بعد ما خلص عمنا الفهيم كلامه طلعت تنهيده بحرقة علي اللي الناس بتعمله
=قولتله : فاضي تيجي معايا ولا هتكسل ؟
-رد وتحس من رده إنه مش طايق نفسه : فين ؟
=مش عارف
-إنت عبيط يلا ولا بتستعبط أنا مش طايق نفسي دلوقتي ابعد عني الساعة دي
=إهدي علي نفسك شوية كده دا أنا لو بقولك تعالي نقعد عالقهوة هاتنزل قبلي
-يابني بطل لماضة أهلك دي دلوقتي وقولي رايح فين ولا رايح تعمل ايه ؟
=هو انا مش عارف رايح فين ، بس أنا عاوز أشتري كتاب
-وحياة أمك
=آه والله زي مابقولك كده في واحد صاحبي قالي علي كتاب عاوز انزل اشتريه
-يا دي أم الثقافة اللي بتخر منك إنت واللي تعرفهم يا أخي ومشحطط أهلي معاك
=جاي يعني ولا مش جاي
-جاي وأمرنا لله أشوفك كمان ساعة علي ناصية الشارع
=أوك يا كبير أشوفك هناك سلاموز
-سلاحف
في الميعاد بالظبط اتقابلنا علي ناصية الشارع
-إيه ياعم المقرف كتاب ايه اللي انت عاوز تشتريه ؟
=قال يعني لو قولتلك هتعرف
-حد قالك عليا إني جاهل ولا حاجة ؟
=لأ بس إنت ما بتحبش الكتب ولا القراية
-مين اللي قالك المعلومة الفكسانة دي ؟
=قالي إيه يابني دا أحنا بنقعد مع بعض أكتر ما بنقعد في البيت وعمري ما
شفتك ماسك كتاب بتقرا فيه
-عشان البعيد أعمي
=الله يسمحك يا عم ، يعني عاوز تفهمني إنك مثقف وبتقرا
-هو أنت حد قالك عليا إني جاهل ولا حاجة ؟
=ماتفترضش حاجة ماقولتهاش يا برنس وهنروح بعيد ليه إيه اللي يثبت إنك مثقف
وعندك معلومات
-أكيد مافيش غير الورقة والقلم
=لحظة واحده اطلعهملك من الشنطة واثبتلي
-هات
=اتفضل ياسيدي اكتب اللي انت عاوزة لحد ما اروح أجيب تاكسي وآجي
-ماشي
قعد عمنا الفهيم علي الرصيف يكتب وروحت جبت التاكس وجيت
=يلا يا كبير
-يلا ، سبحان الذي سخر لنا هذا وما كنا له مقرنين وإنا إلي ربنا لمنقلبون
=ربنا يقولي إيمانك يا عمنا ، وريني بقي كتبت إيه ؟
-تقرا ولا اسمعك ؟
=لأهات أقرا ، إنت عارف إني بحب القراية قد حبي ليك بالظبط
وناولني الورقة من غير ما يعلق علي الكلمة اللي قولتهاله ولاقيت فيها
هل تعلم أن أمير المؤمنين " عمر بن الخطاب " عطل أحكام الشريعة
الإسلامية أكثر من مرة .
هل تعلم أن الدولة التي ترفع الشعارات الدينية لا تستمر علي أرض الواقع
طويلا .
هل تعلم أن اختلاف وجهات النظر يؤدي إلي التقدم في دول العالم المتقدم
ويصبح إختلاف في الدول النامية .
هل تعلم أن الحجاج بن يوسف الثقفي الملقب بالسفاح هرب من مواجهة إمراءة في
أحد المعارك .
هل تعلم أن أول ثورة في مصر دعا لها الإمام الشافعي وكان قائدها "
أحمد البنهاوي " لكنه توفي قبل اندلاعها بأيام .
هل تعلم أن الإسلام لا يضفي قدسية علي أحد حتي الشيخان الجليلان " أبو
بكر " & "عمر " - رضي الله عنهما - كادا أن يهلكا .
هل تعلم أن فترة الستينات وما أدرام ما الستينات هلي فترة الزمن الجميل
اللي بنقعد نتحسر عليها ونتمني ترجع تاني .
هل تعلم أن صاحب هتاف " عاش الهلال مع الصليب " هو الأب سيرجيوس
والذي كان يعتلي منابر قاهرة المعز في ثورة 1919 .
هل تعلم أن من قتل علي بك الكبير هو محمد بك أبو الدهب .
هل تعلم أن أول ثورة قامت في مصر كانت في عهد الخلافة العثمانية وفشلت لأن
قائدها أحمد البنهاوي تم قتله عن طريق الخطأ قبل إندلاعها بأيام قليلة ، ودعا
الناس للقيام بها الإمام الشافعي والسيدة نفيسة – رضي الله عنها - .
هل تعلم أن صاحب عبارة " التعلم كالماء والهواء " هو النقراشي
باشا آخر رئيس وزراء قبل قيام ثورة يوليو 52 وليس عميد الأدب العربي طه حسين .
=هو أنا أتأخرت أوي كده عشان لحقت تكتب كل دا
-ولا اتأخرت ولا حاجة ما أنت عارف إني بتكب بسرعة
=بس بسم الله ماشاء الله مثقف مثقف
-الله أكبر عليا ، خمسه في عينك شوف هاننزل فين عشان نجيبلك الكتاب
=أوك يا معلم
A_Mohmady@yahoo.com ***
@ahmedmohmady
حكايات أخري لعمنا الفهيم
الفهيم في حضرة السيدة
الفهيم والمحاضرة ( 1 )
الفهيم والمحاضرة ( 2 )
ليست هناك تعليقات:
إرسال تعليق