رباعيات ع الماشي 14

ياللي إنت حبيبي وسايق في الدلال

إمتي هاتحتن علي قلبي الميال ؟

ولا أنت مبدأك ... التقل صنعة

ودي حكمة قالوها في الأمثال

عجبي !!!

--

* مين فينا جاني يابلد ومين ضحية

وملف أمنك يلعبوا فيه الأمنجية

والديرة مقفولة والكل فيها داير

وريحة الدم لسه فاتحة القضية

عجبي !!!

--

* صباح التفاءول والأمل

صباح التفكير والعمل

صباح أي حاجة حلوة

ويارب كل جرح يندمل

عجبي !!!

--

* ياحلو – يا أبيض– يا معجباني

يا سايق دلالك علي شيطاني

التقل صنعه بحب وحقيق

إمتي بقي هاترحم جناني

عجبي !!!

--

* الذكريات واللي فات شيء جميل

بكرا جي لو مهما كان الليل طويل

اصبر تنول حكمة وقالوها زمان

بالتعب هتلاقي مش بالصراخ والعويل

عجبي !!!

--

* ماتخفش من إنسان ولا من بكرا

كل اللي حواليك أصلة كان فكرة

اطلق لجام خيالك وطير

هتلاقي جواك ألف ألف فكرة

عجبي !!!

--

* الرزق جايلك جايلك أطلبة بالحلال

لا عز دام ولا جاه ولا كتر مال

ربك كريم اسأله ينولك المراد

ارميله حمولك واطلب منه راحه البال

عجبي !!!

--

* بعدك مش هايمحي حبك دا هيزوده

دا طريقنا طويل وإحنا لسه في أوله

ولسه في ياما حب وود،هجر ووصال

هاتي إيدك في إيدي والطريق هانكمله

عجبي !!!

--

* لازم تاخدي وقتك وتفكري

هاسيبك فترة عشان تقرري

ما اتغيرتش من ناحيتك ولابفكر

 فنصيحة مني اوعي تتغيري

عجبي !!!

--

* عجبي علي كلمة شفت فيها العجب

ونص كلمة بيكتبها عم أحمد رجب

محفوظ مكانها وشكلها في الجرنال

تابعها ديما وهاتشوف فيها العجب

عجبي !!!

A_mohmady@yahoo.com ***

@ahmedmohmady

علي شان أحبك

1- مش لازم تكوني أجمل واحده في الكون ولا لون بشرتك أبيض أو أسمر أو خمري المهم تكوني حركتي مشاعري  وتكوني محجبة .

2- لازم تكوني أحسن واحده في المكان اللي إنت فيه في الجامعه متميرزة في شغلك الناس كلها بتتكلم إنه عامله شغل جبار بيتكوا معروف في المنطقة إنكوا ناس في قمة الإحترام .

3- لازم تكوني بتحبي اللون الأزرق زي حلاتي وبتقفي علي النيل لما تكوني متضايقة .

4- لما أتصل بيكي في التليفون ردي عليا ولو باباكي جنبك ، ماتستغربيش أنا عارف هاكلمك في إيه وما يسببلكيش أي إحراج .

5- لازم يبقي في ثقة متبادلة مابينا أساسها الإحترام ولازم تعرفي إني مش هعمل أي حاجة أضرك فيها أو أجرح مشاعرك وحتي لو بمجرد كلمة .

6- لازم يكون عندك رأي وتدافعي عنه بشراسة حتي لو كان مخالف لرأيي ، في ساعتها ممكن اضايق واعمل مشكلة صغيرة يعني بس بعد كده هيزيد إعجابي بيكي أكتر وأكتر .

7- لازم تعرفي إن كل البنات بالنسبالي حاجة واحده بس كلهم إخواتي وماليش دعوة بوجهة نظرهم فيا إيه وخلي الكلمة دي حلقة في ودنك " إنت وبس اللي حركتي قلبي " .

8- لازم تكوني بتقري ولو كتاب علي الأقل كل 3 شهور يعني في السنة 4 كتب .

9- لازم تكوني ست بيت شاطرة وما تقلقيش مش هاقولك علي أكلة بحبها عشان بحب كل الأكل واللي هاتعمليه هاكله وأنا سكت .

أكيد في حاجات تانية كتير أوي عاوز أقولهالك بس لازم يبقي في قدر من الخصوصة.

A_mohmady@yahoo.com …

@ahmedmohmady

الفهيم في حضرة السيدة

إختفي عمنا الفهيم مرة واحده كده والموبايل كان هايفصل شحن قعدت أدور عليه في الأماكن اللي عارف إنه بيبقي فيها ما لقتهوش ، خدتها حجة وروحت قافل الموبايل – اللي هو كده كده هايفصل – وروحت مروح ومديها الهخ – نوم – الجميل .

صحيت من النوم حطيت الموبايل في الشاحن وأول ما فتحته لقيت عمنا الفهيم بيرن عليا

=إيه يا عمنا بتسبني وتخلع كده ينفع الكلام دا ؟

-كنت في السيدة يا مان وعارف إنك ماكنتش هاتيجي معايا

=طب كنت عرفني كنت روحت نمت بدل ما عمال ألف عليك

-منا اتصلت بيك وكان موبايل مقفول

=يلا حصل خير قولي بقي عملت ايه في السيدة ؟

-كل خير يا سيدي كل خير حال الجوامع عامل زي حال مصر بالظبط كل الأمور متلخبطة وكل واحد ماشي بمزاجة

=لا كده الكلام كبير واحده واحده عليا من أول ما دخلت الجامع

-بص ياسيدي وإنت داخل الجامع علي إيدك اليمين الخزنة بتاعه لمؤاخذة الجزم وراجل قاعد بياخد علي كل جزمة أقل حاجة جنية ، بعد الضريح علي إيدك اليمين في واحد بتاع سبح قاعد في الجامع كل اللي بيعدي بينادي عليه ويفضل يتكلم معاه عشان ياخد منه حاجة معرفش دا موجود علي طول ولا كان موجود ساعتها بالصدفة تدخل بقي علي الميضة – مكان الوضوء – الشبب اللي هاتدخل بيه دورة الميا بتأجرة

=طب ما الحاجات دي موجودة من زمان وانت عارف كده كويس

-يابني اسمع الكلام للآخر مرة واحده في حياتك بقي

=حاضر يا عمنا كلي آذان صاغية

-صلاة العصر ماينفعش تقام من غير مال المقريء يقرأ ربع علي الأقل والناس كلها بتسمع يعني لو نزلت السيدة العصر ولقيت قرآن ما تفكرهوش زي حلاتي ميت دا قرآن العصر ، الناس بتخلص الصلاة وبيجروا علي المقام تدخل علي المقام دا بقي ملكوت تاني خالص

واحد بيمسح الكوفية بتاعته في المقام وعمال يدعي ويقول كلام مفهمتش منه أي حاجة بصراحة وبعد كده راح مطلع الموبايل بتاعه وكلم حد وراح مادد إيده بالموبايل ناحية المقام ! واحد من اللي معايا قالي دي حاجة طبيعيه بيعملها الناس هنا لما يجيوا يتصلوا بأهلهم أو أي حد ويخلوه يدعي بالمنظر دا

واحد تاني ماسك الحديد بتاع المقام وعمال يحط عليه مسك أو حاجة غريبة من إزازة مش باينلها ملامح

واحد داخل بالجزمة بتاعه وكان ماشي بيها قدامة راح واحد معلي صوته مرة واحده وقاله : " دع حذائك خلف ظهرك يا أخي فأنت أمام المقام " استنين رد فعل الراجل لقيته وطي راسه في الأرض وحط إيدة اللي فيها الجزمة ورا ضهره فعلا

كان في راجل كبير ماسك كراسة قديمة فحت وعمال يقول منها أشعار مفهمتش منها أي حاجة كل شوية يروح طالع بكام بيت كده ويسكت تاني

ناس كتير أوي دخلوا يصلوا جنب المقام

وانت خارج من الاوضة اللي فيها المقام في اوضة تانية قبل ما تخرج من المقام خالص كان قاعد فيها المريدين بس لسه ما بدأوش الإناشيد بتاعتهم وكان في واحد معاه جركن ميا بس ما شفتش حد خد منه كوباية !

ابتدا المريدين الأناشيد بس صوتهم كان بعيد عشان كنت بتجه ناحية الباب بس صوتهم وإيقاعهم يسحر القلوب وهما بيقولوا : " مولاي صل وسلم دائما أبدا علي حبيبك خير الخلق كلهم " كنت خلاص هندمج معاهم لولا إن واحد راح طالع برا المقام خالص وقال بصوت عالي : " السيدة زينب ست الكل " سكت شوية وظهر صوتهم تاني " مولالي صل وسلم ... " وراح مكمل بصوت عالي " ياروح الروح يا ست " ، " السيدة زينب ست الكل " . كنت فصلت من الراجل بصراحة روحت واخد الجزمة بتاعتي من الخزنة ودفعت فلوس للراجل تاني ومشيت .

A_mohmady@yahoo.com  ...

@ahmedmohmady