الثورة العربية

لما تونس قامت

كان العرب نايمين

عملوها ولاد الأبالسة

وطردوا زين العابدين

غار منهم المصريين

وافتكروا صلاح حطين

وعين جالوت وغيرها ياما

وانتصارات

علي مر السنين

وزاد عليهم كمان انتصار

في القرن الواحد والعشرين

ولميدان التحرير

العرب كلهم

كانوا مستنين

غار الشباب علي بلادهم

في ليبيا

وسوريا

واليمن

وقالوا : مصر قامت وإحنا وراهم

يا النصر يا ع الجنة رايحين

تونس مصر ليبيا اتحرروا

وياتري

اللي جاي مين ؟

ماتخدش في بالك ... الحلقة واحد وتلاتين

*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .

 

( الحلقة واحد وتلاتين )

بعنوان

ست شهور

***

 *مش عارف إيه إرتباط الرقم سته بالمجلس العسكري يعني أول ما مسك الحكم قالك هانسلم السلطة قبل ست شهور والموضع مطول لحد دلوقتي وهايطول قول بتاع سنتين كمان عقبال ما يعملوا الإنتخابات بعد ما اتحددت المواعيد خلاص وهايكون أول إجتماع لمجلسي الشعب والشوري بعد ست شهور ! واللجنة اللي هاتعمل الدستور لازم طبعا ست شهور !  ونقعد في إنتخابات الرئاسة ست شهور كمان ! يبقي الثورة الجاية علي الرقم سته ياجدعان وسلمولي علي الست شهور .

ماتخدش في بالك ... الحلقة التلاتين

*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .

( الحلقة التلاتين )

بعنوان

مفاجأة وبدلة

***

 *هو علي حسب معلوماتي البسيطة إني لما هاكون هاعمل مفاجأة يعني محدش تاني يعرفها غير لما تحصل إنما أعمل مفاجأة وألاقي الناس عرفاها يبقي حاجة من الأتنين يا إما أنا لمؤاخذه غبي ومعرفتش أعمل المفأجاة صح يا إما الناس هي اللي لمؤاخذه غبية وعاوزهم تصدق إنها مفاجأة ونروح للتليفزيون المصري لأن هو الوحيد اللي لسه برضوا بيعرف المفاجأت واضح إن الكاميرات بتاعته فيها سحره ولا إيه مش عارفين والمشير كانت البدلة هاتاكل منه حته بس ياريت تصبر شوية لحد ما يسلم السلطة وبعد كده تاكل منه زي ما هي عاوزة وطبعا هانستني الناس اللي إتصور معاهم بعد ما السلطة تتسلم علي شان تقولنا الحقيقة زي ما كان بيعمل المخلوع وعلي رأي اللي قال " كل شيئون إنكشفون وبان " ولو حد عاوز يضح علينا ينسي  .

ماتخدش في بالك ... الحلقة تسعة وعشرين

*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .

( الحلقة تسعة وعشرين )

بعنوان

حب الإستطلاع

***

*تبقي قاعد في أمان الله كده لا بيك ولا عليك وتلاقي عيل صغير – علي الرغم من إنتمائك ليه اب ، عم ، خال أو مؤنثاتهم – ويقعد يسألك في كل حاجة يشوفها دا ليه ؟ وإزاي ؟ وإمتي ؟ وحضرتك يا ترد علي الطفل يا ماتردش بس لازم تعرف أنك مصدر المعلومات الوحيد للطفل والأسئلة دي عفوية جدا وهو مايقصدش إنه يحرجك ولا حاجه فياريت بلاش نزعق للأطفال لما يسألونا ونرد عليهم .

 

ماتخدش في بالك ... الحلقة التمانية والعشرين

*سلسلة شبابية بقلم شاب لكل الشباب مع بعض الحبكات التي قد تبدو درامية في بعض الأحيان والتي لا تخلو من الفائدة في بعضها الآخر .

( الحلقة التمانية والعشرين )

بعنوان

إن شاء الله

***

*علي حسب معلموماتي ومن قرآتي للقرآن الكريم وفي صورة الكهف تحديدا إن كلمة " إن شاء الله " الواد بيقولها لما ينوي إنه يعمل حاجه في المستقبل – حتي لو بعد خمس دقايق من دلوقتي – بس أنا ملاجظ إن الناس في أي حاجة بتقول " إن شاء الله " يعني لما تسأله اسمك إيه ؟ يقولك : أحمد إن شاء الله ؟؟؟؟؟ طبعا ذكر الله –سبحانه وتعالي – جميل جدا بس الأجمل إنه يكون في موضعة الصح يعني لو عاوز تعرفني إن حضرتك متدين تقولي " بفضل الله اسمي أحمد " كده الجميلة تركب أصل الموضوع مش سمك لبن تمر هندي يعني .