الفهيم ويوم الجمعة

 *ما تحلاش صلاة الجمعة طبعا غير ما عمنا " الفهيم " وفي الجامع اللي يختارة كمان ، والمقابلة بتكون في المكان اللي بنتفق عليه في التليفون قبلها ونخرج بعد ما كل واحد ياخد الحماية الوحيدة المعترف بيها في بر مصر كله ومش عارف ليه تقليعة الجلابية البيضاء بس ماعلينا نضرب الطقم الأبيض وننزل نروح نصلي وبعد الصلاة لازم نطلع علي أقرب محل فول وطعمية علي شان نجيب الفطار – تحس إن الجمعة دا موسم بالنسبالهم – وكل واحد يروح ونتقابل علي العصرية كده نتغدي سوا أو باليل ونسهر سوا بس النهاردة لما اتصلت بيه علي شان نتفق علي الجامع اللي هانصلي فيه لاقيته بيقولي " ماليش مزاج الجمعة دي " استغربت وبصيت في التليفون وشوفت الرقم هو رقم الفهيم بس كلامة غريب المرة دي روحت قايله : يعني إيه مالكش نفس قالي عادي يعني نعمل مرة زي الناس اللي بتفضل نايمة أو بتعمل أي حاجة لحد ما تسمع الخطيب بيدعي ونروح نازلين نصلي ونجرب الإحساس ده . قولتله : ودي تبقي صلاة جمعة بذمتك ياشيخ . قالي : مابصراحة في حاجات كتيرة أوي بتحصل بتضايق الواحد في مساجد كتيرأوي قولتله : زي ايه ؟ قالي خد عندك يا سيدي " مرة الإمام يجي متأخر أوي والناس تبقي محتاسة مش عارفة تعمل ايه ، ومرة يكونوا معليين المكنة علي الآخر وتصفر من الشيخ اللي بيخطب ومرة المؤذن بيأذن قبل ما الخطيب يقول : " السلام عليكم ورحمه الله وبركاته " وساعات بينسي يديلة الميك علي شان يخطب وكل دا كوم الخطيب دا كوم لوحده خالص . قولتله إزلي يعني ؟ قالي : يعني ساعات بيطلع ناس علي المنبر ماينفعش يقعدوا في قعده بلدي ويتحكموا فيها فما بالك بخطبة جمعة قولته : والله عندك حق دا حتي خطبة الجمعة بقت عند كتير من الناس مشكلة علي شان الخطيب اللي هايروحوا يصلوا وراه ويسمعوا منه كلمتين عدلين في الزمن اللي احنا فيه ده بس دا مش سبب إنك تنزل متأخر ومايكونش ليك مزاج علي شان ثواب إنك تنزل الجمعه بدري ثواب كبير قالي " إنت هاتعملي فيها شيخ ؟ قولتله : ما أنت عارف إني ولا شيخ ولا حاجة بس إنت عارف إن في أحاديث كتير أوي عن يوم الجمعة منها ما رواه أبو هريرة – رضي الله عنه - أن النبي صلى الله عليه وسلم قال: خير يوم طلعت عليه الشمس يوم الجمعة فيه خلق آدم وفيه أدخل الجنة وفيه أخرج منها ولا تقوم الساعة إلا يوم الجمعة  .وفي أحاديث تانية كتير أوي يبقي ما ينفعش بقي ما تقوليش نفس وما تشغلش بالك باللي بينزل متأخر واللي بيفضل واقف في الشارع عمال بيتفرج علي اللي رايح واللي جاي وأول ما يقيموا الصلاة تلاقيه راح داخل يصلي وبعدين مش إنت ديما بتقول : " حاول تغير من نفسك الأول بعد كده اتكلم عن التغيير " ولا ايه يا عمنا قالي : عندك حق نتقابل بقي في نفس مكان المرة اللي فاتت .

* طبعا في حاجات تانيه كتير بنشوفها فياريت نحاول نغيرمن نفسنا علي شان نغيرها
a_mohmady@yahoo.com