(1)
محتاج إني أفرأ
في عالم البحار
محتاج إني أدور
وافتش عن أسرار
واتغلم كل يوم حاجة
وبرضوا أساعد الغير
محتاج إني اتعلم
طريقة جديدة للتفكير
واتخيل وأشوف أحلامي
وأحب عروسة البحر
واهجرها ... وتسحرني
وينقذني حب بنت الأمير
(2)
محتاج إني أزور
أماكن جديدة
مليانة أمل وتفاؤل
وحياة سعيدة
تسحرني الطبيعة بجمالها
وأفكر فكرة مجنونة
وألقي الحمام بيهد
جبال المستحيل
يبني عماير الأحلام
يطلق لجام الخيول
يبذر بذور الخير
ويقلع الأوهام
(3)
محتاج إني أشوف
بلادي حرة
مش مستنية أي
مساعدة من برا
قرارها في إيد رئيسها
مش من جهة سيادية
غامضة ومش معروفة
لأهلها وشعبها
اللي واقف إيد واحدة بجد
بعيد عن الشعارات
علي شان يبنوا البلد
بعد ما طال المطال
في ضلمة وذل ومهانة
واستعباد وجهل
(4)
محتاج إني أشحت
عزة وكرامة
لوطن ... كل حكامة
صعاليك ومتهانة
المهم عندهم الكرسي
ومش مهم الشعب
يعيش في فقر وتخلف
وحيرة وغلب !
ومفكرين إنهم كده
بيحموا عروشهم
يبوسوا إيد الأمريكان
وبدم الشعب
يملوا كروشهم !!!
مفكرين نفسهم خالدين !
وتقول لمين ؟
إن الشعب بإيده
يزلزل عروشهم
(5)
محتاج إني أصرخ
بعلو صوتي
بعد ما طال
زمن سكوتي
وقررت أطالب
بكل حقوقي
وهافضل أهتف
بعلوا صوتي
ضد الظلم
ضد الجهل
ضد الإستغلال
في الحق
وهافضل أصرخ
بعلو صوتي
حتي لو كان التمن
موتي
حتي لو كان التمن
موتي
(6)
محتاج إني أرسم
حمامة سلام
سلام بجد مش
مجرد كلام
تطمن الشعوب
وتعيش في أمان
ومع إني عارف
إنها مجرد أحلام
هافضل أحلم وأحلم
وهاحقق الأحلام
حتي لو ما اتحققتش
هابقي سعيت نحو هدف
واتعلمت حاجة وعلمتها
ليست هناك تعليقات:
إرسال تعليق