*كلنا عارفين إن الشعب المصري ابن نكته وبيضحك علي العفريت والشارع المصري مليان حكاوي ونوادر وقصص وحكايات وحصريات وكل اللي قلبك يحبه وعلي رأي المثل " علي كل لون يا با تسيتا أو يا طيسطا " مش هاتفرق كتير بس هتلاقي من كل حاجة وفي حاجات طبعا عندنا ومبس ومش هتلاقيها في أي حته تانيه يعني خد عندك علي سبيل المثال لا الحصر :
*عندنا وبس تلاقي وزير إعلام .
*عندنا وبس الناس تركب السلم الكهربائي وتطلع تجري عليه .
*عندنا وبس ماتسمعش عن أي موقف تاخده الحكومة .
*عندنا وبس رئيس الوزراء علي طول مسافر .
*عندنا وبس اللي مش معايا يبقي ضدي ومعاه أجندة .
*عندنا وبس الناس تواجه الشرطة وخايفة من تزوير الإنتخابات .
*عندنا وبس تلاقي جدار عازل علي شان تحمي سفارة .
*عندنا وبس دم المصريين – وإسألوا اللي استشهدوا علي الحدود – .
*عندنا وبس مباريات الكورة بتبقي ساحات للقتال بين الجماهير والشرطة .
*عندنا وبس لو وقفت علي دماغك مش هاتعرف تفاصيل أي حاجة لأن ما فيش مسئول عنده الشجاعة يخرج يصارحك بالحقيقة .
*عندنا وبس مافيش مسئول بيتحمل المسئوليى كاملة ومع أي مشكلة يقولك آدي الإستقاله .
*عندنا وبس مافيش تحديد أدوار لأي حاجه يعني لحد النهارده الناس مش عارفة حكومة الدكتور شرف دي حكومة إنقاذ وطني ولا حكومة تيسر أعمال .
*عندنا وبس تلاقي الدعايا الإنتخابية مغرقة الدنيا والميعاد بتاع الإنتخابات ما اتحددش أصلا .
*عندنا وبس في ديما إيد خفية بتفتعل الأحداث وما حدش يعرفها لحد دلوقتي ! .
*عندنا وبس الأسلحة أكتر من البني آدمين وطبعا فاكرين اللجان الشعبية .
*عندنا وبس لما ما كنش في ولا عسكري في الشارع ما كنش في ولا مشكلة ! .
*عندنا وبس أي حاجة بتحصل في البلد دلوقتي الثورة السبب فيها حتي لو واحد طلق مراته
*عندنا وبس تلاقي واحد زيي يكتب الكلام ده .
*عندنا وبس واحد زيك يقرا الكلام دا ويضحك عليه أو يمصمص شفافية من الغيظ .
*عندنا وبس ... عندنا وبس ... عندنا وبس ...
مش أنا قولتلك علي سبيل المثال لا الحصر وإلا هاتقعد نكتب كتير أوي
_ عاشت مصر حرة بسواعد أبنائها .
هناك تعليق واحد:
جامدة اوي , لكن اكتر من جامدة .. حقيقية .
:)
إرسال تعليق