فزورة شقية صغيورى
والحل بتاعها خطير
ركز معايا علي شان
الموضوع بجد خطير
أصل أنا كنت إمبارح
في ميدان التحرير
وافتكرت شباب كان هناك
واقف بيقول تغيير
اتجمعوا من غير ميعاد
وهتافهم كان تغيير
من هنا كانت البداية
من ميدان اتلحرير
--
بالليل جت الأوامر
لازم تخلوا الميدان
غروقهم بالميا
اضربوهم بالعصيان
عرفوهم إن احنا
في إيدينا الأمن والأمان
والبلد مش بلدهم
فاكروهم بأيام زمان
فقام وبكل عزمة
العسكري الغلبان
اللي فاكر إنه كده
بيحمي حمي الأوطان
وضرب الشباب العميل
واللي لبلده خان
ونزل يطلب بالتغيير
في سلمية ... فاتهان !
--
وقف الشباب صامد
شجاع وماخفش
ضربوه بالرصاص الحي
وقبله كان خرطوش
ولما غلب حمارهم هربوا
ونزلولهم الجيش
استقبلهم بالورود
وقسموا معاهم العيش
ونزل المشير يتمخطر
مبسوط علي الكورنيش
وفضل الشعب في ميدانة
معتصم ما بيمشيش
دخلوا عليهم بحصنة وجمال
أمال كان فين الجيش ؟
والدم بقي علو جبال
والخوف خلاص مافيش
ما كفاية ذل وإهانة
في طوابير العيش
وبعد طول انتظار دخل الجيش
في النص وفض الإشتباك
بعد يوم عصيب
وحالة ارتباك
بسبب الحيوانات
اللي ودوها هناك
علي شان يمشوا الشباب
فكانت ليهم هلاك
واتجمع ناس كتير
وقالوا : يرحل مبارك
وكان صوتهم زئير
في الميدان هناك
" ارحل يعني إمشي
ياللي مابتفهمشي "
وأخيرا رحل وغار
بس يابلنا المشير
وبكل صفو نيه
سلملة الشعب الأمير
وتحتفل بليلة النصر
وساب ميدان التحرير
واداله فرصة عمره
بس للأسف ... عسكر
يا ما سقونا الويل
والصبر عمال يتكرر
سنين طويلة صابرين
ومافيش وقت نتأخر
هتفوا بعلو صوتهم
يسقط يسقط حكم العسكر
يسقط كل خسيس وجبان
واللي بإيده باع أوطان
يسقط كل قليل الأصل
مسك الصورة وساب الأصل
يسقط كل غبي متآمر
وباحلمنا بقي بيتاخر
باعوا ثورتنا واشتروا فيها
وشهيدنا ... مالهوش قاتل !
عروا بناتنا وناس استغربت
وقالت : إيه وداهم هناك ؟
حرقوا خيامنا واجرءوا
حاكمونا محاكم هلاك
والسجن بقي للثوار
والبيادة ليها السيادة
وعجلة الإنتاج نفخوها
وبدقونهم دوروها
خونوا كل الشباب
لأ بصراحة بعضهم
وقسموهم علي مزاجهم
وسفهوا رأيهم
ودلوقتي دايرين في متاهه
ومافيش حد جنبهم
علي شان باعوا الناس زمان
فمحدش تاني هيآمنلهم
--
لو عرفت إيه الإجابة
أنا في زنزانة عسكرية
دا لو كنت عايش
وخليك ديما فاكرها
إن الثورة شعارها
عيش
حرية
عدالة إجتماعية
8/4/2012
ليست هناك تعليقات:
إرسال تعليق