من غير إجابة !

ساعات كتير بفكر

من غير ملاقي إجابة

وناس كتير بتقولي :

الدنيا بقت وحشة وكدابة

وماعدش صاحب يتصاحب

وكإننا عايشين في غابة

والبقاء بقي للأقوي

وكترت أوي الديابة

وأما أقعد أفكر في كلامهم

بردوا مالاقيش إجابة

ليه ناس كتير اتغيرت

مع إن الدنيا اتطورت

وبقي فيها وسائل رفاهية

وكل حاجة قربت

وبقينا من لمسة إيد

نقرب كل بعيد

ونطمن ع اللي عاوزينه

ونعيد عليه في العيد

بس كل الرفاهية

فهمنها غلط

بعدتنا أكتر وأكتر

وبقينا نكسل نطمن

لو حتي برنة تليفون

وحاجات كتير اتغيرت

حتي عنوان الكراكون

وبقينا بنلف في متاهه

لاليها أول ولا آخر

والكل بيفكر في نفسه

ولاهمه اللي حوليه

عايشين أو مايتين

أو حتي مش لاقيين

المهم إنه يعيش

والباقي يجي بقشيش

الطيبة خلاص اتغيرت

وبقت دلوقتي استغلال

حته النور ضلمت

وزودنا أوي الإستهبال

الجار مش عارف جاره

وساعات بيبقي في ضرب نار

الاتنين مابقوش طايقين بعض

واللي هايطول التاني

هايولع فيه بالنار

إزاي وليه كل ده

يحصل في طيبة

ماهي مصرزمان

كان كلها طيبة

وكل ناسها حبايب

وعاصمتها طيبة
وكل أهلها طيبين
وف وشهم الضحكة البشوشة
اللي دلوقتي إتغيرت
بالضحكة الصفرة وبالتكشيرة

دا مين اللي ليه نفس يضحك ؟

ما الضحكة الصافية اختفت

وأقعد أفكر في كل الكلام

وبرضوا ...

من غير إجاية