(1)
خطاب مجمع للرئيس
*سمك لبن تمر هندي
حد له حاجة عندي
أنا دلوقتي بقيت الريس
حد له حاجة عندي
اسمعوا يا أهلي وعشيرتي
سمك لبن تمر هندي
أمريكا العدوة زمان
دلوقتي بقت صديقة
مافيش حاجة هاتستخبي
وهتبان كل الحقيقة
من الصديق الوفي لبيريز
برقية سلام وتحية
سمك لبن تمر هندي
حد له حاجة عندي
عارف كل الخاينين وعددهم
خمسة ستة سبعة تلاتة أربعة
عاوزين يخربوا البلد
وبيروحوا حارة مزنوقة
نهايتهم خلاص قربت
وأيامهم بقت معدودة
سمك لبن تمر هندي
حد له حاجة عندي
القرض اللي كان حرام
بقي دلوقتي مسموح
واللي هيعارض النظام
هايرجع بيتهم مجروح
أو أهله هيلاقوه في المشرحة
غرقان في دمه مدبوح
واللي كان عند القصر
يدوب بس حلاوة روح
سمك لبن تمر هندي
حد له حاجة عندي
م الصندوق خدت الشرعية
مش مهم بكام في المية
المهم إني جيت
ولحد هنا بخ يا ديمقراطية
آدي إعلان مش دستوري
هاقضي بيه عالقضاء
منا كنت شغال في ناسا
وبعمل ابحاث في الفضاء
أصلهم زودوها معايا
وكل شوية يلغولي قرار
فاكرني بلعب معاهم
طب بجد ومافيش هزار
كل قراراتي محصنة
ومافيش حاجة اسمها اختيار
سمك لبن تمر هندي
حد له حاجة عندي
بخصوص إني سعيت للسلطة
عاوز أوضح حاجة بسيطة
أنا عمري ماسعيت لمنصب
ولا أجمع في إيدي السلطة
وكل اللي بيحصل دلوقتي
هو بس خلاف عالتورتة
علشان كلناها لوحدنا
ونفضنا لكل المعارضة
واللي استفتاء الدستور
هايخلص عليهم بالقاضية
سمك لبن تمر هندي
حد له حاجة عندي
أهلي وعشيرتي
نفسي أحضن كل واحد
بس الموضوع صعب
وآخر كلامي ليكوا
خبوا جهلكم بالحب
--
* تكبير وهتافات تأييد
--
( 2 )
رد الثوار
*بص يا ريس خليك فاكر
إنك أصلا كنت استبن
لولا شباب مصر الثائر
كنت هاتفضل مرمي في سجن
وافتكر إنك قبل الثورة
إحترمت رموز الوطني
ومحدش نزل ينافسهم
من جماعتك عالكرسي
ومأعلنوش إنكوا نازلين
الميدان يوم 25 يناير
اللي شباب مصر الثائر
هز بهتافة الكرسي
كلمة أخيرة وفيها نصيحة
خليك فاكرها يا د.مرسي
حبنا للموت بكرامة أكبر
من حب جماعتك للكرسي
وبص اللي قابلك فين دلوقت
كلامنا خلص يا د.مرسي
a_mohmady@yahoo.com ///
ليست هناك تعليقات:
إرسال تعليق