بتحاكموا الريس ليه ؟
بالذمة دا برضوا كلام
بعد تلاتين سنة
تشحططوه في المحاكم
وسين وجيم
ومنين وفين
وإزاي وليه ؟
الرآي العام والجرايد تتكلم
وسيرته تبقي علي كل لسان
بالذمة دا برضوا كلام
**
يعني إيه ؟
اللي انتوا بتعملوه
بقي في حد بيحاكم أبوه
ولا هي قلة الأصل داء
وإيه الدواء ؟
حرام عليكم بقي سيبوه
**
بقي أنت زعلان
علي شان سيادتة بتحاكم
وتقولي قال بيتمرمط
في المحاكم
الي زي دا عمره ما شاف مرمطه
بقالوا تلاتين سنه حاكم
طول عمره بيقول
نعم وحاضر ومن عيني
وصدع دماغنا إنه بطل السلام
وهو أصلا لو ماما أمريكا
أمرته ... في ليلته
ما هايقدر ينام
وتقولي
بالذمة دا برضوا كلام
**
مش هاقولك
وأحكي تفاصيل كتير
أصل اللي غرق في العبارة
كانوا كتير
والي أتحرق
في قطر الصعيد في العيد
هما كمان كانوا كتير
واللي كرمتهم اتهانت
كانوا أكتر
وعن أمن الدولة أنا مش هاحكي
دا مصايبة أكتر وأكتر
وتقولي
دا برضوا كلام
**
وبعدين مش هانروح بعيد
كل حاجة بالقانون
مش دا برضوا كلام سعادته
لشعبه المصون
والبلد فيها دستور
واللي عامله اساتذه قانون
**
دستور متفصل إنما إيه
شياكة وأناقة ياعيني عليه
والشعب داير زي اللي اسمه إيه
بيدور علي اللقمة الحلال
وطالع حبابي عنيه
داير في ساقية
ومغمي عنيه
خايف ياكلم لولاده
يتيتموا ويضيعوا بعديه
**
عرفت إية هو الكلام
تغيير ،،،
حرية ،،،
عدالة إجتماعية ,,,
وسيادة القانون
وهو دا أول الكلام
ليست هناك تعليقات:
إرسال تعليق