كل الكلام متشابه
كل الكلام معروف
ناس بتشتم بيه
وناس بتمدح الحلوف
اللي مفكر إنه في يوم
هايرجع حاجز الخوف
اللي خلاص كسرناه
ويشهد علينا ألوف
اتجمعت ضد الظالم
اللي جنودة وافقة صفوف
ولما ابتدوت الضرب
اختفي معاه الخوف !
الدم ع الأرض سال
وأخويا بقي اسمه " شهيد "
الحرية كانت مطلبه
ورافض عيشة العبيد
استشهد واتصاب الوف
ولسه الحلم عنيد
لسه النظام ما سقطش
وعاوز يرجع من جديد
بس يغير في الأسامي
بدل محمد يبقي أحمد
والمؤسسة هي هي
لسه مفكرنا عبيد !
**
أم الشهيد بتنادي
فين حق ولادي ؟
وليه الدم بقي أرخص
حاجة فيكي يا بلادي ؟
كل محاكمة نتابعها
المتهم يطلع بريء
أمال مين المتهم
في قتل ولادك يا بلد ؟
الدكتور والمهندس والصحفي
والشيخ والعمال والولاد ؟
كلهم اتقتلوا برصاص الغدر
والمتهم بريء !!!
إما لحسن نيته
أو مافيش أدلة
اللي إزاي تلاقيها
وهو شغال مكانه !
بيلبس الصبح لبس ظابط
وباليل يتحقق معاه
بعد ما يخلص شغله
في إتلاف الأدلة
فأكيد من الطبيعي
لما يروح المحكمة
وسط زهول م الجميع
يلاقوا الحكم براءة
**
مين خان ترابك يا وطن ؟
مين باع ضميرة ؟
مين قتل ولادك يا وطن ؟
أملك في بكرة
زهرة شبابك ... ياوطن
لو عندك فكرة
قولي عليهم كلهم
وهات معاك أدلة
غير خرطوش العيون
لأنها لسه منورة
غير الرصاص الحي
ولو لقيت أي قناصة
عرفهم إن الدم اللي سال
خلي الأرض متطهره
ولسه الشهيد موجود
ما ارتحش يوم في قبره
ولو قانون البشر ماريحهوش
هايريحه قانون ربه
لو عندك أدلة يا وطن
ماتبخلش علينا وهاتها
ع شان ناخد حق الشهيد
ونرتاح ونريحه
لما نسمع من القاضي
أن " المتهم مدان "
ونسمع أحلي زغروطة
فرح ... تملا المكان
ونرفع أهل الشهيد
ونطوف بيهم الميدان
ونرفع أهل الشهيد
ونطوف بيهم الميدان
ليست هناك تعليقات:
إرسال تعليق