*نفسي أبعتلك جواب وأقولك فيه وحشتيني
دا إنت حلمي اللي ياريت يكمل نص ديني
مع إن معايا العنوان بالتفصيل ورقم التليفون
أخاف علكيي للجواب يضايقك وتجرحيني
عجبي !!!
--
* الـفـكـرة الـحـلـوة بتكون بسيطة
ولابتكون مـكـارة ولا حـويـطـة
فكرونفذ وماتخافش من أي نـقـد
هـتـلاقي حياتـك بـقـت سـعـيـدة
عجبي !!!
--
* متعلق في حبل دايب وخايق أقع
مع إن ياما كتير قبلي وقع
فيه اللي قام وفيه اللي مقدرش
هي كده الحياة لازم فيها نقع
عجبي !!!
--
* لو كنت فاكر إن المجلس تكية تبقي بتحلم
المصري خلاص فاق وقرر إنه يتعلم
لو كنت شفت منظرنا أمام اللجان كنت تعرف
إننا اختارنا الديمقراطية وهانرجع من تاني نحلم
عجبي
--
* لو كل يوم عملنا حاجة جديدة
هاتبقي حياتنا كلها فرح وسعادة
احلم بأمنيتك وحاول توصلها
وماتقلقش الأماني مش بعيدة
عجبي !!!
--
*عنوة أمل وسط الحظن بتريح
ولو فضفضت أكيد هاتستريح
بس ماتتمداش وتعمل فيها مجني عليه
وارجع اشتغل هتلاقي الحياة أريح
عجبي !!!
--
*كل يوم أصحي علي زقزقة العصافير
ألاقي روحي خفيفة عاوزة تطير
وألاقي همومي وقفالي تقولي : علي فين ؟
أقولها : علي شان أحلك لازم أطير
عجبي !!!
--
*حاولت أفهم لغة العيون تعبت
لأني لما شفت عنيكي دوبت
بس لما قولتيلي مش عاوزاك
زعلت في الأول ... بس فقت
عجبي !!!
--
*أنا قلبي ريشة في مهب الريح
من قوة الريح القلب بقي جريح
قصدت باب الكريم ودعيته
يارب تشفي قلبي الجريح
عجبي !!!
--
*حاجات كتير بتحصلنا ومابنخطرهاش
زي الأيام اللي لسه برضوا ماعشنهاش
الولادة والحب والممات وغيرهم كتير
فخد أمورك ببساطة وما تكلكعهاش
هناك تعليق واحد:
sooooooooo nice msA :) :)
keep it up :)
إرسال تعليق