مقتطفات

 * نفاؤل شديد جدا رأيته صباح اليوم أثناء توجهي للإدلاء بصوتي في الإنتخابات الرئاسية وكانت البسمة علي شفاه رجال القوات المسلحة – كالعاده أيام الإنتخابات – والناخبين ايضا للإلتزام بالمواعيد المحددة لفتح الصناديق .

 * للأسف لسه زي ما احنا بنهتم أوي بالمظهر لما نعرف إن في أي مسئول هايعمل زيارة في المكان الحكومي ومابنهتمش ننضف من الجذور ولو حد قال كلمة حق بيتقاله " إنت اللي هاتشيل الطين يا منعم ! " .

 * علي الرغم من الدوشة والظيطة اللي تحس بيها علي طول النيل إلا أنه مازال يبعث في قلبي الهدوء والطمأنينة والسكينة .

 * جنب سور جامعة الدول علي طول شفت راجل بتاع فشار معلق علي العربية بتاعته علم " لدكتور عبد المنعم أبو الفتوح وشعار حمالته مصر القوية " وكمان لازق بوستر كبير أوي علي الإزاز بتاع العربية بتاعته .

 * كان في راجل كبير في السن بيشتري تذكرة قدامي من محطة التحرير فالي واقف بيسأله : هاتنخب مين يا حاج ؟

-رد الحاج : ربنا يسهل ولا انت عاوزني انتخب حد ؟

-لأ دي حرية شخصية أنا عن نفسي انتخبت حمدين صباحي .

فمد الحاج إيده ليصافحة وعلت إبتسامة حميلة علي ووجهه ولما جه دوري سألته علي أخبار أبو الفتوح ؟ قالي : الاسم اللي معلم معايا من الصبح حمدين إنما أبو الفتوح وشاورلي براسه بمعني إنه مش متفائل .

* وانا في الساقية لقيت إقبال غريب جدا من الناس اللي عاوزة تعمل إشتراكات جديدة ولقيت ناس كتير أو قاعده مستنية دورها .

 * أيا كان قرارك في اختيار مرشحك الرئاسي فالديمقراطية تعني أن اتقبل الرأي الآخر حتي لو هاتقاطع الانتخابات بس واجب عليا إني انصحك لو كنت هانتخب حد من الفلول اللي واحد منهم النهارده وبكل بجاحة بيقول : أنا كنت في الميدان من يوم 25 مش من يوم 28 وهتفت ضد حسني مبارك إنما أحمد شفيق ومصمص شفايفة دا حاجة تانية خالص ولو كان اتعين من يوم 25 ما كانتش هاتبقي ثورة بس اللي حصل بقي والأغلبية الصامتة واقفة وراه وإن شاء الله هو رئيس مصر القادم ، بصراحة لو ماكنتش واخد عهد علي نفسي ما اتكلمش مع أي حد في السياسة كنت زعلته جامد وكله بالحب .

 * رجالة أمن الدولة النهارده في المترو شغالين الله ينور علي عمرو موسي وأحمد شفيق وواحد منهم قال بالحرف الواحد : " حسني لو ماكنش باقي علينا ... كان بهدل البلد " وطبعا لا تعليق علي الكلام دا !!!

 * علي غرار مقولة عمرو موسي أمين جامعة الدول العربية السابق : " إن إيران دولة عربية " واحد من مخبري أمن الدولة قال النهاردة بالحرف الواحد " إن عمرو موسي كان ماسك وزارة الداخلية " !!! .

 * أكيد حصلت معاك حاجات أكتر من دي بكتير النهارده وهي دي مقتطفاتي للنهارده ليوم الأربعاء 23/5/2012 .