عندك قلب !

لما أشوف طفل بيضحك

ببقي فرحان ومبسوط

ولما أشوف غيره بيبكي

هابقي حاسس إني هاموت

ماتقولش عليا رومانسي

ولا بحب أعيش الموت

الموضوع ببساطة

إني عندي قلب

وأتمني لكل الناس

إنها تحب وتتحب

وكل الأطفال تضحك

ولا طفل يبكي

عرفت ليه لما بشوف

طفل بيبكي ببكي

ضي العين

الحكاية بسيطة وفي كلمتين

يا مصر إنت ضي العين

ولو فقدت علينا الإتنين

أنا عمري ماشفتك بالعين

أنا بشوفك بإحساسي

وع الحال دا من سنين

ومهما حصل فيكي

إحنا ولادك وصابرين

ع الجمر ماشيين

في التحرير متجمعين

للحرية رايحين

م الموت مش خايفين

ولو التمن عينيا

عليكي مش غاليه

لأنك حته من قلبي

ومهما حصلي فيكي

هاتفضلي برضوا

ضي عينيا

هافضل أحبك

عاوز أقول كلمة

معرفش هاقولها ليه !

عاوز أعمل حاجة

معرفش هي إيه !

عاوز أطير في السما

بس ماليش جناحين

عاوز أفرح وأغني

بس هايجي الفرح منين

وحبك كل يوم بيزيد

وإنت فين وأنا فين

بس عاوزك تبقي فاكره

إني بحبك

وهافضل أحبك

مهما طالت السنين

ومهما طالت السنين

هاتبقي برضوا نور العين

شبابك دهب ولولي

واقفين صفين

مابين شهيد وجريح

يا محلا الاتنين

مابين شايل أجنده

ومابين مفقوع العين

هاتفضلي يا مصر ديما

جوا القلب والعين

جيل وثار

عصفورة طايرة مش لاقية

شجرة علي شان عليها ترتاح

حاجات كتير بقت غريبة

والعرض أصبح مستباح

والأغرب والأعجب

إن الغلط بقي صح

-الثوار

بقوا بلطجية !

-والمجلس

حامي الشرعية !

-والإعلام

بالدف ماشي

شوية ليك

وشوية ليا

-شيخ الأزهر

إيه وداه هناك ؟

-ودكتور علاء

كان بيعمل إيه هناك ؟

-وست البنات

إيه لبسها اللبس ده ؟

-والأطفال

من إمتي بقوا ثوار ؟ !

-والحكومة

عاوزة عامرة !

-الإخوان

الإنتخابات أولا

ومافيش مانع

م الجلوس مع الأمريكان

-السلفيين

البرلمان أولا

ومافيش مشكلة

لما أذيع في إسرائيل

-والشهيد

الله يرحمه

-طب وحقة ؟

عند ربه

-واللي قتله

مين اللي قاتله ؟

إيه خلاه يروح هناك ؟

-طب والثورة

دي يابني فوره

والنظام لسه في مكانه

بس اتغيرت الأماكن

لعبة عويصه مش هاتفهمها

مدام عملي فيها ثائر

-طب ومصر

مالها مصر

ست الكل وحلوة مصر

زي الفل ...جميلة مصر

عشة وقصر تبقي مصر

هي غريبة هي مصر

اسمحلي أقولك :

حضرتك غلطان

الحكاية اتشقلبت

مابقتش زي زمان

دا جيل كامل ثار

بيلاقي في الموت الأمان

رصاصتك مش هاتخوفه

هاتقويه

وتلاقي بداله ملايين

ع الشهادة

ناويين

للحرية

مستنين

للجنة

طالبين

للعسكر

رافضين

في التحرير

متجمعين

لمصر

حالفين

مايسبوها تاني

ويرجعوا مجد حطين

حالفين ليبنوا مصر من تاني

مصر جديدة

شوراعها نضيفة

مدارسها كبيرة

مكاتبها عظيمة

ثقافتها واسعة

شغلها مستنيها

ناسها مبسوطة

مكانتها معروفة

ديما عندها الحل

يلجألها كل الناس

اللي تعب واللي مل

دي ببساطة طموحات

جيل

ع الظلم

ثار

وقرر يستمر