الشتا السنة دي غريب
شوية ساقعة وشوية حر
زي حال البلد اليومين دول
شوية مضطرب وشوية مستقر
مصر اليومين دول بشبهها
بالبنت البكر
اللي كانت قربت تعنس
وفجأة
العرسان بقوا طوابير
الليبرالي ،،،
والعلماني ،،،
والإخواني ،،،
والسلفي ،،،
واللي فلول ،،،
ومن الجماعات الإسلامية
وولاد الحلال اتبرعوا وعرفوها
اللي ممول ،،،
واللي عميل ،،،
واللي معاه أجنده ،،،
واللي خاين ،،،
واللي مانزلش التحرير
تعمل إيه البنت البكر
وسط كلام مليان صفقات
مليان حوارات كلها فاشلة
مليان تخوين مليان منصات
جو كله حب كراسي
والأكتر منه حب الذات
وفي وسط كل دول طلعلها شاب
لابتاع تمويل ولا أجندات
نزل ميدان التحرير
يرجع الحق اللي مات
الحق لسه مارجعش
بس الشاب هو اللي مات
في التحرير ،،،
في محمد محمود ،،،
في القصر العيني ،،،
وفي أماكن تانيه كتير وآخرهم
في المدينة الباسلة " بورسعيد "
ولسه مش لاقيين الجاني !
البنت لبست للحداد
وبطلت تسمع أغاني
أصل الأغاني الوطنية
مابقتش مفهومة المعاني
البنت رفضت الجواز
لحد ما يتعرف الجاني
هناك تعليق واحد:
to7fa awi De
إرسال تعليق