*
حظي المنيل إني نسيت أعمل الموبايل علي وضع الصامت وجاني صوته الهادر الآثر
ترررررررررررن تررررررررررن تررررررررررن صحيت قلقان طبعا علي شان محدش هايتصل بيك
الساعه 6 الصبح إلا لما يكون في كارثة بشرية
أو معجزة كونية حصلت وعلي شان زمن المعجزات ولي من زمان لقيتني برد علي التليفون
من غير ما ابص مين اللي بيرن
=ألو ... مين ؟
-مين إيه يابني هو أنت حد يعرفك غيري
=اصبطحنا وصبح الملك لله فيه إيه يا عمنا إنت
مش كنت عندي بالليل في حاجة حصلت
-لأ مافيش قوم خد دش والبس عشان نروح الكلية
!
=كلية إيه دلوقتي الساعة لسه 6 الصبح إنت
بتهزر صح ؟
-لأ مابهزرش وبتكلم جد الجد كمان
=بقولك إيه ماكملتش ساعتين نايم ففكك مني ع
الصبح ، وبعدين إنت رايح تعمل إيه في الكلية أساسا ؟
-يابني في محاضرة الساعة 8
=بتقول إيه ؟
-بقولك في محاضرة الساعة 8 إنت وقاقع علي
ودنك ولا إيه ؟
=وحياة أمك ! بقي أنت مصحيني الساعه 6 الصبح
عشان تقولي إن في محاضرة وبعدين من إمتي أساسا وانت بتطلع المدرج غير في
الإمتحانات ؟
-من دلوقتي يا سيدي
=إشمعني يعني ؟
-مافيش بس أكيد مشكاحة بتحضر وعاوز اشوفها
=ياعم أنا مالي ومال مشكاحة بتاعتك دي وبعدين
إنت عاوز تحضر عشان تشوفها هاحضر ليه بقي إن شاء الله عشان بعد الشر يعني أفهم
كلمتين ولا عشان أبقي إريل ؟ توضيح المواقف واجب يا كبير .
-يابني إنت أكيد هاتفهم إنت مش غبي ولا حاجة
بدليل إنك فهمت أنا عاوزك ليه
=بقولك إيه فكك مني عالصبح مش ناقصة محاضرات
وفين كلامك عن الناس اللي بتحضر وعملتلي فيها أحمد عكاشة وعملت دراسة تحليلة
لأنواع الطلبة في الكلية ومعرفش إيه ؟ فاكر الكلام بتاعك ولا ناسية ؟
-أكيد فاكره طبعا
=طب قولهولي كده يمكن تعقل وترجع عن الكلام
اللي انت بتقوله دا
-بص يا سيدي ويارب ماتنمش مني قولتلك قبل كده
إن الطلبة في الكلية ليهم تشريح تحليلي
= إنجز
-في طالب البينج الأول ودا حلمة إنه يطلع
الأول علي الدفعة علي شان يتعين معيد وطبعا بيبقي مكروف من ناس كتير طول السنة
وأول ما الإمتحانات تقرب كله بيجري عليه عشان ياخد منه ورق المحاضرات ، في طالب
كان نفسه تقريبا إنه يشتغل جنايني – مع كامل الإحترام للمهنة الجنايني - بس محصلش
نصيب فتلاقيه علي طول قاعد في الجنينة وعايش في دور الشاب الروش وعمال يلاغي في
اللي رايحة وعاوز يكلم اللي جاية دا غير المقاطيع اللي قاعدين معاه ، وفي طالب
ينطبق عليه المثل الشعبي الشهير " اللي رقصوا علي السلم ... " دا تايه شوية تلاقيه في المدرج
وشوية تلاقيه في الجنينة ماتعرفلهوش سكه تدخله منها ، وفي طالب كل علاقته بالكلية
يدوب شهر الإمتحانات بيجي يصور الورق من أخوه بتاع البينج الأول ويجي يمتحن وبيكلم
حد يجبله النتيجة كمان ودا طبعا بيبقي نكره في الدفعه بتاعته ولا حد بيعرفه والناس
كلها بتسأل هة مين دا ؟ دا معانا في الدفعة ؟ ودا علي عكس طالب الاتحاد اللي بيبقي
عارف الكلية كلها – تقريبا – ودول نوعين ناس فاهمة هي بتعمل إيه ودول بقي قليلين
اليومين دول ونوع بيعمل اللي بيتقاله يعمله بس هو فاشخ ضبه وخلاص وفرحان إنه في
الاتحاد طب استفاد إيه ولا حاجة ؟ علي رأي المثل الشعبي : " كإنك يا أبو زيد
ما غازيت " . آدي ياسيدي التحليل الشريحي للطلبة في الكلية عشان تعرف إني
ذاكرتي كويسة مش زي ذاكرة السمك ولا حاجة .
=نسيت نوع من الطلبة
-اللي هو إيه ؟
=النوع اللي ملهوش فيها ؟
-إزاي يعني مش فاهمك
=دي ياسيدي نوعيه من الطلبة بتبقي حاجة كده
مكس بيروح الكلية بس الضهر يفطروا ويقضوا اليوم الجميل ويقعدوا يلفوا علي رجليهم
ويتعرفوا علي خلق الله ويتصوروا وآخر اليوم علي الفيس بوك يقعدوا يرفعوا الصور
ويبعتوا إضافات لناس مايعفوهاش وعلاقتهم بالدرسة زي علاقتهم بالدوري المصري بيعرفوا
المواعيد بالصدفة
-طب يلا قوم إلبي عشان نروح نحضر
=الله يسامحك ع الصبح طيرت النوم من عين
الواحد
-هاقبلك بعد تلتايه أوك
= أوك سلام
ليست هناك تعليقات:
إرسال تعليق