أول ما نزلنا علي التاكسي لقيت عمنا الفهيم عمال يتلفت حوالية زي ما يكون
عامل عمله أو أور مرة ينزل القاهرة ويشوف الناس فيها روحت سأله
=إيه ياعمنا مالك عمال بتتلفت علي ايه ؟ مش عاوز حد يشوفك ولا أول مرة تنزل
هنا ؟
-ولا دي ولا دي بس بلاحظ الحركة الغريبة اللي في الشارع
قعدت اتلفت حواليا أشوف إيه الحركة الغريبة مالقتش أي حاجة
=عروستي
-عروستك ايه بس وبتاع ايه ، أومال عاملي فيها شاعر وحساس وانت مش واخد بالك
باللي بيحصل حواليك
=ياعم لخص في ايه جديد
-مش شامم حاجة غريبة
=يادي أم ألغازك دي يا أخي انت عارف إني عندي زكام
-ههههههه زكام برضوا يا عديم النظر ، مش شايف بشاير رمضان
دققت النظر تاني في كل حاجة حواليا وقعدت اتلفت في كل الاتجاهات وفعلا كان
عنده حق ، في شادر منصوب قدام محل ومرصوص كله فوانيس علي كل شكل وعلي كل لون ، محل
تاني بينزل أشولة الياميش وبلخ الخشاف واللذي منه ، ركزت أكتر في الصوت اللي جاي
من محل تالت لقت الأغنية الشهيرة " وحوي يا وحوي " ، محل رابع بيجهز
الصانية اللي هايعمل عليها الكنافة ، الزينة متعلقة في الشارع والكهربائي فارد سلك
كهرباء بطول الشارع وعمال يركب فيه لمض لزوم الإضاءة بالليل . ببص لعمنا الفهيم
لقيته مغمض عينيه وسرحان هزيته من كتفه وقولتله = مالك يا نجم سرحت في ايه بالظبط
؟
-في طقوس رمضان
=رجعنا تاني للألغاز
-ولا ألغاز ولا حاجة إنت اللي مش قادر تستوعب إن رمضان قرب
=ممكن برضوا الأحداث اللي بتحصل وسرعة الحياة مش مخلية الواحد عارف يركز في
أي حاجة ، المهم إيه بقي في الطقوس اللي سرحت فيه ؟
-كل حاجة ممكن تتخيلها وماتتخيلهاش كمان
=زي ؟
-زي قعدت الواحد في وسط العيلة كده مستني مفتي الجمهورية يطلع يقولنا إن
بكرة رمضان ولا بعده ، زي ابن الجيران وهو بيخبط علينا عشان ياخد فلوس علي شان
الزينة واللمض بتاعه رمضان اللي بتزود أحمال الكهرباء أكتر ماهي زياده أساسا ، زي
أول سحور وأول فطار ، زي الزحمة علي بتاع الزبادي وأي حد قاعد بقفص زبادي في رمصان
بس ، زي الزحمة علي بتاع القصب قبل الفطار والترابيزات اللي بتبيع عرق سوس وتمر ،
زي الروح الحلوة اللي بتلاقيها حواليك ، زي أول مرة حد يقول فيها كل سنة وأنت طيب
، زي صلاة التروايح ، زي قاعده القهوة كل يوم بعد الصلاة ، زي الصحيان للسحور
ورجلك بتخبط في بعضها ، زي لمتنا علي الطبلية مستنين المدفع يضرب والأدان عشان
نفطر ، زي فوازير نيللي وشريهان واللي دلوقتي بقي رمضان موسم مسلسلات الواحد بيعرف
اساميهم بالعافية وبيسمع تفاصيل من ناس كإنه عايش في كوكب آخر ، زي أول يوم صومت
فيه وكنت عاوز أشرب عشان كنت عطشان جدا وجعان عشان مسمعتش الكلام وفضلت العب
واتنطط ، زي ... ورن تليفوني وقطع كلامه قولتله معلش بقي يا معلم هاشوف مين اللي
بيخبط وليقته الواد جورج
= حبيبي عامل ايه ؟
=أنا تماموز الحمد لله ، مختفي فين كده يابني
=وإنت طيب يا معلم بس علي ايه ؟
=آه صحيح رمضان ، والله فيك الخير ، أمك عامله ايه صحيح ؟
=سلملي عليها كتير ، مش هاينفع أول يوم إنت عارف العيله كلها معزمة عند
الحاجة
=بيس يا معلم بس خلي القدسة تعملي البرتقان بالجزر اللي بحبه
=حبيبي وربنا ، إنت إيه ظروفك صايم معانا ولا زي كل سنة
= زي كل سنة يعني ، طب قشطة نتسحر مع بعض أول يوم بقي
=نزلت مع عمنا الفهيم كده أجيب كتاب
=لو روحت وفيا حيل هكلمك فل
=حبيب قلبي ، سلام يا معلم
خلصت التليفون وببص علي عمنا الفهيم لقيته رجع تاني لسرحانه روحت خابطة في
كتفه
=إحنا هنقضيها سرحان في طقوس رمضان ولا ايه ؟ يلا عشان نروح نجيب الكتاب
-الواد جوج عامل ايه صحيح ؟
=تمام زي الفل عازمك عالفطار
-لسه فيه الخير والله
=دا أحنا عشرة عمر يابني إنت جرالك ايه ؟
-لا ولا حاجة بس البلد دي غريبة أوي كل ما يتكلموا عن فتنة طائفية الناس
تزيد حبها لبعض أكتر من الأول وتختفي من علي الشاشات الأحضان والأفلام الحمضانة
اللي كانت بتحصل زمان دي
=هي دي مصر يابني
-آه والله عندك حق المكتبة أهي يلا عشان ننجز من أم الكتاب دا
=إنت تؤمر يا كبير
A_Mohmady@yahoo.com ***
ليست هناك تعليقات:
إرسال تعليق