قمنا بالثورة وقلنا
عيش ، حرية ، عدالة
فافتكروها كراسي ولقمة
طرية وحزب ندالة
ضعيناها بكلمة " آه "
في استفتاء مش دستوري
وكل اللي جه وراه
ضيع معاه صوتي
ياجماعة افهموا حرام عليكوا
دي مصر أبقي م الجميع
ولا مصلحة هاتنفع
ولا كراسي هاتشقع
واتعلموا دروس التاريخ
هتلاقوا فيه العبرة
واقروا تاريخ الثورات
هتلاقوا فيها الحكمة
وإن مهما طال الفساد
والإفساد والتضليل
الثورة ولابد هاتنجح
وينتهي زمن التطبيل
ويبدأ عصر الحرية
وينتهي عصر العويل
بس تقول لمين ؟
ومين يسمعك ؟
دي جراح الوطن
لوحدك بتوجعك
علي شان قررت تكون
م الثوار
دمك ع الأرض سال
وأختك نهشها الكلاب
وأمك بتدعي عليهم
وهما عاملين فيها أبرياء
ولا كأنهم عملوا حاجة !
بكرة ثورتنا تنجح
ودي حقيقة مش محتاجة
دليل زي الشمس
بتطلع يوماتي
في نفس الميعاد
لا كلت ولا ملت
ودي طبيعة في الثوار الحق
سياسة النفس الطويل
مهما اتقتل منه
أو اتقال انهم خاينين عملاء
أو حتي في السجن رموهم
قيمتهم برضوا غالية
من قيمة الحق اللي عاوزينة
دي مصر عليهم غالية
ولسة الطريق طويل
هانكمل المشوار
وسط البكا والعويل
وأموت وألف غيري
وبلاي تعيش حرة
خيرها لأهلها
ويرجع مجدها
يادين ولادها
وترجع من تاني
زي ما كانت
في سابق عهدها
ودا قسم أي ثائر
بيحب سماها وأرضها
21/4/2012
ليست هناك تعليقات:
إرسال تعليق