* " العالم كله اتغير بعد 11 سبتمر مش عاوز ذمة القرموطي تتغير " الجملة اللي قالها أحمد آدم أو القرموطي للراجل بتاع الدش لما راحله علي شان ياخد الفلوس ، الجملة علي الرغم من بساططها إلا إنها معقدة جدا وبوشين كمان الوش الأول الوش الحقيقي للجملة أو الوش الصادق وهو إن العالم اتغير أمريكا نفسها اتغيرت بعد 11 سبتمر وكان هدف قوي ليها جدا إن هي تدخل العراق علي شان البترول وكانت الحجة والهمية إن العراق فيها أسلحة دمار شامل مع إن الدكتور البرداعي نفي الكلام دا في مجلس الأمن قبل الغزو الأمريكي للعراق باسبوعين وعلي شان كده خد جائزة نوبل للسلام بالإضافة إلي إن أمريكا شنت حملة ضد الإسلام لتشويه صورته اللي اتكفلت الجماعات الإسلامية بتشويه بحمل السلاح وتفجير السائحين وخلافه في مطلع التسعينيات وطبعا ما ننساش الجمله الشهير للمخلوع في الأقصر " أنتوا أكيد بتهزروا " ومن بعدها خلي حبيبه وزير للداخليه .
والوش التاني للجملة المختفي او الوش الكاذب هو إن العرب اتغيروا ودي أسخف حاجة ممكن تسمعها في حياتك حتي بعد قيام الثورات فيما يعرف بالربيع العربي لإن الغرب لسه بيلعب معانا نفس اللعبه اللي بيلعبها زمان " القس الفلاني سيحرق المصحف في الميدان الفلاني " & " المصحف في القمامة يقدم للجنازير " & " الصحيفة الفلانية تنشر صور مسيئة للرسول – صلي الله عليه وسلم – مقدمة هدية من الفنان الفلاني " وهكذا وهكذا ويطلع المسلمين في وطنا العربي يشجبوا وينددوا ويحرقوا الأعلام ويقتحموا سفارات مع إن الموضوع في الأساس واحد تافه عاوز يتشهر واحنا طبعا ما نتوصاش بنروح مقدمينله الموضوع اللي هو عاوزة علي طبق من فضة وفي لحظات معدودة يكون اسمة معروف في العالم كله وهو دا اللي بيحصل بالظبط اليومين دول في الفيلم المسيء – للرسول صلي الله عليه وعلي آله وصحبه وسلم - .
سمعت معلومات إن الواد المؤمن هو اللي عرض الموضوع من خلال برنامجه علي قناة الناس واللي ناشر الفيلم كمان علي اليوتيوب قناة إسلامية ولإني ماشفتش الفيلم ومش عاوز أشوفة ولا أشوف أي لينك ليه بس عرفت من الناس اللي شافته إن فيلم مايسواش تلاته تعريفة والإنتاج بتاعه منيل بستين ألف نيله وبمناسبة الإنتاج الهولندي للفيلم الناس دعت للنزول أمام السفارة الأمريكية للتنديد بالفيلم ! ودا طبعا راجع بإعتبار إن أمريكا هي راعيه الكفر والإلحاد في العالم وحصل تهجم علي السفارة وإنزال العلم الأمريكي واحراقة كمان ومخلصناش علي كده اللي جسد دور سيدنا محمد – عليه افضل الصلاة والسلام – في الفيلم بقيت صوره منتشرة علي موقع التواصل الاجتماعي الفيس بوك ولو عاوز تعمله اتفو دوس لايك ولو عاوز تشتمه اشتم في كومنت ! دا كلام الناس حققت اللي هي عوزاه من الفيلم اللي ماتصرفش عليه لا في انتاج ولا حتي الترجمة اللي مش معروف مين اللي قام بيها ! وكل دا طبعا بسبب عبقريتنا في التعامل مع الحدث لاننا غيبنا عقلنا وانسقنا وراء أي حاجة بتتقلنا أوي أي كلام ومعظم الناس ولا كانت هاتعرف حاجة عن الفيلم إن ماكنش كلهم لولا العبقرية الاعلامية للواد المؤمن اللي طلع في دور البطل في الدفاع عن سيد المرسلين – صلي الله عليه وسلم – والقناة الاسلامية علي اليوتيوب اللي نشرت الفيلم وكل اللي حط اللينك علي شان يعرف الناس إن في واحد سب الرسول – صلي الله عليه وسلم – وطبعا لازم يشتم كام شتيمة وبعد كده يعتذر للناس اللي عنده بس هو خرج عن شعورة علي شان الموضوع كبير والكلام دا مع إن الرسول – صلي الله عليه وسلم – لما كفار كريش عذبوه وخرج من مكه وذهب للطائف يدعوا إلي الله وأطلقوا عليه الصبيه وجاءه جبريل ومعه ملك الجبال لم يدع علي قومه بل دعا لهم بالهداية وقال – صلي الله عليه وسلم - : " اللهم اغفر لقومي فإنهم لا يعلمون " لإنه ببساطة لما سؤلت أمنا عائشة عن أخلاقه ردت علي السائلين : أنه كان خلقه القرآن . وأي حد عنده ذره عقل وكان شاف الفيلم دا كان كفي علي الخبر مجور وعمله ريبورت وريح نفسه وريح الجميع لإن الموضوع منتهي من زمان ويعرفة أبسط واحد ماشي في الشارع لو روحت تقوله إن فلان بيقول عليك كلام مش حلو هايرد عليك ويقولك : " ما شتمك إلا من بلغك " .
ليست هناك تعليقات:
إرسال تعليق