* ومنين أجيب الدوا وأنت الطبيب
رغم كل المسافات ديما مني قريب
دوايا إنك تحن علي قلبي المسكين
بكلمة تقولها ... ما أنت الحبيب
عجبي !!!
--
* سؤال من غير جواب إيه لزمته ؟
دا المريض لجل مايعرف علته
لازم يروح لطبيب وياخد الدوا
بعد ما يعرف في الأول إيه أزمته
عجبي !!!
--
* وسط التوجس والقلق ... يشع نور
يخطف كل العيون ويكسر كل الجحور
يهزم الإحباط واليأس ويولد الأمل
وهي دي الحقيقة في كل العصور
عجبي !!!
--
* وأخرتها ومعاكي إيه ؟ مش عارف !
دا أنا غير حــبــي ليكي مش شايف
وبين الجهر والــــود مستني القرار
وعشان كده – علي طول – خايف
عجبي !!!
--
* وهايجري إيه لو من تاني تفكري في الموضوع
أنا ممكن اسيبك تفكري حولي مــــيــــت أسبوع
بس سبيني عايش مستني معاد الرد ولحظة أمل
ماتصدمنيش بسرعة وتقفلي ف لحظة الموضوع
عجبي !!!
--
* بدور علي نفسي اللي تاهت مني فيكي
لقيتها مدبوحة وغرقانه في بحور عنيكي
لملت جروحي وخرجت بالعافيه منها
انشفها وأداوي جروحي واتخلص من هواكي
عجبي !!!
--
* جواب في جواب ببعتهم وأنا مسافر
وأقرا في جواب يخلي العقل داير
يفكر في البلد وإزاي عنها اتغربت ؟
صدق اللي قال عليا : شحص مغامر
عجبي !!!
--
* عاوز أعاتبك بس ف إيه ؟
إحترامك شيء لا يعلا عليه
بس مافيش أسوأ من الجفا
مابقتش عارف أعمل إيه ؟
عجبي !!!
--
* الليل بطوله قصير
لأني ديما فيه بفكر
اعمل في حبك إيه ؟
وإزاي وإمتي أعبر
عجبي !!!
--
* لعيبة حريفة مابيلعبوش
وكاسات خمور ومابشربوش
اتعجبت منهم وشفت العجب
وطلعوا نأبي علي فاشوش
ليست هناك تعليقات:
إرسال تعليق