وقفنا علي باب المدرج وخبطنا علي الباب واستنينا شوية لحد ما الدكتور عرف
إن في حد واقف علي الباب وبصلنا الدكتور والمدرج كله وقالنا -الدكتور : إيه اللي
جايبكوا متأخر كده ؟ في حادثة في الطريق ولا المترو عطل في السكة ؟ بس من غير كدب
=ردينا : ولا دا ولا كدا إحنا صحينا متأخر يا دكتور
-قولت بصراحة بس ماقولتش بوقاحة
=ماهي دي الحقيقة يا دكتور صحينا متأخر وجينا علي طول ولا الطريق واقف ولا
المترو عطل في السكة ودل أسهل حاجة ممكن أي طالب يقولها لحضرتك
-ماشي يا لمض منك ليه اتفضلوا خشوا
ودخلنا بعد لما المدرج كله بص علينا وشافنا عاملنا ايه ؟ وكان عمنا الفهيم
لمح مشكاحة قاعدة قدام قولتله = بقولك إيه لو هاتقعد قدام روح أنا مش هقعد قدام
فرد – لا ياسيدي مش هقعد قدام ولا حاجة هانقعد ورا عشان لو عاوز تناملك
شوية ولا حاجة
=الله ينور عليك يا فاهمني
وكان الدكتور عمال يشرح في نظريات وحاجات غريبة كده طبعا فهمناش منها أي
حاجة ولا سمعنا منه أصلا حاجة ودا راجع طبعا علي شان عمنا الفهيم كان عمال بيحكيلي
اللي بيحصل في المدرج بالتفصيل الممل
=أول بنجين دول العيال اللي بنصور منهم الورق ربنا يخليهم للغلابة اللي
زينا ، شايف الواد عماد مطلع الموايل بتاعه وهتلاقيه قاعد علي الفيسبوك بيشيت مع
أي حد
-يابني اسكت شوية عاوز أنام مش فايقلك عالصبح
=ماهو بدل ما تنام وتسمع كلمة ملهاش أي تلاتين لازمة يبقي استحملني وننزل
عند أم رباب ارزعلك كوباية قهوة دوبل هتلاقي نفسك فوقت
-أنا غلطان إني سمعت كلامك اساسا
=شايف الواد محسن والبنت اعتماد قاعدين بيعملوا ايه ؟
-إيه ياسيدي مش شايف حاجة ؟
=قاعدين بيرسموا لبعض في الكشكشول
-إيه الجو القديم اللي انت بتحكي فيه دا ؟ طب وطالعين المحاضرة ليه ؟
=هتلاقي الجو تحت حر أو الكلية فاضية فطلعوا بدل ما يقعدوا تحت
-مافيش حد ماسك إيد حد بيعملوا فيها مساج ؟ !
=تصدق فيه واد وبنت هناك أهم بس ملامحهم مش باينة خالص
ومرة واحده لقينا صوت الدكتور عالي وبيقول " الطالب اللي هناك "
كل المدرج بص علي ورا علي شان يشوف مين الطالب دا بس ماكنش فيه طالب ولا حاجة هو
كان عاوز المدرج كله ينتبه للي هو بيقولة كنت بين الصحيان والنوم بفتح عيني بملقاط
لمحت عمنا الفهيم مركز أوي وبيضحك بشوفة بيبص علي ايه لقيت مشكاحة بتلف وشها
للدكتور اللي كان عمال يتكلم في حاجات غريبة ملهاش علاقة بالمنهج خالص "
الشارع كله عبر وحكم لو ركزت وانت ماشي هاتبقي مهندس شاطر جدا "
=إمتي المحاضرة دي تخلص بقي مش ناقصة صداع
عالصبح
-هانت يا فنان كلها نصاية كده
وهنا رن تليفون الدكتور فاعتذر من الطلبة إنه يرد علي التليفون وخرج برا
المدرج وزادت الدوشة زي ماتقول إن الطلبة ما صدقت الدكتور يخرج علي شان يتكلموا
اللي بيتكلم في المحاضرة " اول بنجين " واللي بيلعنها " 99% من
الطلبة " والكل رجع لطورة الهادي الجميل لما شافوا الدكتور داخل من باب
المدرج اللي دخل لملم اوراقة وقال : " نكمل المحاضرة الجاية ياشباب " .
وكانت الإنفراجة للطلبة كلهم هجوم علي البوابة ولا هجوم التتار علي اسوار بغداد
فضلنا قاعدين لحد مال الزحمة خفت وقمنا خرجنا من المدرج .
A_mohmady@yahoo.com ...
هناك تعليق واحد:
والله مبدع
إرسال تعليق