استغربت لما لقيت رقم عمنا الفهيم ظهرلي علي التليفون علي شان كنا مع بعض
طول اليوم ومابقلناش ساعتين مروحين البيت رديت عليه - وقالي : إنه جايلي = قولتله : تنور
-بعد ربع ساعة هاكون عندك
=أوك مستنيك يا كبير سلاموز
-سلام يا فنان
وبعد ساعة ونص في انتظاره سمعته بينادي عليا قمت فتحتله الباب ودخلته
وقولتله : إيه يا مان هي دي ربع الساعة بتاعتك
-أصل حصلت خناقة وانا جايبك في الطريق وعشان كده اتاخرت
=ولايهمك يا معلم بتحصل في أحسن العائلات ، قولي بقي الخناقة خلصت كام كام
؟
-لا دي كانت خناقة بسيطة من اللي هي بتخلص شتايم وبس
=أمال إيه اللي وقفك وأخرك دا كله
-أصلي سمعت واحد في الخناقة بيقول :
"عيب الشعب المصري إنه زياط " فشكيت إنه يكون مصري ولما بصتله
لاقيته الواد سمكة جارنا !
= محسسني إنك أول مرة تسمع الكلمة دي
-لأ مش أول مرة بس الموضوع زاد أوي عن حده
=إزاي يعني ؟
-المعروف عن الشعب المصري إنه شعب حضارة وتاريخ بس اليومين دول حالته
متنيلة بستين نيلة لدرجة خلتنا منفردين عن باقي العالم بحاجات غريبة أوي
= عروستي !
-ههههههههههه كنت عارف انك هاتقول كده أبسطهالك يا سيدي
·
إحنا الشعب الوحيد في العالم اللي بيطلع أو
ينزل يجري علي السلم الكهربي .
·
إحنا الشعب الوحيد في العالم اللي متدين
بطبعه ومع كده بنلاقي خناقات لرب السما في الجوامع علي أتفه الأسباب زي إنم تشغل
المروحة أو تطفيها ، أو إن الإمام اتأخر شوية في إقامة الصلاة ، أو ... أو ... أو
...
·
إحنا الشعب الوحيد في العالم اللي بيتفشحر إن
بلده بتتسرق وبنعتبر إن دا علامة الجودة للبقاء وديما نقول : " البلد دي فيها
خير مالهوش آخر والدليل إن البلد دي بتتسرق من أيام الفراعنة وبرضوا الناس اللي
فيها لسه عايشين ! " .
·
إحنا الشعب الوحيد في العالم اللي عمل ثورة
في 18 يوم وبعد كده روح من غير ما الثورة تحكم أو تنفذ أي حاجة من اللي خرجت
الجماهير تطالب بيها !
·
إحنا الشعب الوحيد في العالم اللي بيتريق علي
أي حاجة ولو ملقناش حاجة نتريق عليها بنقعد نتريق علي نفسنا !
·
إحنا الشعب الوحيد في العالم اللي الشهداء
ماتوا لوحدهم ولحد دلوقتي ما نعرفش مين اللي كان السبب إنهم يبقوا شهداء !
·
إحنا الشعب الوحيد في العالم اللي بيستغل
المناسبات العامة والأعياد الدينية في التحرش الجنسي وباقي السنة بنتحرش ببعض
فكريا وسياسيا
·
إحنا الشعب الوحيد في العالم اللي بتلاقي فيه
مسلمة بتقول لاختها المسيحية : " كل سنة وانت طيبة " والمناسبة عيد
الأضحي ! ودا حصل قدام عيني
·
إحنا الشعب الوحيد في العالم اللي بنشغتل
بمعدل 24 دقيقة في اليوم
·
إحنا الشعب الوحيد في العالم اللي حصله منه
علي جائزة ونوبل لازم يتقال عليه إنه خاين أو عميل وممكن الأمر يوصل لدرجة الكفر
كمان
·
إحنا الشعب الوحيد في العالم اللي مابيعرفش
كاتب أو مفكر أو عالم إلا لما يموت فنشوف ونسمع خبر وفاته
·
إحنا الشعب الوحيد في العالم اللي علي الرغم
من أجهزة المخابرات عنده إلا إنه واقف عاجز قدام " الطرف التالت " اللي
ديما بيتسبب في كل خراب
·
إحنا الشعب الوحيد في العالم اللي بيكسل يعمل
شير لجملة أو مقولة لفلان والمصيبة إنه بيكتبها من غير ما يقول صاحب الجملة !
·
إحنا الشعب الوحيد في العالم اللي بيتفنن إنه
يقضي علي التراث أو أي حاجة حلوة وأكيد سمعت أغاني شعبي لأم كلثوم والجديد طبعا
مهرجان " أنا في اللابويا " !
·
إحنا الشعب الوحيد في العالم اللي لما اختفت
الشرطة ما حصلتش أي حوادث من سرقة أو تحرش أو ... أو ... أو ... !
·
إحنا الشعب الوحيد في العالم اللي انتخب رئيس
لبلده من غير ما نعرف إيه صلاحياته
·
إحنا الشعب الوحيد في العالم اللي بيفرغ كل
الشحنات الموحبة والسالبة عنده من " فرح ، حزن ، تضامن ، نفاق ، فراغ ، و خوف
، ...... " في الأكل
·
إحنا الشعب الوحيد في العالم اللي علم الشعوب
العربية والإسلامية القرآن الكريم وكفاية إنك تقول في أي مكان اسم الشيخ " عبد
الباسط عبد الصمد " وعلي الرغم من كده مابقيناش نسمعهم وبنسمع مقرئين الخليج
!
***
a_mohmady@yahoo.com
***
ليست هناك تعليقات:
إرسال تعليق