قمت من علي السرير بفتح عيني بملقاط نص عيني مفتحة ونصها مغمض خدت دش علي
السريع كده ونزلت لقيت عمنا الفهيم واقف مستنيني ومتشيك ولا العريس اللي رايح يجيب
عروستة من الكوافير لقيته عمال يبصلي ويضحك قولتله = صباح الخير واستمر في الضحك
وبعد كده رد عليا – صباح النور يا سدي إيه اللي انت عامله دا ؟
=في إيه يابني عالصبح مش كفاية مصحيني من النوم بدري في إيه ؟
-إنت بصيت في المرايا قبل ما تنزل ؟
=يابني إخلص مش فايقلك عالصبح مراية إيه اللي ابص فيها دلوقتي اساسا قادر
افتح عيني .
-عشان كده ، تعالي قرب تعالي
وبالفعل قربت منه وانا بقوله = لما نشوف أخرتها إيه مع سيادتك
كانت أحد زراير القميص في عروة زرار آخر وكان المنظر يدعوا للضحك فعلا فقام
بتعديل وضعيه الزراير مع العراوي وقالي – كده إنت بقت زي البني آدمين بالظبط وشرع
في الضحك وبدأنا في التحرك
= عارف لو قولت كلمة تانية هاسيبك واطلع اكمل نوم ، مش كفاية الدكتور اللي
هاندخل عليه متأخرين دا مش عارفين هايعمل معانا إيه ؟
-إنت مبتدء يابني ولا إيه ما انت عارف إن صوابعك مش زي بعضيها وكمان
الدكتارة مش زي بعض
=ياعم مش ناقصة نظريات وفلسفة علي الصبح الله يكرمك خلي اليوم دا يعدي علي
خير
-من غير فلسفة ولا حاجة ياسيدي وبراحة كمان مش في دكاترة بتحب تروح تتكلم
معاهم وبيهزروا مع الطلبة وبيعملوهم زي اخواتهم الصغيرين أو ولادهم علي حسب سنهم ،
وفي دكاترة تانية أول ماتشوفهم تستغفر ربنا كإنك شفت عفريت وبيتعملوا مع الطلبة
بكل جفا
=قول يا عم ستاموني قول ، الله يفتح عليك
-مين فينا اللي بيتريق دلوقتي بقي ؟
=أهو مرة من نفسي يا سيدي واهو أفوق عليك أحسن ما أفوق علي حد غريب ،
وياتري انت عارف بقي مين اللي هايدينا المحاضرة اللي انت هاتموت وهاتحضرها دي ؟
-إنت عارف كويس أوي إني معرفش الجدول ولا أعرف حتي أسامي المواد اللي عندنا
فأكيد مش هاعرف الدكاترة اللي بيدونا اساسا دي حاجة والحاجة التانية إنت عارف إني
مش رايح عشان مجتهد لا سمح الله بس رايح عشان مشكاحة .
=عارف ياسيدي بس إيه دخل كلامك دا كله بالكلام اللي قولتهولك عن الدكتور ،
هو اللي قالك إن في محاضرة ماقلقش اسم الدكتور ؟
-مش هايفيدني بحاجة أعرف اسم الدكتور أيا كان هو مين فأكيد الدفعة كلها
هاتشوفني في المدرج
=ومدام إنت عاوز الدفعة تشوفك في المدرج ماروحتش بدري ليه ؟
-ما انا لو روحت بدري هايبقي زيي زي أي حد دخل المدرج بدري وممكن ماتشوفنيش
يا فالح إنما لما أروح بعد الدكتور واخبط علي الباب والدكتور يقطع الشرح المدرج
كله هايشفني
=يخرببيت أم نظرياتك عالصبح ، طب لو الدكتور هزق اللي خلفونا هاتعمل إيه ؟
-ولاحاجة ياسدي برضوا هاتبقي الدفعة كلها شافتني
=يادي أم الدفعة كلها ، مرة واحدة كده بقيت مهتم بالدفعة كلها
-انا بقيت مهتم بالدنيا كلها علي شان فيها مشكاحة
=ياسيدي ياسيدي مش كنت تقولي كنت أجيب الكامنجة من التلاجة
-إنت سايبها في التلاجة من إمبارح
=عشان أوتارها تتشد وأعرف اعزف عليها
-نسيت إنك قلاش كبير ومش هعرف أسد معاك
= إنت ليه شفت حاجة بس لما افقولك اثبت بقي عشان نشوف هانعمل إتك مع
الدكتور اللي جوا دا هاندخل ولا هانتهزق
-أيا كانت النتيجة فالعلاقة حتمية أنها ستراني وهو هو المبتغي
=اعملي فيها بقي فيلسوف عصرك وأوانك ، هاتطلع من أنهي باب ؟
-أكيد الباب اللي ورا
=طب يلا بينا
A_mohmady@yahoo.com ...
ليست هناك تعليقات:
إرسال تعليق