* بقالي كتير ما شفتش عمنا الفهيم ولا كلمته علي شان كان مشغول جدا ومحبتش ازعجة بس وحشني قوي روحت ماسك الموبايل علي شان اتصل بيه وأعرفه إني جاي لو عنده وقت ومش هاطول عليه لقيته بيرحب بيا أوي وعلي غير العاده بيقولي " ازيك يا أخ أحمد " اشتغربت جدا وفكرت اني اتصلت بحد تاني فبصيت في الموبايل لاقيت اسمه مكتوب وهو صوته أمال إيه حكاية اخ دي روحت ساله قالي : إنت مالك مستغرب كده ليه دا احنا شعب متدين بطبعة يا أخي قولتله آآآآآآآآآآآه متدين بطبعه وعلي شان كده
- لو أي حد شاف أي عيل بيلعب في المسجد ما بيعرفوش إن كده غلط ويخده يصلي جنبه ويعرفه إن للمسجد ليه حرمه إنما يروح مزعقله وضربة ويطلعه برا المسجد كمان ودا لو كان ابوه مش معروف او علي قد حاله إنما لو كان تبع حد كبير في المنطقة بيبصولوا ويضحكوا .
- ولا علي شان في ناس بتقضل واقفة مستنية الجنازة لما تخرج من الجامع علي شان تروح تدفنها ومادخلتش تصلي عليها ؟
- ولاعلي شان أسهل حاجة عنده سب الدين في أي مكان وفي أي وقت ؟ حتي في المقابر وأعرف ناس سبت الدين في بيت الله الحرام كمان .
- ولا علي شان الجوامع اللي بتفضل فاضية في صلاة الفجر مافيش غير ستة سبعه بس اللي بيصلوا وباقي الناس نايمة ؟
- ولا علي شان في أول رمضان بتلاقي الجامع مليان علي أخره وكل يوم يفضل يقل لحد ما توصل للعشر الآواخر اللي كان الرسول – صلي الله عليه وسلم – يكثر من العبادة فيهم ويوقظ اهله ماتقليش عشر اللي كانوا بيصلوا في الجامع ؟
- ولا علي شان أسهل حاجة عندنا استخدام الدين في الحياة وفي أي حاجة والموضوع دا قديم مش من اليومين دول وأكيد طبعا انت فاكر الإعلانات اللي عملتها وزارة الصحة علي شان تحارب التدخين وديما تنهي الإعلان بقولة تعالي : " وَلاَ تُلْقُواْ بِأَيْدِيكُمْ إلى التَّهْلُكَةِ " مع إن سياق الآية غير كده خالص الآية بتقول : ﴿وَأَنفِقُواْ فِي سَبِيلِ اللّهِ وَلاَ تُلْقُواْ بِأَيْدِيكُمْ إلى التَّهْلُكَةِ وَأَحْسِنُوَاْ إِنَّ اللّهَ يُحِبُّ الْمُحْسِنِينَ﴾ يعني التهلكة اللي في الآية هي عدم الإنفاق في سبيل الله مش زي الوصف الحكومي للآية خالص .
- ولا انت قصدك إن لما تيجي تكلم حد بالحكمة والوعظة الحسنة وتحاول توصل معاه إن اللي بيعمله دا مش صح وإن النبي – صلي الله عليه وسلم – معملش كده يروح رادد عليك بكل تناكة ويقولك : " يابني أنا ملتزم وانت لسه عيل من أيام لما كنت لسه بتقول " شرشر نط أكل البط " بقي جاي دلوقتي تعلمني إيه الصح وإيه اللي مش صح ألعب بعيد يا شاطر .
- ولا يكونش قصدك علي اللي يبيقي داخل يصلي ومش هاين عليه يرمي السجارة اللي في إيده وعلي عينه لو رماها ولسه فيها نفسين ؛ مع إنه سامع الآذان وعارف إن الصلاة هاتقوم قبل ما يخلص السيجارة وبرضوا بيولعها !!! .
- ولا قدك علي الخناقات اللي بتحصل في الجامع من بعض الناس لو المؤذن اتاخر شوية في إقامة الصلاة والحجج طبعا معروفة إن في وقت لازم كلنا نمشي عليه ونكون ملتزمين وعلي شان الشعل واللي وراه مشوار واللي ... واللي ...
- ولا يكونش علي شان أكتر حديث الناس حفظاه : " إذا أم أحدكم الناس فليخفف " وبننسي أو نتناسي إن الخشوع روح الصلاة وإن الرسول – صلي الله عليه وسلم – لما شاف الراجل ينقر في صلاته أمره إنه يرجع يصلي علي شان هو كده ماصلاش .
قالي إيه ياعم دا كله إنت ما صدقت تتفتح ولا إيه ؟ ما احنا بنقول إن الطفل المصري أذكي طفل في العالم لحد ما يدخل المدرسة عادي يعني عديها أهو أي كلام بيتقال ومحدش معاه دليل ، واحنا بنتمتي إن أي حد بتكلم بعد كده يبقي معاه دليل علي شان نبقي فهمين هو بيعمل كده ليه وإيه دليله ماشي يا عم أحمد . ضحكنا إحنا الاتنين وقبل ما تنتهي المكالمة قالي : " ماتيجي تشرب معايا الشاي " .
A_mohmady@yahoo.com ***
A_mohmady@yahoo.com ***
ليست هناك تعليقات:
إرسال تعليق