بعيدا عن السياسة

*أصيب المجتمع المصري بحالة هلع شديدة جراء جرعة زادة من السياسة المصرية التي ضربت المجتمع المصري ليس فقط منذ إندلاع ثورة الخامس والعشرين من يناير بل من قبل ذلك حينما تطايرت أنباء عن سفر " بن علي " للسعودية ، المهم كان المصريين بعضهم متفائل وبعضهم متشائم وبعضهم مابيتكلمش وبيقولك " أنا ماليش في السياسة " وبصراحة أنا واحد من الناس اللي ماكنتش متوقع إن اللي حصل دا يحصل المهم كان عندي إمتحان يوم 29/1/2011 وطبعا ماكنتش مذاكر قوي علي شان كنت مشغل قناة الجزيرة ومتابع الأخبار وماكنتش اعرف إن الإمتحانات اتأجلت بسبب حالة الإنفلات الأمني اللي حصلت في البلد - ودا طبعا علي شان ما بتفرجش علي التليفزيون المصري – المهم وأنا رايح الكلية ركبت مواصلات عمال أراجع واقرأ في الورق علي شان اجمع كلمتين أروح أكتبهم في الإمتحان – منا معرفش إنه اتلغي لحد دلوقتي – والاقي الاتوبيس كله بيتكلم في السياسة ودا طبعا لأول مره تحصل إن الاوتبيس يشترك في الكلام علي حاجة واحده المهم عملت فيها من بنها وقعدت اقرأ الورق اللي معايا ونزلت في ميدان المطرية علي شان أخد الميكروباص لحد المظلات المهم لاقيت نفس الكلام بس المرة دي الصوت عالي بإعتبار إني الميكروبلص صغير وكل الناس بتتكلم روحت سايب الورق وفضلت أسمع للناس واللي عمالي يتكلم في ناس فاهمة هي بتقول إيه وناس بتتكلم لمجرد إنها تشارك في الكلام وخلاص المهم وصلت للكلية وعرفت إن الإمتحانات اتأجلت وروحت البيت وبعدها ولحد دلوقتي الناس عماله تتكلم في السياسة وأي كلام بيتقال ياعم الحج وحاجات غريبة بتحصل ومرشحين رئاسين غريبة الشكل والمضمون وكل يوم في جديد وكل شوية نفتح ملف قبل ما نقفل الملف اللي قبله ونقعد نتكلم ومجلس الشعب يعمل إستجواب لحكومة كامل الصلاحيات الدكتور الجنزوري والمجلس العسكري لسه الست شهور بتوع الفتره الإنتقاليه – من وجهة نظرة – لسه ما خلصوش وعلي حسب حسباتهم في الشهور يبقي مبارك ما حكمناش تلاتين سنة ولا حاجة ودا طبعا عدد الشهور العسكرية غير عدد الشهور المدنية يعني الست شهور العسكرية تعمل سنة ونص مدني واحسب يامعلم ، المهم بعد إرهاق فكري وعقلي ونفسي من تتابع الأحداث قررت إني أكتب بعيدا عن السياسة عن أي حاجة ممكن نقابلها في المجتمع المصري الذاخر بكل ما فيه من أمثال شعبية ونوادر وحكاوي وكلام قررت أكسر حاجز الملل السياسي اللي الناس ابتدت تدخل فيه برتابه فظيعة وممله وعلي شان كده هاتكلم في محشي لسان العصفور وكيفية حشو الحمام بالذبيب ومش هانكتر الكلام عن جوز الهند علي شان نشجع المنتج المصري ومانستوردش حاجة من بره اسمحوا لي أن أجعلكم تتركوا السياسة ولو للحظات معدوده لتفعل بعدها ما شئت .