الجمعة، 18 أكتوبر 2013

أبسط الأماني



وحشاني جدا ... تسمحيلي
أشوف صورتك
حتي لو بس في خيالي

أسمع صوت ضحكتك
أحس بوجودك
عيونك في بالي

أشوفك أجمل وأجمل
واتجرأ أكتر وأكتر
وأهدم جبال خوفي

واقف بين ألوف
أرسم جرافيتي
وبهتف بصوت عالي

يسقط كل خاين وجبان
وكل عملا الأمريكان
ويعيش الوطن الغالي

ويعيش الشهيد البطل
اللي ضحي لأجل الوطن
وحلمه هايفضل غالي

عيش حرية عدالة
لكل فرد مننا
ودي أبط الأماني

20/9/2012

مواضيع أخري
--

للتواصل
--

الأحد، 6 أكتوبر 2013

بين الأمل والحيرة

فكري علي مهلك بشويش
دا في إيدك قلب بيحلم
في السعادة يعيش

فكري بعقلك وقلبك
واحسبيها بالقلم
ما تتسرعيش

مع إني عايش في الألم
مستني ردك عليا
قلبي لسه قادر يعيش

مستني لحظة رضا
بكلمة منك تقوليها
بكسوف ... بشويش

كلمة فيها كل الدوا
إن كان قبول ولا رفض
خدي قرارك وما تسرعيش

حافظي علي ضحكتك
وكل حاجة حلوة
ارجوكي ما تتغيريش

فكري تاني وتالت
وسبيني عايش عالأمل
عمري من غيره في يوم هاعيش

بين الأمل والحيرة
هابعتلك - من قلبي - جواب
بس اوعي ما ترديش

هاستني الرد منك
برخم عليكي طبعي كدا
استحمليني وماتزعليش

متربي في قلب مصر
متعلم الصبر والحكمة
من زحمة طابور العيش

فلو في يوم كنت السبب
في دمعة نزلت من عنيكي
حقك عليا ما تعيطيش

خدي قرارك براحتك
مدام انت مرتاحة
قلبي هايكون قادر يعيش

مواضيع أخري
--

للتواصل
--
A_Mohmady@yahoo.com ***

@ahmedmohmady