المبلغ هو 10,800 جنية  " خد بالك من الكلام المنطقة علي قد حالها وفيها مشاكل كتير جدا وشوف المبلغ قد إيه لا وكمان الدفعة التالتة عرفتوا البلد والناس لسة عايشين لحد دلوقتي مع كل هذه السرقة والنهب والفقر والمرض البلد دي مبروكة يا جدعان وكفاية إن اسمها مصر .

الجمعة، 26 أغسطس 2011

ماتخدش في بالك ... الحلقة الخمستاشر



*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .






( الحلقة الخمستاشر )
بعنوان

أجندتك إيه ؟
***
 *من المصطلحات الجديدة الي ما كناش نسمع عنها كلمة " اجندة " وطبعا إحنا ما كناش نعرف غير الأجنده بتاعة كل سنة واللي كنا بنسأل عليها هو عم فلان جاب الأجنده ولا لا ؟ بس دلوقتي بقي في أجندات كتير أوي والكلمة بقيت تتكرر كتير وطبعا الأجندة صاحبة قلب الأسد هي الأجندة الخارجية وهي دي اللي حركت الشعب المصري علي شان يخرج في الثورة – بقي دا كلام ناس عاقلين – وموضوع الاجندات دلوقتي بقي لأي حد وفي أي مكان يعني إنت لو مختلف معايا في الرأي تبقي معاك أجندة وش مافيهاش نقاش يعني ، إنت بقي أجندتك إيه ؟ .

الأربعاء، 24 أغسطس 2011

ماتخدش في بالك ... الحلقة الأربعتاشر



*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .






( الحلقة الأربعتاشر)
بعنوان


هما مين ؟
***

 *أكتر حاجة بتضايق الواحد لما يسمع حد بيقول : " بيقولوا " & " أصل أنا سمعت " طب هما مين اللي بيقولوا أو إنت سمعت من مين ؟  وطبعا السؤال دا مالهوش إجابة وأكتر حاجة ممكن تطلع شائعات بيها هما الكلمتين دول أو أي حاجة ممكن تتخيلها أو ما تتخيلهاش فياريت لو حد قالك بيقولوا أو أنا سمعت تعرف هما مين دول اللي قالوا وخد عندك دي يا سيدي بيقولك اللي حصل في ليبا إنهم أتفقوا انها تكون الكاميرة الخفية بس القذافي نسي الموضوع وضرب بجد .

الاثنين، 22 أغسطس 2011

ماتخدش في بالك ... الحلقة التلتاشر



 *سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .







( الحلقة التلتاشر )
بعنوان




الدور الجاي
***

*معرفش ليه جالي إحساس كده خير اللهم أجعله خير إن الملوك والرؤساء بتوعنا كانوا راكبين ميكروباص اللي هم مكيف طبعا وكل واحد جاتله محطة فجأة ونزل فيها وأول واحد نزل بن علي وحصلة مبارك وآخر الآنباء القذافي ولسه مش عارفين مين هاينزل تاني بجد دول بقي مش ينكسر وراهم قله لالالا دا ينكسر وراهم ديب فليزر يا معلم وتجيبة بالتقسيط كمان . اللهم لا شماته .

الأحد، 21 أغسطس 2011

ماتخدش في بالك ... الحلقة الثانية عشر






 *سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .






( الحلقة الثانية عشر )
بعنوان

دا موسم إيه ؟
***

 *مش عارف بصراحة مين اللي أول من قال " إن مصر أم الدنيا " وبني كلامة دا علي أي أساس بس دا ما يمنعش إننا فرحانين بالمسمي ده وبنردده علي طول ممكن علي شان الدنيا فيها أربع مواسم بس وإحنا عندنا في الشهر الواحد أكتر من موسم ؟ يعني عندك في رمضان تلاقي موسم المساجد وموسم البياعين علي إختلاف السلعة وموسم العزومات وموسم السهر وموسم المسلسلات والبرامج وخد عندك بقي ما تعدش في غير رمضان طول السنة عندنا مواسم مواسم مواسم بس يا تري إنت بتحب موسم إيه ؟؟؟