الشعب الوحيد في العالم

في برنامج " مصري أصلي " للمبدع دائما " عمر طاهر " أعاد مقولة أبو القدا " مصطفي كامل " : لو لم أكن مصريا لوددت أن أكون ... " ودا كان سؤال بداية كل حلقة إنما قبل ما تجاوب علي السؤال أو حتي تفكر إنك تتريق عليه لازم تعرف إننا متفردين من بين العالم بحاجات معينه هاتبتدي كلها بإحنا الشعب الوحيد في العالم ودا اللي شايفة لحد دلوفتي :

·        إحنا الشعب الوحيد في العالم اللي بيطلع أو ينزل يجري علي السلم الكهربي .

·        إحنا الشعب الوحيد في العالم اللي متدين بطبعه ومع كده بنلاقي خناقات لرب السما في الجوامع علي أتفه الأسباب زي إنم تشغل المروحة أو تطفيها ، أو إن الإمام اتأخر شوية في إقامة الصلاة ، أو ... أو ... أو ...

·        إحنا الشعب الوحيد في العالم اللي بيتفشحر إن بلده بتتسرق وبنعتبر إن دا علامة الجودة للبقاء وديما نقول : " البلد دي فيها خير مالهوش آخر والدليل إن البلد دي بتتسرق من أيام الفراعنة وبرضوا الناس اللي فيها لسه عايشين ! " .

·        إحنا الشعب الوحيد في العالم اللي عمل ثورة في 18 يوم وبعد كده روح من غير ما الثورة تحكم أو تنفذ أي حاجة من اللي خرجت الجماهير تطالب بيها !

·        إحنا الشعب الوحيد في العالم اللي بيتريق علي أي حاجة ولو ملقناش حاجة نتريق عليها بنقعد نتريق علي نفسنا !

·        إحنا الشعب الوحيد في العالم اللي الشهداء ماتوا لوحدهم ولحد دلوقتي ما نعرفش مين اللي كان السبب إنهم يبقوا شهداء !

·        إحنا الشعب الوحيد في العالم اللي بيستغل المناسبات العامة والأعياد الدينية في التحرش الجنسي وباقي السنة بنتحرش ببعض فكريا وسياسيا

·        إحنا الشعب الوحيد في العالم اللي بتلاقي فيه مسلمة بتقول لاختها المسيحية : " كل سنة وانت طيبة " والمناسبة عيد الأضحي ! ودا حصل قدام عيني

·        إحنا الشعب الوحيد في العالم اللي بنشغتل بمعدل 24 دقيقة في اليوم

·        إحنا الشعب الوحيد في العالم اللي حصله منه علي جائزة ونوبل لازم يتقال عليه إنه خاين أو عميل وممكن الأمر يوصل لدرجة الكفر كمان

·        إحنا الشعب الوحيد في العالم اللي مابيعرفش كاتب أو مفكر أو عالم إلا لما يموت فنشوف ونسمع خبر وفاته

·        إحنا الشعب الوحيد في العالم اللي علي الرغم من أجهزة المخابرات عنده إلا إنه واقف عاجز قدام " الطرف التالت " اللي ديما بيتسبب في كل خراب

·        إحنا الشعب الوحيد في العالم اللي بيكسل يعمل شير لجملة أو مقولة لفلان والمصيبة إنه بيكتبها من غير ما يقول صاحب الجملة !

·        إحنا الشعب الوحيد في العالم اللي بيتفنن إنه يقضي علي التراث أو أي حاجة حلوة وأكيد سمعت أغاني شعبي لأم كلثوم والجديد طبعا مهرجان " أنا في اللابويا " !

·        إحنا الشعب الوحيد في العالم اللي لما اختفت الشرطة ما حصلتش أي حوادث من سرقة أو تحرش أو ... أو ... أو ... !

·        إحنا الشعب الوحيد في العالم اللي انتخب رئيس لبلده من غير ما نعرف إيه صلاحياته

·        إحنا الشعب الوحيد في العالم اللي بيفرغ كل الشحنات الموحبة والسالبة عنده من " فرح ، حزن ، تضامن ، نفاق ، فراغ ، و خوف ، ...... " في الأكل

·        إحنا الشعب الوحيد في العالم اللي علم الشعوب العربية والإسلامية القرآن الكريم وكفاية إنك تقول في أي مكان اسم الشيخ " عبد الباسط عبد الصمد " وعلي الرغم من كده مابقيناش نسمعهم وبنسمع مقرئين الخليج !

لو عرفت حاجات تانية إحنا متفردين ومنفردين بيها علي مستوي العالم ما تبخلش عليا وعرفهالي .

A_mohmady@yahoo.com