*للأسف دخلت البيت متأخر وسمعت الخطاب الأول للمشير وطبعا كان لازم أشوفه من الأول وبعد ما شفته جه في بالي حبه حاجات كده من الخطاب وكله ع الماشي أصلي ماركزتش في الخطاب قوي بصراحة فلو نسيت حاجة ياريت تقولوهالي يالا بينا .
- المشير زعلان علي ضحايا ومصابي الأحداث الحالية يا أخي كنت قول شهداء وأضحك علينا .
- المشير بيقول : " لم نطلق الرصاص علي صدر مواطن مصري " ما أنتوا بتضربوا في العين يا برنس وبعدين أحداث ماسبيروا دي ماكنش فيها مصريين ؟ .
- المشير بيقول " هدفنا الأول إعاده الأمن للشارع المصري " فين الأمن دا ياكبير ؟ وكانت فين الشرطة قبل ماتطلع في الميدان ؟
- ليه ياعمنا بتلعب علي عجلة الإنتاج من أول خطاب كده أمال الخطاب الجاي هاتقول إيه ؟
- لما أنت عارف إن في قوي بتعمل في الخفاء علي إحداث الوقعيه ليه سايبهم ؟ مش من أمن المواطنين اللي قلت عليه قبل كده إنك تقبض عليهم وتفضحهم ؟ ولا هو كلام في الهوا وخلاص ؟
-بالنسبة لموضوع الإستفتاء دا بقي بجد بجد دي جديدة وطبعا نتيجة الإستفتاء موجوده يف درج المكتب من قبل ما يتعمل بس أحب أقولك إنه مش هايتعمل ماتقلقش مش هانتعبكم في تأمين استفتاء أنتوا فاضيين بقي مافيش وراكوا غير الإستفتاءات ولا إيه ؟
- طب بالنسبة للداخليه إيه موقفها من الليلة دي ؟ يعني هاتكمل ولا هاتروح لحال سبيلها واللي حصل في التحرير دا إيه موقفة هو كمان يعني هانعرف مين السبب ولأ ؟
- وطب والشهداء قصدي الضحايا اللي حضرتك ذكرتهم في الخطاب إيه موقفهم هما كمان ؟ والدم اللي سال علي الأرض دا ؟ بس كنت عاوز أسال سؤال هي لجنة التحقيقات بتاعة فض إعتصام طلبة كلية الإعلام وصلت لنيجة ولا لسه بتحقق ؟؟؟ دا مجرد سؤال
-وكل الكلام دا طبعا يدخل في أختلاف وجهات النظر اللي حضرتك قلت عليه في الخطاب .
وزي ماقولتلك لو عندك حاجة أنا نسيتها ماتبخلش بيها عليا وإن شاء الله أوعدم إني هاشوف الخطاب تاني .
ليست هناك تعليقات:
إرسال تعليق