بتسألني الناس عن اسمك
مفكرينه أكبر سر
ومايعرفوش إن اسمك
عمره ما كان يوم سر
واللي عاوز يعرف اسمك
يبقي لازم يعرف مصر !
لأن مصر حته منك
وإنت حته من مصر
في زحمة أي ميدان
وفي عز دوشة العصر
في السيدة ولا الحسين
ولا في زحمة القطر
في طيبة الناس وضحكتهم
في عز الذل والقهر
اسمك ديما يرفرف
زي علم مصر
فوق في السما عالي
ويبان أوضح م القمر
والقمر يزعل وينخسف
لانك إنت القمر
وضح اسمها ليكوا ؟
ولا أوضحك أكتر
تعارفها في رائعة جاهين
" علي اسم مصر "
وفي شعر حداد وبيرم
وصوت درويش
ولو سألتوا أكتر من كده
هاقلكوا : مافيش
غير عود إمام
ورباعيات الخيام
وثورة دنقل
وعم نجم
ومش هانسي محمود درويش
وغيرهم كتير وكتير
وبرضوا هي النجمة
لو طال بيها الزمن
ترسم أحلي ضحكة
علي جبين التاريخ
وترجع من تاني تكتبه
مش جديد عليها
هي كده من زمان
وشفوها في شخصية مصر
للمبدع " جمال حمدان "
وصلاح عبد الصبور والعقاد
ووحي قلم الرافعي والمازني
وأجيال كتير هايعشوا
مهما طال بيهم الزمن
لسه بيسألوني عنها ؟
وعاوزين يعرفوا اسمها
يا اللي غرقت في شبر ميا
ومستني أقولك اسمها
لو شفت رسومات حجازي
هتلاقي فيها وشها
إبداع بريشة مبدع
عرف من زمان اسمها
مسك قلمة وفرد لوحته
ورسم مشاكل عصرها
ماهو مصر حته منهم
وهما حته منها
يا اللي بتسأل عن حبيبتي
اسأل مصر عنها
هاتقولك : دي حته مني
وأنا حته منها
لسه هاتسأل تاني ؟
ولا عرفت اسمها
22/9/2011A_mohmady@yahoo.com ***
ليست هناك تعليقات:
إرسال تعليق