* في حياتك بتكون إنت البطل ، لحظات بتكون البطولة مطلقة ولحظات بتكون مشتركة وأكيد طبعا ولازم يبقي في كومبارس علي إختلاف أنواعهم ؛ في كومبارس صامت وفي كومبارس متكلم وفي كومبارس دورة بيكون طويل ومالهوش اي لزمة وفي كومبارس بيكون دوره قصير بس بيغير في مجري حياتك ، وبين دور الكومبارس ودور البطل بيبقي ديما العامل النفسي مهم جدا .
* والبطولة المطلقة دي ما بتوصلهاش علي طول كده من غير ما تعدي علي دور الكومبارس الأول بتبقي كومبارس في البيت مالهوش أي شغلة غير أنه ياكل ويلعب ويقرف في اللي حوالية وخلاص وشوية بشوية دورك بيكبر وبتاخد مساحة أكبر لحد ما توصل لعش الزوجية ويبقي معاك البطولة المطلقة بقي ما أنت خلاص بقيت " سي السيد " علي رأي عمنا نجيب محفوظ ، شوف بقي موضوع البيت دا وقيسة علي كل حاجة في حياتك من اول ما تدخل الحضانة لو كنت علي قد حالك أو الكي جي لو كنت ميسور الحال لحد ما تخلص تعليمك وفي الشغل بتاعك لحد ما توصل لدرجة المعاش أو سن التقاعد وفي حياتك الشخصية .
* المشكلة اللي بتواجك في دور الكومبارس إنك بتكون مجرد آله تتبرمج يمين تروح يمين ، شمال تقوم رايح شمال من غير ما تشغل دماغك ولا تفكر حتي في اللي إنت بتعمله ، مش بخليك تعصي أوامر الحاج ولا الحاجة طبعا أنا قولت عليها أوامر لأنها لازم تتنفذ ولو مخالفة لتعاليم الشرع ممكن تتناقش بكل أسلوب راقي وبأدب ودي الحالة الوحيده اللي بيكون فيها مقبول إنك تشجب وتدين ! لأن طبعا طاعة الوالدين أمر من المولي – سبحانة وتعالي – المهم يا سيدي اول حاجة لازم تاخد بالك منها " دماغك " يعني ما بتقاش بتعمل الحاجة لمجرد إنك بتعملها وتعالي علي نفسك يا سدي وفكر تاني حاجة " دماغك " يعني لازم تدخل في دماغك كل يوم معلومة جديدة علي الأقل ودا طبعا علي شان تبقي كومبارس متميز وبسرعة تاخد دور البطولة ، تالت حاجة بقي يا سيدي ودا الأهم ولازم تاخد بالك من " دماغك " يعني لازم تبطل تهرش فيها دلوقتي وتاخد بالك من كل حاجة حواليك وتفكر وتسأل وتحاور بأسلوب حضاري زي ما قلنا ولو مش عارف تقول مش عارف وما تضحكش علي حد وتقله علي حاجة غلط ولو مش متأكد من معلومة تقوله إنك مش متأكد منها وعلي شان تبقي بطل ناجح لازم الأول تكون كومبارس متميز وناجح ويا سلام بقي لو كنت بتقرأ كمان وتبقي واد مثقف كده ودا طبعا علي الرغم من تعريف الثقافة يعني واحد صاحبي بيقولي " مش مهم إنك تقرأ كتب كتير المهم إنك تقرا كتاب وتقعد تقول فيه علي طول " وطبعا كل واحد حر في وجهة نظرة بس القرأة أجمل شيء في حياتي وأتمني إنها تكون أجمل شيء في حياة حضرتك المهم بقي يا سيدي إنك مهما بقيت البطل سواء بقي بطولة مطلقة أو بطولة مزدوجة هتلاقي مخرج – غتت – لازم يرخم عليك علي شان يفرض شخصيتة ممكن يفرضها بشخطة أو بنظرة عين أو بمجرد حضورة بس ما تخفش علي قد ما المخرج هايكون قاسي عليك في الأول علي قد ما هاتستفاد في الآخر وتقول عنده حق وتدعيله بالخير .
* ممكن تكون شايف الكلام دا مافيش منه أي لزمة ووجع دماغ علي الفاضي بس أحب أقولك السطور اللي حضرتك قرأتها دي بتلخص تاريخ حياتك لو كنت لسه صغير أو كنت كبير لو كنت خدت فرصة البطولة المطلقة وفتحت بيت او لسه بتاخد المصرف من والدك اطلع فوق وأقرا الكلام تاني واعتبر إني كاتب الكلام ليك هتلاقي حاجات هاتعجبك بس الأهم إنك تعملها وحاول تقرأ ولو كل شهر كتاب واحد وأظن إن شهر كتير أوي علي الكتاب بس آهي بداية .
ليست هناك تعليقات:
إرسال تعليق