دخلنا أشهر المكتبات الموجودة في القاهرة وكل لما نسأل علي الكتاب تتنوع
الإجابة يا إما مش موجود يا إما لسه خلصان
أو مانزلش المكتبة من الأساس وبعد لف طويل في جميع المكتبات الكبيرة منها والصغيرة
لقيناه مع واحد قاعد بالكتب علي الرصيف وكان آخر نسخة زي ما قالنا عمو البياع وكنت
فرحان جدا إني لقيت الكتاب ولقيت عمنا الفهيم بيضرب كف علي كف
= مالك بس يا كبير في إيه ؟
-إنت مش ملاحظ الكارثة اللي احنا وصلنالها
=إيه بس خير
-الكتب مرمية علي الأرض كده عادي
=إيه الجديد يعني ما أنت عارف إن مافيش حد بيهتم في البلد دي بالثقافة
-عندك حق ، بس انت مش ملاحظ حاجة غريبة في كل المكتبات اللي دخلناها
=خير ؟
-رصة الكتب ما لفتتش انتباهك لحاجة !
=إنت بتاخد بالك من حاجات غريبة إشجيني يا معلم
-كل المكتبات الصغيرة قبل الكبيرة بتهتم بالكتاب الكبار ومافيش أي فرصة
للكتاب الصغيرين خالص شوف الكتاب الواحد للكاتب الكبير محطوط منه كام نسخة في
مقابل كام نسخة للكتاب الشباب
= العدد لا يقارن
-دا طلعا غير دور النشر اللي بتطبع للكتاب الكبار آلاف النسخ وبتبقي
مستخسرة الف نسخة للكاتب الجديد ما انت نفسك تعمل كتاب وعارف
=إنت جاي تقلب عليا المواجع ولا ايه ، ما تسبني أفرح بالكتاب اللي جبته يا
أخي
-مش بقلب عليك المواجع ولا حاجة بس إحنا في مصر عندنا مشكلة حقيقة في موضوع
النشر دا والثقافة عموما وتقريبا مافيش مكان بيمارس ثقافة بجد غير ساقية الصاوي
=أنا عارف إني مش هخلص منك إلا لما تقول كل اللي انت عاوزة اتفضل قولي ايه
هي مشاكل الكتاب الصغيرين في البلد
-حبيبي وربنا ، بص يا سيدي
=بصيت
-أول مشكلة واكبر مشكلة بتواجه الكتاب الصغيرين إنهم لسه صغيرين
=عروستي
-يابني سيبني في مرة أخلص كلامي
=اتفضل
-قصدي بانهم صغيرين يعني إنهم مش هيلاقوا الإقبال الكبير علي الكتاب لما
ينزل السوق حتي لو كانوا كاتبين حاجات في منتهي الروعة علي العكس الكاتب الكبير لو
كاتب في الكتاب ورور يا جرجير هايبيع ويحقق مبيعات عالية جدا ودا طبعا بعد
المعاناه اللي هايلاقوها علي شان ينشروا الكتاب اصلا من رفض دور نشر بدون إبداء
أسباب وبين دور نشر بتغلي السعر عليهم أوي وبين دور نشر هاتضحك عليهم وتعملهم ورق
لحمة وارمي في السوق وخلاص
=عندك حق فعلا موضوع دور النشر دا متعب جدا
-دا غير طبعا إن الكاتب هيلاقي نقد كبير جدا عمال علي بطال من ناس ملهاش اي
شغلانة في الدنيا اصلا غير انها تنقد وبس وترمي اتهامات وخلاص ، غير إن الكاتب
دلوقتي لو عبر عن وجهة نظرة بصراحة ناس تهاحة وبتطلب منه إنه يكون محايد مع إنه
بيكتب رأيه مش بيكتب رأي الناس وكل دا مرحلة قبل الكتاب
=هو لسه في تاني
-يابني كل الكلام اللي قولته دا مش كلام أصلا في ناس تانية عندها كلام قد
دا عشرات المرات عشان اتعاملوا بجد في ونزلوا سوق النشر كل كلامي معاك دا نظري
=ما اللي إيده في الميا مش زي اللي إيده في النار
-عندك حق ، في دور نشر بتطلب من الكتاب الصغيرين إنهم يسوقوا لكتبهم مع إن
المفروض في العقد اللي ممضي إن من مسئولية دار النشر التوزيع ! وبعد كل دا في
الآخر الكاتب ما بيلقيش الصدا الإعلامي للكتاب بتاعه غير خبر هنا أو هناك لو يعرف
حد في الصحافة
=تصدق كرهتني في نفسي وشكلي كده مش هعمل الديوان اللي كنت ناوي اعمله
-ليه بس دا انا بقولك عشان تبقي واخد بالك بس هو اسمه إيه صحيح ؟
=هو مين ؟
-الديوان يابني
=اسمة " جيل وثار " حاجة عامله عاملة زي بورتريه لثورة يناير
المجيدة
-تسلم إيدك يا فنان وإن شاء الله هايبقي كتاب مكسر الدنيا
=بس هو بس يشوف النور الأول
-إن شاء الله هايشوف النور وهايبقي زي الفل يلا بس عشان نلحق نجيب الفول
عشان السحور إنت أخرتنا أوي
=مردودالك إن شاء الله
A_Mohmady@yahoo.com ***
@ahmedmohmady
مواضيع ذات صلة
هناك تعليق واحد:
احلى و اصدق كتاب قرأته هو كتاب مها الفهيم
إرسال تعليق