ياولاد المرة

أتذكر ماجد الذي كان يتباهي باخته بسمه وأمة سمر وأبوه حسن في كتاب اللغة العربية في سنة أولي ابتدائي واللي كل درس حد فيهم يغلط والتاني يصلحله غلطة وتتدخل أحيانا في سماجة وفضول بنت خلتهم أو بنت عمهم اللي مش فاكر اسمها إيه وتقعد تديهم في نصايح واللي عمورها ما غلطت أبدا .

سذاجة المناهج التعليمية وخصوصا مادة اللغة العربية بتخلينا ما نعرفش دينا صح ، علي شان بداية فهم الدين صح هي بداية فهم اللغة العربية وقواعد النحو والصرف اللي كان لما مدرس العربي يقولنا إن الحصة دي حصة نحو كإنه بيقول للفصل كله قيام ووشك للحيطة وارفع إيدك لفوق منك ليه ، ودا راجع لضعف المدرسين وعدم تمكنهم من اللغة العربية وعدم رغبة التلاميذ في تلقي أي شيء متعلق بالنحو وكإنة بعبع ممنوع الإقتراب منه أو التصوير .

لما تضايق من حد أو تزعل منه ومش عاوز تغلط فيه – مش علي شان إنت مؤدب لا سمح الله إنما علي شان مش عاوز حد من اللي حواليك ساعتها يقول إنك قليل الأدب - أقل حاجة بتقولها عليه إنه شخص تافه مع إن أصل الكلمة " تفه " وهو الشيء الذي لا طعم له فعدم معرفتنا بلغتنا العربية وعدم إدراكنا لقواعدها بيخلينا نقول كلام كتير جدا ونفهمه علي غير معناه زي لما تشوف حد بقالك فترة كبيرة ما شفتهوش وتقولة  : " مالك خاسس ليه كده ؟ ! " مع إن أصل الكلمة في اللغة هي الخسة أي الندالة واللي إنت عاوزة تقولة إنه بقي أنحف من الأول شوية .

طبعا إحنا مش في حصة عربي ولا أنا مدرس لغة عربية بس أحيانا كتير أوي بسمع وانا ماشي في الشارع في الكلية في المترو في أي مكان فيه شباب اتنين بيهزرو مع بعض فواحد بيقول للتاني : " يابن المرة " ، الكلمة ضايقت أوي واحد صحبي وقالي مش عيب الناس تهزر بالام قولتله طبعا عيب بس الكلمة ما فيهاش حاجة يعني لو روحت أوي دولة عربية هتلاقيهم بيقولوا كلمة إمراءة عادي جدا وعشان إحنا بنتكلم عربي مصري مطبيعي جدا إن كلمة إمراءة تبقي عندنا مرة إنما إحنا مفهومنا الثقافي عن الكلمة إنها كلمة مش لطيفة ولما بنيجي نتكلم عن المراءة بكلمة كويسة بنقول " دي ست كويسة " ودا راجع لمفهوم ثقافي تراكمي من أيام المملكة المصرية القديمة .

العديد من الكلمات اللي بنقولها في حياتنا اليومية منها اللي بنفكره إنها كلمات قليله الأدب علي الرغم من إن معناها الحقيقي ليه به أي دلاله علي قلة الأدب ومنها الكلمات المحترمة والتي تستخدم في غير موضعها وزي ما بيقولوا إن اللغة العربية لغة فضفاضة فطبيعي جدا إن الشعوب العربية تكون حمالة قسية .

مشكلة الوطن العربي وأزمتة هي في الأساس أزمة ثقافية وما ساعد مصر أن تنهض سريعا وتفيق من نكستها إلا أن المجتمع المدني كان قويا حينها يبث ثقافته في أنحاء المحروسة .

A_mohmady@yahoo.com ... @ahmedmohmady