* بعد الأكلة الهنية لازم طبعا تحبس بكوباية الشاي المعتبرة من إيد اللي بتحب يعملك الكوباية ممكن الست الوالدة أو أختك أم المدام لو كنت متجوز وساعات بيكون السيد الوالد هو المتخصص في عمايل الشاي – آه والله زي ما بقولك كده السيد الواد فمتستغربش – وكوباية الشاي في مصر بتمثل العمود الفقري في حياة المصريين يعني تلاقي الواحد بيقولك " ياعم الواحد ماشربش شاي النهارده ودماغة مش متظبطة " وتاني يقولك " تصور أنا ماشربتش غير عشر كوبايات شاي بس النهارده ! " وتالت يقولك " ماتيجي نروح نشرب شاي " وغيره وغيره وأكيد إنتوا عارفيين . وعلي شان كده بقي ياسيدي كوباية الشاي بتاخد أشكال وأنواع علي طول بر مصر كله من الصعيد الجواني لبحري ، يعني عندك مثلا لو في الصعيد الجواني الشاي لازم يبقي مغلي ولونه أسود حبر علي شان يعدل الدماغ والكوابة بتكون صغيرة واللون بيبتدي يفتح معاك وانت نازل علي إمتداد خط النيل والكوباية بتكبر معاك يعني الكوباية العادية في الصعيد بيتقال عليها " كوباية شاي خمسينة " في غير الصعيد والقري وطبعا مش شرط اللون يقل بس هو المزاج وغالبية الناس بتشرب الشاي كده ، وفي ناس ما بتشربش الشاي إلا وهو معمول كشري وناس لازم الشاي يكون خفيف يعني ببساطة كده كل واحد وذوقة في اختيار حجم الكوباية ولون الشاي ونوعيته وقليلين أوي في مصر اللي ما بيشربوش الشاي وبتلاقيهم بيشربوا قهوة – أهو كله منبهات – وقليل أوي أوي اللي تلاقيه مالهوش في أي حاجة منبهه وغالبا بيتقال عليهم " عيال فرافير " ، وعلي المستوي الشخصي كوباية الشاي بتحتل مكانة هامة جدا جدا جدا في التقاليع اليومية يعني طبعا لازم كوباية شاي علي الصبح كده علي شان تظبط دماغ الواحد ويعرف يظبط يومه وفي نص اليوم لازم يكون في كوباية شاي تانية وكمان واحدة تالته بالليل ودا زي ما بيقولوا كده أضعف الإيمان يعني يوم ما الواحد يقول ما شربش شاي بيبقي واخدله تلت كوبايات وطبعا دا بيكون في أيام الأجازات والعطلات اللي الواحد فيها مابيعملش أي حاجة ولا بيفكر في أي حاجة إنما لو قاعد علي شان أكتب يبقي طبعا لازم في كوباية شاي ولازم كوباية الشاي بتاعه الفرح مش الحاجة الساقعة بتاعه اليومين دول ! وفي المعازي طبعا لازم يكون في كوباية شاي وطبعا لو روجت عند أي حد لازم الواحد يشرب كوباية شاي وطبعا علي شان المذاكرة وإنك تعرف تذاكر لازملك تلت أربع كوبايات شاي ولازم تكون واحدة فيهم بالنعناع علي شان تعمل دماغ عالية أوي وتذاكر وطبعا مع التطور الطبيعي لأي حاجة في البلد تطورت أنواع المنبهات من كابتشينوا وموكا وغيرها كتير أوي إنما هاتفضل كوباية الشاي رقم واحد في كل دول ودا طبعا بيرجع لأن كوباية الشاي علي القهمو البلدي بجنية وساعات بجنية ونص وساعات بتوصل لسبعة جنية ونص في الكافيهات الغالي مينمم تشارج يعني يعني برضوا مش مكلفة واحنا ناس بنحب نعمر الطاسة وتعلي المزاج ومانغرمش كمان يعني علي القهوة بتطلب كوباية شاي واحده ولما القهموجي يسألك : عاوز حاجة تاني يا باشا ؟ تروح رادد عليه بكل عشم وبسرعة جدا : ربنا يخليك يا فنان ! إنما في البيت قبل ما تخلص كوباية شاي بتفكر في كوباية الشاي الجديدة وأهو كله علي حساب الزبون ، إنت بقي كوباية الشاي في حياتك بتمثلك إيه ؟ .
A_mohmady@yahoo.com ***
A_mohmady@yahoo.com ***
