الثلاثاء، 28 أغسطس 2012

عقاب جماعي

 * علي شان الكتابة الساخره من غير سقف فأتمني إن الكتاب الكبار يجتمعوا ويتفقوا مع مقاول كبير ومحترم يصب سقف بس يكون سقف عالي محدش يعرف يقرب منه ولازم يكون متين علي شان يستحمل ومايعملش زي العماير اللي كل سوية نسمع عنها إنها بتقع وخصوصا في اسكندرية  اللي قال عنها عمنا " احمد فؤاد نجم " عشقت بحرك وغرقت فيكى / وصبحت عندك ف العشق حالة /و سمعت منك و عشقت بيكى /وعجبنى قربك على اى حالة " مدينة عمنا الساخر العظيم جلال عامر اللي من كتر الإبتذال اللي الناس بتستخد بيه الكلمة قال : " اشتمني بأمي وماتقولش عليا كاتب ساخر " طبعا لا عاش ولا كان اللي يقدر يقول نص كلمة علي عمنا جلال – الله يرحمه – بس الإبتزال بقي في كل حاجة مش في الكتابة بس بقي في كل حاجة من حياتنا ومافيش حاجة بتتسمي باسمها دلوقتي وبقي الموضوع عادي جدا وعلي شاشات التليفزيون في الاعلانات لدرجة إن بعض الشباب بوكسراته أغلي حاجة في هدومة وطبعا لازم يبقي ماشي بيها وهي باينة وعلي شان كده البناطيل بقت للركب علي رأي عمنا نجيب الريحاني " الشيء لزوم الشيء " اللي استخدمها دقدق والهلال والنجمة اللي استفاد كتير جدا من خبر تمويله لنادي الزمالك واللي محصلش بعد كده ، ولان البنات أساس كل مصيبة وبلة في البلد فبالتأكيد هما السبب الأول والرئيسي في انهيار المنظومة الكروية في نادي الزمالك وكان لازم الشباب ياخدوا منهم وقفه و يعملوا معاهم الصح في العيد في كل الشوارع والميادين في ظاهرة تحرش جماعي في أحد أهم المناسبات الدينية علي مستوي العالم الاسلامي واللي استخدمه حزب الدستور علي شان يخلط الدين بالسياسة ويوزع منشورات ! علي شان يعلنوا عن الحزب وبداية العمل في المجتمع المدني مع إن معلوماتي عن المنشورات بتبقي في مواجه الإحتلال بسب الفرض الأمني اللي بيفرضة العدو أو في حالات التضييق الأمني ولأننا مش محتلين ومافيش أمن أصلا فالطبيعي إن الناس كلها تشتغلي في النور إلا هواه العمل في الضلمة اللي مابقيناش نقعد فيها اليومين دول زي الأول بعد لما الكهرباء مابقتش تطقع زي الأول بس ياتري دا راجع لتحول الأحوال الجوية والناس بقت تشرب ميا فبتفرق معاهم عن أيام رمضان اللي كله كان صايم ومأنتخ ولا الأدارة عندنا اتحسنت فجأة ! علي العموم البلد دي مش محتاجة مساعدات من حد ولا عطف بس هي محتاجة ناس بيخافوا عليها بجد ومسئولين عندهم من الخيال والطموح والحلم اللي محدش يقدر يصدقة ويبان في خطط تنموية حقيقة للبلد مش لفئة معينه وشجاعة في اتخاذ القرارات الحاسمة في وقتها قبل فوات الأوان وقفل حنفية السرقة والاختلاس والمحسوبية والرشاوي وصاحب الكفاءة يلاقي شغل محترم بمرتب محترم ولا هي الوزارات بس اللي بيمسكها الكفاءات .

الأحد، 26 أغسطس 2012

ياللي ما نتيش غرمانة


حتي بعد قيام ثورة يناير المجيدة لسه علي شان تحلم يبقي لازم يكون معاك فلوس أو واسطة ودا راجع إن لسه التغيير الجذري اللي كل الثوار حلمه بيه مش سهل يحصل قبل عشرين او خمسة وعشرين سنة – ربنا يدينا ويديكوا طوله العمر – ولأن مافيش حاجة في البلد دلوقتي ثابتة علي حلها تهنا بين الشرعية والشريعة والشعرية ولأن ديما بيتم إختيار الحكومة من الكفاءات الوطنية طلب مننا  رئيس الوزراء إننا نقعد كلنا في اوضة واحده ونلبس ملابس خفيفة واللي يعيا يموت علي شان المستشفيات مش متأمنه كويس وفي حوادث هجوم وسرقة بتحصل للمستشفيات والشرطة مش عارفين راحت فين ؟ وبسبب حاله الانفلات الأمني اللي بتمر بيها البلد سواء كانت عن عمد أو عن سوء إدارة والنيل عمال يستهبل ويصب في البحر قررت الدول المطلة علي حوض النيل إنها تنتهي من بناء السدود في اسرع وقت ممكن بمساعده الصين اللي الرئيس المنتخب عاملها زيارة وكان لازم يتم تأمين الزيارة علي شان سعاده وأكيد هو زي أي رئيس مصري مستهدف من أعداء البلد في الداخل والخارج فكان لازم من تكريم اللواء حمدي بدين وتعيينه ملحق للشئون العسكرية في الصين ولأن الربا حرام ومشروع الرئيس إسلامي والجماعة انتقدت الجنزوري مرارا وتكرار كرمه الرئيس وقرر إنه يجيب القرض بداله في مشروع النهضة الإسلامي ! وعلي شان كده قرر مسؤلي ماسبيروا عدم إذاعة الأغنية العظيمة لموسيقار الأجيال عبد الوهاب " النهر الخالد " واللي هي من كلمات أمير الشعراء أحمد بيك شوقي وزيها برضوا أغنية " أنا حر " للمطرب عمرو دياب لحد مايطلع آخر واحد في السجون العسكرية وعلي شان مافيش ثورة بتنزل الشارع بتقول علي نفسها ثورة كان لازم نشوف الهرج والمرج اللي حصل يوم 24 أغسطس واللي بتحمل مسؤليه المشاجرات وزير الداخليه علي شان المفروض إنه عنده خلفيه إن في ناس نازلة ولازم يأمنها مهما كان توجهاتهم الفكرية أو آرائهم الرجعية وشخصياتهم .

السبت، 25 أغسطس 2012

دفعة 2012 ... وداعا


 *علي الرغم من حبي لمادة الدراسات الإجتماعية بس علي مدار دراستي ليها من رابعة ابتدائي لحد تالته اعدادي عمري ما جبت فيها الدرجة النهائية والمادة الوحيدة اللي جبت فيها الدرحة النهائية كانت علم النفس في تالته تانوي وكانت اختياري بالمناسبة وكان تالت اختيار ليا في رحلة التعليم المدرسية وقبل دخول الكلية ، وفاكر إن أول اختيار ليا كنت في حوالي تانية ابتدائي أو تالته لما دخل هلينا مدرس رياضة يغششنا في امتحان العربي وكنت حليت السؤال اللي بيغششهولنا وكان كاتب إجابة غلط فرفعت إيدي وقولتله الإجابة دي مش صح وأول ما سمع كده ولا فرق معاه إنه بيكلم طفل لسه 9 سنين ونسي إن الأطفال أحباب الله وعينك ماتشوف إلا النور يامعلم ومن ساعتها قررت إني ما احتكش بأي مدرس ولا أعترض علي أي معلومة بيقولها حتي لو كانت مليون في المية غلط وأنا متأكد منها مدام في الآخر الكل بينجح .
وكان الإختيار التاني إني اكمل علمي رياضة رغم إني مجموعي كان قليل في تانية ثانوي بسبب اللغات مع إني مراجع مع مدرسين المادتين دول وقالولي إنك هاتجيب درجة بنت حلال بس للأسف الشهاده كان ملعوب في أساسها ومن ساعتها قررت إني أبطل أراجع أي امتحان أدخله لحد يومنا هذا .
وعلي شان الثانوية العامة سنة 2008 كانت مجزرة بكل ماتحمله الكلمة من رعب وأكشن وخصوصا لطلبة علمي رياضة كان من الطبيعي إن هندسة تنزل مرحلة تانية وكنت عدلت من مجموعي في سنة تالته بسبب علم النفس والمستوي الرفيع وكالعاده في التنسيق الإلتكروني كان لازم أكتب أول حاجة الكليات اللي فاضلة من هندسة وبعديها حاسبات وبعديها تجارة وبعديها آداب وبعد كده علوم – اللي ماكنش عاوز اكتبها أساسا بس الرغبات كتير وعاوزين نملا خانات وخلاص وبالصدفة لاقيت " كلية الزراعة قسم الهندسة الزراعية " ولما سألت ابن خالتي قالي دي كلية الزراعة سيبك منها . قولتله : حطها كده كده مش هانخسر حاجة واحنا بنملا رغبات مش اكتر وفعلا حطها وخلصنا الرغبات وكنا مستنين النتيجة ، وقبل ما مرحلة التقديم تخلص كنت مع واحد صاحبي في جامعة عين شمس وفي كلية العلوم اللي مش طايقها من كتر اللي سمعته عنها علي شان يغير رغباته أو يغير رغبات حد تاني أو حتي يطبعها مش فاكر ولا هو كمان فاكر دخل ودخلت يعدل ودخلت كمان قولت بالمرة أطبعها وأول ما قعدت علي الكمبيوتر مش عارف إيه خلاني أجيب " كلية الزراعة شعبة الهندسة الزراعية " في الأول وطبعت الورقة ورحنا رايحين نسأل علي الكلية ونزلنا من المترو ودخلنا الكلية وكان أول مرة نشوف فيها حديقة عامة في الحقيقة كلها زرع وشجر وخضرة وورد المنظر من المترو وانت معدي علي الكلية تحفة وأول مرة تدخل فيها الكلية تحش براحة غريبة بس لما تدخلها بعد كده تحس إنك عاوز ترجع أساسا بس ماعلينا النتيجة طلعت خلاص وجاتلي الكلية وكانت صدمة في البيت طبعا علي شان نسيت أقولهم إني عدلت الرغبات وكلهم بلا استثناء حاولوا يقنعوني إني أحول وادخل تجارة علي شان أبقي زي ولاد خالاتي علي الأقل هلاقي شغل لما اتخرج لو مافتحوش مكتب هايبقي عند حد حبيبهم وأنا راسي وألف جزمة إني ما عملش اللي هما عاوزينه وركبت دماغي وأصريت إني أدخل الكلية اللي معرفتش ادخلها أول يوم علي شان نسيت بطاقة الترشيح وكلمت واحد من المفترض إنه كبير في الكلية قالي مش هاقدر اعملك حاجة ودخلت الكلية تاني يوم بعد ما جبت معايا بطاقة الترشيح وكنت معرفش حد في الترم الأول إلا ناس قليله أوي في الدفعة وفي الكلية كلها وكنت ديما بحضر وبكتب المحاضرات وأبيضها وناس كتير في الدفعة عرفت اسمي من قبل ما تشوف شكلي اساسا علي شان كنت ديما بمضي في آخر كل محاضرة وبحط رقم تليفوني وكنت مترتب علي الدفعه في سنة أوي وكان نهاية الترم التاني في سنة أولي اتعرفت علي معظم الدفعة تقريبا واتعرفت علي ناس كتير من الكلية وابتديت سنة تانية بسكل تاني وكنت واحد من ستة ما بيمشوش علي الأرض – حسب كلام بعض الناس – وعملنا أسرة المهندس وكنا علي طول قاعدين فيها ولا بنطلع محاضرة ولا بندخل سكشن إلا لما يجلنا مزاج وزادت معرفتي بالناس أكتر وزي ما بيقولوا التالته تابته ومايقعش إلا الشاطر اتكعبلت في سنة تالته علي الرغم من إني غاشش ومغشش والورق كله كان زي بعضة بس من ساعتها قررت برضوا إني ما اتعاملش مع أي دكتور إلا في أضيق الحدود وكانت سنة تالته انفراجة للدفعة بتاعتنا تقريبا كلها بقت مفتوحة علي بعض وكل النس بتقعد مع بعضها ومش شلل زي ماكنت في السنتين اللي فاتوا وساعتها كان قلبي بيقوم بوضيفة تانية غير وظيفته الحيوية وكنت بعيد إكتشاف الطبيعة من تاني وكان لازم أحطط خطوط عريضة للموضوع دا وكان لازم أروح أكلمها وطبعا ولا اتكلمت ولا نيلة وفضلت اتهته بس هي اكيد فهمت وقالتلي آخر يوم في الامتحانات إنها مش بتفكر في الموضوع خالص وتعدي الأيام والنتيجة تطلع وهما يطلعوا سنة رابعة وأفضل في تالته زي ما أنا ونفضل مع بعض برضوا في فرح في عزا في عزومة في خروجة لحد ما عدت سنة وخلاص اتخرجوا وفضلت في الكلية  ، وماكنش ينفع اسيبهم كده يمشوا من غير ما اوجهلهم رساله شكر اللي لسه بشوفهم واللي مابقتش أشوفهم علي شان بجد استفدت منهم كتير أوي وبدل ما أودعم لازم أشكرهم ... دفعة 2012 ... شكرا ، وربنا يوفقكوا في حياتكوا الجاية ويارب نفضل فاكرين بعض بالخير .

الجمعة، 24 أغسطس 2012

الفهيم وعمو السواق (2)


 * مغامراتي مع السواقين مش في الصعيد بس أبسولوتلي في كل مكان روحته تقريبا كان في مغامرة أو حكاية مع السواق بس أنا بحكيلك علي اللي فاكرة إنت عارف عقل الواحد اليومين دول مش في وزيم اقال عمنا نجيب محفوظ " إن آفة حارتنا النسيان " ضحكتنا وقولتله طب كمل يا عم نجيب قصدي يا عم الفهيم .
(3) اتوبيس مطروح
زي ما انت عارف إن أكتر مكان روحته في مصر هو مرسي مطروح حتي إني روحته في سنة مرتين وطبعا كل مرة مع سواق شكل بس السواق اللي مش هنساه وخلاني صاحي طول السكة ومغمضش عين علي الرغم من إني كنت مطبق وسهران طول الليل كنا راجعين من وكنا في رمضان بس لمحت حاجة في بق السواق افتكرتها سيجارة وإنه فاطر كعاده بعض السواقيين مابيبقوش صايمين ولما دققت النظر أكتر لقيته عود كبريت ! وكان كل شوية يمسكه ويسلك سنانه بصيت علي العداد لقيته مكسور والسواق شارخ بينا وكنا طيرين علي الطريق السريع وكان اتوبيس كبير من عربية صغيره ولا حاجة بس السواق ايه مايتوصاش وصلنا تقريبا في 6ساعات ونص ولا حاجة وكان كل شوية يسيب الدركسيون ويقعد يهرش في جسمه كله ! وكل الاتوبيس نايم ولا دريان بحاجة وعلي شان بحب أقعد قدام كنت حاطط ايدي علي قلبي ليحصلنا حاجة بس الحمد لله ربنا سطرها ووصلنا بالسلامة .
(4) تاكسي العباسية
كنت في العباسية ومعايا حاجات وكان لازم أروح بيها شبرا وكان لسه المترو الجديد مافتحش قولت هاركب تاكسي وقفت سواق وحطيت الحاجة في التاكسي ورحنا ماشيين وبعد التعارف واللذي منه لقيته بيقولي لو كنت اعرف إن معاك الحاجت دي كلها ماكنتش وقفتلك . قولتله : ليه بس كده ياسطا ؟ قالي : إنت مش شايف العربية مرفوعه إزاي ؟ قولتله : ياسطا كان معايا حاجات أكتر من كده امبارح والسواق ماقلش حاجة . قالي : هاتلاقيها مش عربيته وشغال عليها إنما دي عربيتي وأخاف عليها زي عينيا جايبها من حر مالي وفاتح بيها بيت فلازم أخاف عليها علي شان مستقبل ولادي أصلي عاوزين يتعلموا ويبقي معاهم شهادات بنتي الكبيرة في رابعه ابتدائي وابني الصغير لسه هايدخل املدرسة السنة الجاية حتي بص علي الورقة دي هتلاقي فيها أسامي كتبات خارجية البنت عاوزاها هاوصلك واروح اجبهملها وانا بعد كده لو الحمولة اللي هاتطلع العربية مش قدامي مش هقف للزبون . قولتله : عندك حق ياسطا شوف حمولتلك قبل ما تطلعها العربية و ربنا يخليلك ولادك . وكنا خلاص وصلنا واديته الفلوس اللي اتفقنا عليها وقولتله تشكر ياسطا . قالي : تحت أمرك يا ذوق .
(5) العباسية تاني
ومرة تانية كنت في العباسية مع اتنين زمايلي وكنا رايحين شبرا برضوا زكان معانا حاجات بس خفيفه خالص بس ماكنش ينفع نركب بيها المترو فوقفنا تاكسي وانطلقنا وكان أول مرة سواق يسألنا عاوزين تمشوا من أنهي طريق ؟ قولتله : إنت اللي في الشارع علي طول وعارف أنهي طريق هاينجز معاك وبعد خمس دقايق كده لقيناه بيفتح موضوع وبيكلمنا في السياسة وكنا ساعتها بعد استفتاء 19مارس العقيم وقعد يقولنا ان المرشح الرئاسي المحتمل هو الافضل علي شان عنده خلفيه ساسية كبيرة جدا وفلان ماينفعش وطلع القطط الفطسانه فيه وراح سألنا : وانتوا بقي هاتنتخبوا مين ؟ . قولتله : لما يفتح باب الترشيح ان شاء الله ونشوف البرامج . راح مكمل : في حد فيكوا هاينتخب البرادعي ؟ . وانت عارفني بردعاوي قديم بس ماحبتش أقوله حاجة علي شان أعرف هايقول إيه علي الراجل وبصيت لصحابي وهما كمان بصولي وضحكنا ، راح مكمل الراجل : البرادعي دا هو اللي دمر العراق وممول من امريكا جاي يخربها ويقعد علي تلها . قولتله علي فكرة البردعي قال قي مجلس الأمن إن العراق مافيهاش أسلحة دمار شامل واحنا لسه بندور قبل ما بوش يضرب باسبوع وعلي شان كده خد جايزة نوبل واترشح آخر دورة في وكالة الطاقة الذرية وأمريكا مدعمتهوش ودعمت مرشح تاني وفاز الدكتور البرادعي وبعدها ماسمعتلهوش صوت غير وهو بيقولنا : حمدالله علي السلامة .
(6) مطرية مطرية مطرية
كنت رايح ميدان المطرية وقولت بدل ما أروح بالعربية والطريق زي الزفت وزحمة هاركب اتوبيس التباع حمل ومشينا وبعد شوية الاتوبيس بقي علي اخره ومافيش مكان لرجل والسواق ركن علي جنب علي شان ناس تنزل وست كبيرة سندت علي شابه صغيره وعينك ماتشوف الا النور ردح لبعض وشتايم والناس تهدي فيهم أبدا راح السواق ضارب فرامل مرة واحده وراح قايملهم : إيه يا مرة يا ( ل --- ) منك ليها اللي هاسمع صوتها منكوا تاني هاطلع ( --- ) أمها وهارميها برا العربية ماتكفروناش بقي وخلي الليلة الغبرة دي تعدي علي خير ودا طبعا غير كمية الشتايم اللي قالها لانه فضل حوالي عشر دقايق علي النظام دا تخيل الواحد بيسمع الكلام دا وكان قرفان من نفسه إنما هو واقف عمال يقوله عادي جدا وبعد ماخلص الوصلة بتاعته هو كمان كان الاتوبيس فعلا سكت راح وقعد علي الكرسي وتقف من الشباك وقال : " استغفر الله العظيم يارب نسوان بنت ( م ----- ) وكمل سواقته لحد ما وصلنا وحمدت ربنا إني نزلت .
وسمعنا الباب بيخبط وبعد كده اتفتح وكانت مراته مشكاحة داخله علينا بصينية الشاي .

الخميس، 23 أغسطس 2012

الفهيم وعمو السواق (1 )

 * كنت في مشوار في وسط البلد وقولت بعد لما أخلص أروح طالع علي عمنا الفهيم أشرب معاه الشاي . المهم لما خلصت الحاجة اللي كنت بعملها ودخلت المترو علي شان أروح لقيت أمه لا اله إلا الله واقفه مستنية المترو سألت واحد هو بقاله قد إيه ما جاش ؟ قالي أنا بقالي عشر دقايق واقف ولسه ماجاش وفي ناس واقفة من قبلي !!! وطبعا لو وقفت استني الومحطة بالمنظر دا والمترو مش مضمون هايجي إمتي أساسا ولا إيه ظروفه لو جه وهايبقي شكله عامل إزاي روحت خارج من المحطة وقولت أركب تاكسي أو ميكروباص أو حتي أتوبيس الهيئة أي حاجة ألاقيها في وشي وبعد شحططة المواصلات وبعد ما اتصلت بعمنا الفهيم وعرفته إني جاي وصلت اخيرا وهدومي غرقانة في العرق وتتعصر عصر ومش طايق نفسي اتصلت بيه علي شان اعتذر بس لقيت عنده إصرار غريب إني لازم أروحله قولتله إنت حر بقي وطبعا اول ما وصلت معرفش ياخدني بالحضن علي شان العرق اللي بعوم فيه سلمت عليه ودخلت وقالي مالك كده ؟ شكلك قضيتها مواصلات لحد هنا . قولتله : ايوا يا سيدي وشوفت بشر مايعلم بيهم إلا ربنا وسواقين لبشتيمة في بقهم زي نضغ اللبان هو مافيش سواقيين عدله ولا إيه ؟ رد عليا وهو بيضحك قالي : يابني في كل مهنة في الحلو والوحش بس اللي زي حلاتنا بيبقي فقري ديما بيقع مع الوحشين هدي نفسك كده وهايقولك علي شوية مواقف حصلت معايا من سواقيين
(1) بيجو الأقصر
كنت وسته من زمايلي في الجامعه بنشتي في الأقصر وأسوان وفي ليله قررنا إننا مانرجعش مع الاتوبيس علي شان هانشتري حاجات وعاوزين نتمشي في البلد شوية ما أحنا مش كل سنة موجودين هنا في الوقت التحفة دا المهم ياسيدي الساعه عدت فعلا الوقت المحدد للرجوع والاتوبيسات مشيت وكان لازم نروح بعد لما لفينا في البلد وتعبنا وفلوسنا خلصت من الحاجات اللي اشتريناها بس احنا سبعة ومافيش تاكسي هايخدنا كلنا ماقدمناش غير اننا بقي ننقسم علي تاكسيين او يتجلنا بيجو سبعة راكب – وهما كتير في الأقصر – ومافيش عشر دقايق إلا ولقينا بيجو جاي وفاضي وقفناه وعرفناه احنا رايحين فين وافق وركبنا والراجل قعد يرحب بينا وأهلا بيكوا ومنوين البلد ومعرفش ايه وراح طالع علي المسرح وابتدي يحكلنا حكاياته ومغامراته الجنسية ! وقد إيه هو بيعشق حريم مصر وبناتها وبيستمتع معاهم أوي وكل مانحاول نغير الموضوع يروح راجعله تاني وعمال يحكي ويتكلم وعرفنا إنه مفكرنا جايين من الهند وراكنين الفيل في المكان اللي رايحنله وسبناه يحكي مع نفسه لحد ما وصلنا .
(2) نص نقل إثنا
كانت تاني مرة أروح فيها الصعيد وماكنتش فسحة المرة دي قد ماهي كانت عمل خير كنا قاعدين في الأقصر وبنروح كل يوم لإثنا بعربيات نص نقل أو بالمعني الأصح " عربيات غير آدميه " تحس غنك قاعد في بوكس مش عربية أساسا المهم كان قدري ياسيدي في مرة من المرات إني أقعد جنب عم " توكل " السواق اليوم من أوله واحنا رايحين وبرضوا واحنا راجعين وقعدنا نتكلم عادي والتعارف الطبيعي وإننا من مصر ومن المناطق الفلانية ومعانا ناس راكبة في العربية من ورا من المناطق الفلانية وقعد يحكلنا عن ذكريات الجيش بتاعته وانه كان شغال سواق خصوصي لرتبة كبيرة في الجيش وكان ساكن أياميها مع واحد قريبة من مصر وكلمنا إنه الرتبة دا ماكنش بيشرب حشيش إلا لما يكون هو اللي شرية ولففهوله كمان ! وازاي في مرة كان مروح متاخر بالعربية الميري واستخدمها وخد واحده فيها من بنات الليل وعمل معاها الصح في العربية وحكلنا عن مدرس مابيعرفش يدخل الفصل ولا يشرح كلمة للعيال إلا لما يبقي عامل الإصطباحة بتاعته وكنا بالصدفة ليلة الخميس راح مطلعلي شرايط برشام وورهالي وقالي بص دول لناس حبايبي رايحلهم بعد ما نوصلكم بالسلامة علي شان يعملوا الصح . قطعت كلامه وقولته واضح إن كل سواقين الصعيد او معظمهم الجنس واكل دماغهم اوي تعالي مصر بقي ولا انت كل مغامراتك خارج القاهرة .