*
بهلول شاب وسيم لذيذ ظريف ممكن يخير أقرب الناس ليه علي شان خاطر أي كلبة جربانه
وفي الآخر ممكن يسبها علي شان كلبة أجرب وهكذا ، أول ما روحناله أنا وعمنا الفهيم
لقيته فاتحلي درعاته وبيقولي : إيه يا ماو كل دا عشان تيجي إنت مش عاوز تقعد معانا
ولا إيه ؟ دي حتي القاعده طرية وخضرة ووجه حسن مش ناقص غير الميا . سلمت عليه و
قولتله : لا أبدا بس إنت عارف إني ماليش في القعده دي وبعدين ما ذنب النباتات اللي
بتقعدوا عليها دي ؟ والظاهر إن صوتي كان عالي فلقيت كل اللي قاعدين بصولي فضحك
عمنا الفهيم في وشهم وقالهم هو بس متضايق شوية دلوقتي بس لما يروق هاتعرفوه علي
حقيقته وتعرفوا إنه قلبه طيب زي البفته البيضا وسحبني من إيدي ومشينا مع رشاد
ودخلنا عليهم دخله المرعبين وهما داخلين علي شان يخوفوا أطفال الساحل الشمالي ،
وراح سلم عليهم عمنا الفهيم واحده واحده وهو بيعرفني ليهم وبالمرة عشان أشوف
مشكاحة اللي خطفت قلبه من أول نظرة دي ؟ واللي ماكنش محتاج إنه يقول اسمها لإنك
تحس إن هي الأميرة وكل اللي حواليها مجرد جواريتحتها متعرفش ليه جالي الإحساس دا
من قبل ما أعرف إن تخميني طلع في محله .
*
مشكاحة إنسانه في غاية البساطة ودا طبعا باين من لبسها - من غير حتي ما تتكلم
معاها – الجيب الجينز وعليه بلوزة بيضا والطرحة البمبي والميكب اللي مش باين أساسا
غير لما تقرب منه أوي وتدقق النظر كمان ، خدودها عاملة زي التفاح الأمريكاني
الطبيعي وعليهم ميكب بمبي خفيف ومناخيرها عامله زي البنقاية مخليه وشها كله باين ملامحة
زي القمر وبيجري الدم فيه ودا باين من شفايفها اللي لما بتتكلم بتكشف عن صفين من
اللولي والعيون الواسعه الكحيلة اللي فوقها بمبي خفيف .
* طلب مننا بهلول إننا نقعد وطبعا لبينا
الدعوة وكنت مش عاوز أزعل عمنا الفهيم وقعدنا نتكلم في حاجات عادية في أمور الحياة
والجامعة والدراسة وكل واحد منين – أول مرة نتعرف عليهم – ولقيت عمنا الفهيم وشة
بقي أحمر ومكسوف ومش عارف بتكلم وبيلجلج في الكلام بصتله بصة فهم معناها يا إما
تتكلم يا إما نقوم نمشي وزي ما يكون عصر علي نفسة ليمونة بدأ يتكلم وفضلنا قاعدين
أكتر من ساعة وكنت زهقت من القاعده – عشان معاهم بجسمي وعقلي عمال يفكر هاقول إيه
لفهيم أكيد - وهو خلاص جاب آخره ومش هايعرف يتكلم تاني روحنا مستأذنين بصنعه لطافة
وبهلول طلب مننا إننا نكرر القاعده مرة تانية قولناله : إن شاء الله يا برنس
وكملت في نفسي : " مش هاتتكرر تاني
" ، وإحنا ماشيين كان قلب عمنا الفهيم مستحملاه ضلوعه بالعافية من كتر الدق ،
وراح لاففلي مرة واحده و - قالي : إيه رايك = قولتله : في إيه ؟
- وحياة أمك إنت هاتستهبل ولا إيه ؟ يا بني
إحنا كنا رايحين نقعد معاهم ليه ؟
= إهدي ياعم عليا شوية ما تتعصبش أوي كده ...
البنت زي القمر ومافيش فيها غلطة و
-و أنا جايبك تعاكسها يابني إنت
= إنت عامل زي القطر كده ليه ماتسبني اكمل
كلامي للآخر يا جدع ... الله
-خلاص ياعم حقك عليا
= زي ماقولتلك البنت زي القمر ومافيش فيها
غلطة وكلمها محترم وفي حدود كمان بس إنت لسه ما تعرفش عنها أي حاجة يعني لسه بدري
علي اللي في دماغك
-إنت علي طول بتكسر مقاديفي كده ؟
= أكسرها أنا وانقذك أحسن مايكرسها حد تاني
ويسيبك تغرق
-ماتعمليش فيها فيلسوف وحياة وأبوك وقولي
بيتين شعر كده جامدين بس مش زي المرة اللي فاتت
=طب خد ياسيدي بيتين شعر للكبير أوي
-أحمد مكي ؟
= لأ المتنبي يا خفيف وما تستظرفش تاني بدل
ما أرجع في كلامي
-لاياعم خلاص حقك عليا ... قول ياسدي وسمعنا
= اسمع يا سيدي عمنا المتنبي في قصيدته
" " لعَيْنَيْكِ
ما يَلقَى الفُؤادُ وَمَا لَقي " بيقول فيها :
" لعَيْنَيْكِ ما يَلقَى الفُؤادُ وَمَا
لَقي ... وللحُبّ ما لم يَبقَ منّي وما بَقي
وَما كنتُ ممّنْ يَدْخُلُ العِشْقُ
قلبَه ... وَلكِنّ مَن يُبصِرْ جفونَكِ يَعشَقِ "
لقيت عينيه بتلمع وشه بانت عليه ملامح الفرحة
– وقال : ينصر دينك يا جدع ... نشنت ونشانك رشق .
= علي الله يطمر بس
-هايطمر يا سيدي – إن شاء الله –
= قولي بقي إنت قاعد زي اللي نازي علي سهم
الله كده ليه ومابتتكلمش ؟
-ما كنتش عارف أقول إيه بصراحة ، حاسس إن في
عنيها كلام ومكسوفة تقوله وأنا في عيني كلام أكتر ومش قادر أقوله ، لحد ما انت
بصطلي واتكلمت في أي حاجة والسلام .
= حلو جو لغة العيون اللي إنت عايش فيه دا ؟
وعرفت كل دا من أول ما شوفتها ولا من المرة التانية ؟
-إنت هاتتريق بقي ! تصدق أنا غلطان إني طلبت
منك الشعر
= بمناسبة الشعر إنت فكرتي بأمير الشعراء
بكلامك عن لغة العيون دي
-إزاي يعن ؟
= زي الناس أحمد بيه شوقي كان كاتب قصيدتة العظيمة
" يا جارة الوادي " اللي بيقول فيها :
" تعطلت
لغة الكلام وخاطبت ... عيني في لغة الهوى عيناك "
وأكيد شفت فيلم " عبود علي الحدود
" .
-إيه دخل الفيلم دلوقتي يابني ما تفصلنيش ؟
= لما وقعوا في حقل الألغام صاحب الأرض كان
ماشي علي حماره ومشغل موسيقار الأجيال عبد الوهاب وهو بيقول : " جفنه علَّم الغزل ... ومن الحبِّ ما قتل" دي كلمات شوقي برضوا .
-دا أنت عليك تشبيهات وأبيات شعر إزاي
الحاجات دي فاتت عليا
= عادي بقي يا كبير هو إنت عقلك فيك دلوقتي
ماتخليني ساكت أحسن
-آه والله السكوت ليك مصلحة لو في شعر قولة
لو مافيش يبقي تسكت لحد ما نوصل
وفضلت ساكت لحد ما افتكرت أبيات من القصيدة
الرائعة " عيناك أرض لا تخون " للشاعر العظيم فاروق جويدة بيقول فيها :
" عيناك بحر النور
تحملني إلي
زمن نقي القلب ...
مجنون الخيال
عيناك إبحار
ودعودة غائب
عيناك توبة عابد
وقفت تصارع وحدها
شبح الضلال "
أول ماخلصت الأبيات لقيته راح باصصلي وعينيه
كلها فرح وراح واخدني بالحضن ومن حسن الحظ إننا كنا خلاص واصلنا وكل واحد هايطلع
علي بيته – لحسن الناس تقول علينا مجانين ولا شواذ – ورايح قايلي : يلا سلام بقي
أشوفك بكرا إن شاء الله يلا سلام
= إن شاء الله يا كبير سلاموز
-سلام
