الأسطورة – الأسطورة : هو الشيء الذي تم
تسطيرة أي كتابته وليس مجرد خرافة كما هو شائع لدينا - بتقول : " لو في واحد
قالك إن في حاجة غلط ماتصدقهوش علي طول ولو في إتنين قالولك نفس الحاجة فكر في
الكلام ولو أكتر من كده يبقي أكيد في حاجة غلط " ودا بالفعل اللي حصل معايا ،
ناس كتير جدا قالتلي :
إنت خاسس كده ليه يا بني ؟
إيه يابني خسيت يخربيتك ! هما بياكلوا أكلك
ولا إيه ؟
إنت مش من النوع المنفسن بس خاسس قوي ؟ ما
بتكلش ولا دي حالة نفسية ولا ايه بالظبط ؟
إيه يا أحمد مالك خاسس كده ومش عاجبني ،
يابني كل شوية عشان تتخن عاوزين نجوزك ؟ !
إنت هاتفضل تخس تخس لحد ما تخطفي كده يابني !
إحرم نفسك شوية ؟
اتكرر معايا الكلام دا أكتر من مرة الفترة
الأخيرة ، وفعلا من كتر ما بسمع الكلام دا جالي إحساس إني خاسس فعلا وعلي شان كده ققرت
إني أوزن نفسي واتأكد من كل الكلام اللي عمال بسمعه واكتشفت الحقيقة .
أول مرة كنت أوزن فيها نفسي مش فاكر إمتي
بالظبط وكان في صيدلية في المنطقة في الفترة اللي انتشرت فيها فكرة الريجيم
والتجسيس عند الستات وكان في طفرة ملحوظة في الصيدليات وكل ماتدخل صيدلية تلاقي
ميزان في وار الباب لحد ما خددت وقتها واختفت كالعاده .
من حوالي 3 أو 4 سنين كده وزنت نفسي عند نفس
الصيدلية – علي ما افتكر – وكنت حوالي 62 كيلو جرام وطبعا فكرت إني أروح الجيم
واتمرن كويس عشان أبقي زي درفة الباب بس هو شهر واحد في صالة الحديد وماكررتهوش
تاني بس الحقيقة استفدت فيه كتير جدا وكنت في قمة اللياقة البدنية .
ولإني كسلي بطبعي كنت بأجل موضوع إني أوزن
نفسي وكانت الحجة طبعا إن الميزان اللي لسه موجود في الصيدلية اللي جنبنا اتهرس
100 مرة وبقي غير صالح للإستخدام وموجود بس حلاوة روح أو لزوم الديكور وبالصدفة
البحتة – الصدفة بتلعب في حياتي دور كبير جدا جزء قليل منه بيبقي في صالحي وجزء
قليل برضوا بيكون ضدي – كنت عند واحد صاحبي وكان عنده ميزان فشغلته وطلعت عليه
لقيتي 59.8 كيلو جرام . يعني ماخستش ولا حاجة وأكيد محدش عينه هتلاحظ ال 2 كيلو
دول ودا طبعا كان واحد من العوامل اللي خلتني أتأكد إن ما فيش حاجة ثابتة ومش كل
كلام الأساطير صح .
وأحب اختم بحاجة فطستني علي نفسي من الضحك
لما قالتلي صديقة أكبر مني - مش بكتير أوي
– إني لما اتجوز هاتخن ولما سألتها إيه السبب قالتلي : عادي يعني باين علي جسمك .
وماردتش ارخم عليها – كعادتي – وفضلت أضحك وافتكرت الأسطورة اللي بتقول : لو في
واحد قالك إن في حاجة غلط ماتصدقهوش ... " .
A_mohmady@yahoo.com
ليست هناك تعليقات:
إرسال تعليق