الفهيم وقهوة درويش

خرجنا من باب المدرج بفتح عيني بملقاط لقيت عمنا الفهيم بيقولي : هاتروح فين دلوقتي ؟ = قولتله : مش رايح في أي حته قبل ما أشرب فنجان القهوة الجميل كده وبعد كده هاشوف هانروح فين ؟ - قالي : قهوة علي الصبح كده من غير حتي ما تغير ريقك ! يابني صحتك طب حتي خدلك أي بسكويت أو كيك كده قبل ما تشربها ؟ قولتله مالك كده مرة واحده بقيت خايف علي صحتي ! ما طول عمرنا بنشربها سوا ولا نسيت ؟

-لأ مانستش ولا حاجة وفاكر كمان كلام محمود درويش اللي بيقول فيه :

" أريد خمس دقائق من أجل القهوة….
والقهوة لمن أدمنها مثلي هي مفتاح النهار.
والقهوة، لمن يعرفها مثلي،
هي أن تصنعها بيديك، لا أن تأتيك على طبق،
لأن حامل الطبق هو حامل الكلام،
والقهوة الأولى يفسدها الكلام الأول لأنها عذراء الصباح الصامت. "

=طب كويس إنك فاكر يلا بقي علي شان خرمان ومش قادر اعمل أي حاجة

-ماشي ياسيدي بس إنت عارف إن القهوة دي علي أيام الخلافة العثمانية كانت بتدل علي إن الضيف شبعان مش عاوز ياكل علي شان كانوا بيقدموا معاها كوباية مياه ولو الضيف جعان هايشرب المياه لحد ما يعملولوا الأكل ، بس انجز كده وانت بتشرب القهوة علي شان لسه قدامنا يوم طويل أوي

=ههههههه انجز إيه يابني إنت نسيت كلام محمود درويش ولا إيه ؟

" والقهوة لا تشرب علي عجل

القهوة أخت الوقت تُحتَسى علي مهل

القهوة صوت المذاق ، صوت الرائحة

القهوة تأمّل وتغلغل في النفس وفي الذكريات "

-طالعلي في البخت محمود درويش دا ولا إيه مش عارف ، ماشي ياسيدي براحتك ، علي أقل من مهلك وإنت بتشرب

=يابني محمود درويش دا بإختصار هو متنبي الزمن اللي إحنا عايشين فيه دا ، كفايه إنك تسمع قصيدة بصوته الرخيم أو تقراله حاجة كده وإنت هاتفضل تجري وراه وتدور عليه علي شان تستمتع بجمال الألفاظ والصور الشعرية اللي ملهاش حل ، خد دي بقي مني ليك حاجة كده ما تطلعش غير للحبايب يا حبيب ، عمنا درويش بيقول :

" يطيرُ الحمامُ
يَحُطّ الحمامُ
أعدّي لِيَ الأرضَ كي أستريحَ
فإني أحُّبّك حتى التَعَبْ... "

بعد تنهيده طويلة ونفس عميق رايح قايلي : بعد الشعراية اللي قولتهالي دي اعمل اللي انت عاوزة بس في السريع برضوا

=ماشي ياسيدي ، أجبلك قهوة معايا

-مافيش مشكلة

=وصحتك يا كبير هههههههههههه

-تصدق أنا غلطان ماتجبش حاجة

-ههههههههه لا كبير مقدرش علي زعلك يلانروح نضربلنا اتنين قهوة كده عالسخان

=يلابينا 

A_Mohmady@yahoo.com ...

@ahmedmohmady