* مابقاش فيه غير كلمة مافيش
والفرح بقي عامل زي البقشيش
بيجي كل فيـــــــــــــن وفين
والحزن طبعا غيره مافيش
عجبي !!!
--
* كفاية حزن يا قلبي حرام عليك
عارف – ومتأكد – إنها غالية أوي عليك
بس هاتعمل إيه ؟ نصيبك كده !
تشفها وهي بتضيع من بين إيديك
عجبي !!!
--
*مسامحة او مصارحة مش مهم الاسم
المهم إنها خطوة لازم وضروري تتم
علي شان نعرف إيه أساس المشكلة
وأكيد هنلاقي الحل والفرحة هاتم
عجبي !!!
--
* لو إنت شبح بحق وحقيق
ياريتك تقولي فين الطريق
بدل ماتخوفني ومش هاتقدر
دا أنا نقذت أكتر من ألف غريق
عجبي !!!
--
* مصر بقت تايهة بلا عنوان
بمساعدة السلفيين والإخوان
واستمرار حكم العسكر والسؤال
إمتي هانوصل بر الأمان ؟
عجبي !!!
--
* ويا دنيا ليه علي طول بتعانديني ؟
دا أنا كل ما آجي أتفائل تصديني
هاتفضلي لحد إمتي علي كدة ؟
ولحد إمتي هاتفضلي تبكيني ؟
عجبي !!!
--
* ولسه بحلم وهاحلم تاني
إني حققت كل الأحلام و الأماني
وافرح وازعل وأفكر وآخد قرار
إني ما استسلمش -يوم- لأحزاني
عجبي !!!
--
* تحت القبة ناس أخترتهم وناس ما أخترتهمش
وفي برضوا ناس بحبهم وناس مابحبهمش
بس هي دي إراده الشعب صاحب القرار
ويارب المجلس يقف جنبهم وما يخزلهمش
عجبي !!!
--
* برتاح في صحبة الورقة والقلم
وافتكر اللي خان واللي اتظلم
وأعبر بيهم عن كل اللي جوايا
يفرح قلبي ويزول عنه الألم
عجبي !!!
--
* حمامة شاردة عن سرب الحمام
دققت في ملامحها لاقيتها فرخ يمام
سألتها : ليه تتعبي نفسك معاهم ؟
قالتلي : إتربينا سوا وهافضل –علي طول- معاهم
عجبي !!! #
----
ليست هناك تعليقات:
إرسال تعليق