أوعلي يا بكره تيجي
وجليك بعيد
خايف بكره يجي
وألاقيه عنيد
زي النهارده وإمبارح
وأول ومافيش جديد
مش كتر الفشل
مابقتش عارف طعم النجاح
وأي حاجة بتيجي بتروح
مع اللي راح
بقيت أخاف من النوم
لفشل تاني يوم
ولما أصحي
بتألب في سريري
وأعمل نفسي نايم
خايف أقوم وأبتدي من تاني
وأفشل برضوا من تاني
الضحكة اللي كانت ملزماني
بقيت أطلبها بالتليفون
مرة الشحن يفصل
ومرة الشبكة ماتجمعش
ومرة الرصيد يخوني
وأرجع أدور علي ضحكة
في صورة قديمة
معرفش نفسي
أنا كنت ده
وإيه خلاني كده
سمعت صوت بيقولي :
الحزن والخوف
يعملوا أكتر من كده
بص كويس للصورة
وافتكر نفسك زمان
ياما كنت للناس
مصدر الأمان
دلوقتي حزنك همشك
وخوفك خلي الناس تطنشك
ماتخفش من بكره لأنه جي
والفرح برضوا مسيرة جي
دا مهما الدنيا لطشت معاك
هاتفرج في يوم
ومهما حزنك غرقك
هاتوصل لبر الأمان
لما تتحداه بإبتسامة
وتكسر وراه قله
وتقوله ملكش مكان في قلبي
وكفايه بقي ندامة
خش استحمي
وغير هدومك
وقول للدنيا : مهما هاتكسريني
هافضل أعافر
وهاوصل في يوم
لشط النجاة
ليست هناك تعليقات:
إرسال تعليق