* يطاردني سؤال ولا أجد له الرد الشافي في معظم الأحوال إن لم يكن كلها ؛ والسؤال ببساطة يتلخص في ما قالة الفنان حماده هلال ولا أعرف من الأغنية سوي هذا السؤال فأنا لست من متابعي هلال والسؤال هو " ليه كل حاجة حلوة عمرها قصير ؟ " فسؤالي هو ليه ؟ وإن شئت أن تتفلسف وتبدو أنيقا في سؤالك فقل لماذا ؟ بس أنا هافضل أقول ليه ؟ نقطة ومن أول السطر يا عمنا بقي عشان نجيب ليه من أول الثورة ولا أقولك إحنا لو جبنا من أول الثورة هانحتاج كتاب فاحنا هنقول ليه شوية مقتطفات من ليه كده بس ونبتدي بالجيش أو المجلس الأعلي للقوات المسلحة دلوقتي بس من غير الفاظ خارجة ! اتفقنا يا عمنا ؛ يلا نبتدي .
ليه الجيش المصري لم يفعل كما يفعل الجيش الليبي أو اليمني أو السوري من قتل للمتظاهرين وحماية الرئيس ؟ وطبعا إحنا إتفقنا من غير الفاظ وعلي الرغم من إحمرار عينيك وبعيد عن الألفاظ أسمعك بتقولي : " يا جدع أحمد ربنا علي اللي إحنا فيه يعني إنت عاجبك الي بيحصل في البلدان الي أنت قولتها دي ماتتبطرش علي النعمة بقي وبعدين الجيش دا من الشعب وللشعب وعمره ما كان هايضرب المتظاهرين " وأقولك بقي مدام هو من الشعب وللشعب يبقي ليه كل البطء أو التباطؤ اللي إحنا فيه دلوقتي ؟ ليه لحد دلوقتي في ناس في السجون العسكرية ؟ ليه في محاكمات عسكرية للمتظاهرين ؟ ليه محدش طلع يكلمنا عن الي حصل في كلية الإعلام جامعة القاهرة ؟ ليه محدش كلمنا عن الي حصل في التحرير من فض الإعتصام وأحداث البالون وغيرها من الأحداث ؟ ليه اللواء محسن الفنجري اتكلم في آخر بيات تليفزيوني بهذه الطريقة ؟ ليه اللواء محسن الرويني بيقول إن تميم البرغوثي مش مصري ومش من حقة التدخل في شئؤن مصر هي فلسطين دي فين ؟ وبعدين هو من أم مصرية وأب فلسطيني وطفولته ونشأته في مصر وميدان التحرير تغني بشعره كما تغني بشعر عمنا أحمد فؤاد نجم والمبدع الشيخ إمام يبقي ليه ؟ وليه نظرتة للأدب النظره دي ؟ وليه الرساله 69 من المجلس الأعلي للقوات المسلحة ؟ وليه أسلوب التخوين ؟ وليه يتعمل إستفتاء علي المرشحين المحتلمين للرئاسة علي صفحة المجلس الأعلي للقوات المسلحة علي الفيس بوك ؟ وليه نسمع إن الجيش هايعمل جنازة عسكرية لمبارك إذا مات قبل إدانته ؟ وليه عملنا إستفتاء مدام في إعلان دستوي كان جاهز ؟ وليه القوانين الي بنسمع عنها فجأة دي ؟ وليه مااتحطش ماده لشرعية المجلس الأعلي للقوات المسلحة لإدارة شئون البلاد ؟ ليه كل هذه الحورات مع القوي الوطنية التي هي في الأساس عديمة النفع وشاركت في الفساد مع النظام السابق ؟ وليه عدم الإهتمام بالشباب ؟ ليه ... ؟ وليه ...؟ والف ليه ... ؟ كل هذه الأسئلة تدور حول القوات المسلحة بإعتبارها المسئول عن أمن أمان الوطن في الداخل والخارج في هذه اللحظة الفارقة من تاريخ الوطن فهل سننتقل للديمقراطية أم أن مباديء ثورة يناير ستضيع كما ضاعت ماديء ثورة يوليو ! وطبعا السؤال هايفضل – بالنسبالي علي الأقل – ليه ؟ وكل عيد ثورة وإنتوا طيبين .
ليست هناك تعليقات:
إرسال تعليق