* لعبة الأرقام بتلعب دور كبير أوي في حياة ناس كتير مننا ، يف ناس بتعتقد إن حظها في رقم معين ! وبيتشائم من رقم تاني ! وممكن الموضوع يوصل لخناقة بين اتنين اصحاب علي شان رقم ! وتقريبا معظم الناس بتتشائم من رقم " 13 " مع إني بحب الرقم دا جدا ودا طبعا علي شان اللاعب " مايكل بالاك " نجم المانيا ، بس ديما بيبقي أهم رقم في حياة كل واحد مننا هو رقم " 1 " أو بمعني تاني ممكن نقول عليه " المرة الأولي " لأن تقريبا المرة الأولي ديما بتفرق في حاجات كتير .
وعلي المستوي الشخصي المرة الأولي تحتل مكانة خاصة وتقريبا فاكر حاجات كتير أوي من المرة الأولي في معظم الحاجات اللي عملتها يعني عندك مثلا معظم أصحابي فاكر المرة الأولي اللي شفتهم فيها وكمان فاكر شكلهم كان عامل إزاي في المرة دي وفاكر أول مرة دخلت فيها جامعة شمس كانت أيام التنسيق الإلكتروني قبل دخول الجامعات وعدلت ساعتها الرغبات والتعديل دا هو سبب دخولي كلية الزراعة واللي فاكر أول مره روحتها بدل ما أمشي يمين مشيت شمال وبعد ما دخلت وسألت ركبت المترو في اتجاه شبرا مع إني المفروض أركب في اتجاه الجيزة علي شان أروح وفضلت محبوس في المترو لحد ما السواق غير القضبان ودي طبعا كانت أول مره أركب فيها الخط الثاني " الجيزة – شبرا الخيمة " وفاكر أول مره قريت فيها كتاب كنت واخده من واحد صاحبي وكان كتاب سياسي وكان بيتكلم عن الإعتصامات اللي حصلت في البلد من أول إعتصام لحد صدور الكتاب بس للأسف مش فاكر اسمه وفاكر أول محاضرة حضرتها كانت محاضرة ميكانيكا وفاكر حتي اللي كان قاعد جنبي ساعتها " أحمد مجدي " وفاكر أول مقال كتبته وكان النور قاطع ساعتها وكتبته علي ضوء شمعة ! والمقال دا لسه مشفش النور ساعتها – ممكن علي شان كتبته في الضلمة – وفاكر أول مره دخلت فيها مبني الاتحاد علي شان أعمل إنتر فيو علي شان معسكر إعداد القادة بمطروح وكان دا أول معسكر طلعته وفاكر أول أغنيه سمعتها لفيروز وكان اللي بيغنيها حماقي وبعد كده قررت إني أسمع فيروز وفاكر أول ساعه لعبتها وساعتها كسبنا " 4-3 " وضعيت في الساعة دي بلنتي ! وفاكر حاجات كتير أوي بس بدل ما تزهق أكتر من كده بعد ما قولت ياعم وأنا مالي ومال أول مرة إنت عملتها بس أنا حبيت أقولك إني فاكر حاجات كتير أوي من أول مره عملتها ياتري إنت فاكر بقي أول مرة عملت فيها أي حاجة جديدة ؟ ولا إنت أي حاجة مش فارقة معاك ؟ ولا أنت ما بتعملش أي حاجة جديدة أصلا ؟ دا أنا نسيت أقولك أول جرنال إشتريته ! ياريت لو تفتكر أول مره في أي حاجة في حياتك وتمشي وراها وتشوف طريقة تفكيرك فيها وطريقة تفكيرك دي وصلتك لإيه ولو كانت طريقة التفكير غلط ! مش عيب إنك تغير طريقة تفكيرك بس العيب بعد ما عرفت إن في حاجة غلط وما تصلحهاش ولو مش عاوز تصلح اي حاجة ما تتعبش نفسك وتفتكر أي حاجة .
* وخليك فاكر إن المشكلة في طريقة تفكيرنا يعني ضلمة الليل ما اتغيرتش بعد لما حبيت بس طريقة تفكيرك فيها ماخلتكش تحس بيها يعني إحنالازم نعدل تفكيرنا .
ليست هناك تعليقات:
إرسال تعليق